Ang Simbahan Nagkinahanglan sa Kahingkod ug Kasinatian sa Senior nga mga Magtiayon
Kauban sa nagkadaghan nga batan-ong mga misyonaryo tungod sa pag-ubos sa edad sa magmisyon, ang senior nga mga magtiayon gikinahanglan usab kaayo sa mga misyon sa tibuok kalibutan. Uban sa bag-o lang nga gitukod nga 58 ka bag-ong misyon, gikinahanglan ang kasinatian sa daghang senior nga mga magtiayon sa pagpangulo ug sa uban pang suporta nga importante kaayo alang sa malampuson nga misyon.
Niadtong Abril 2013 nga komperensya, si Presidente Thomas S. Monson namulong sa pas-pas nga pagdaghan sa mga misyonaryo ug mipahayag sa iyang gugma niadtong andam nga moserbisyo sa Ginoo ngadto sa misyon (tan-awa sa mga pahina 4, 66). Si Elder Russell M. Nelson sa Korum sa Napulog Duha ka mga Apostoles miawhag gayud sa senior nga mga magtiayon sa pagserbisyo. “Kamong mga senior nga magtiayon, planoha kanus-a kamo magmisyon. Magpasalamat kaayo kami sa inyong pagserbisyo,” miingon siya (tan-awa sa pahina 45).
Atol sa pagbukas sa Oktubre 2012 nga kinatibuk-ang komperensya, si Presidente Monson miingon: “Nagpadayon ang atong panginahanglan og dugang senior nga mga magtiayon. Kutob sa itugot sa inyong kahimtang, kon kamo angayan na nga moretiro, ug maayo ang inyong panglawas, moawhag ko ninyo nga mag-full-time nga misyonaryo. Ang bana ug asawa adunay mas dakong kalipay samtang sila kaubang magserbisyo sa mga anak sa atong Amahan” (“Welcome sa Komperensya,” Ensign o Liahona, Nob. 2012, 5).
Sulod sa daghang katuigan, ang mga lider sa Simbahan miawhag sa senior nga mga magtiayon sa pagserbisyo. Si Elder M. Russell Ballard sa Korum sa Napulog Duha ka mga Apostoles miingon: “Ang mga misyon sa tanang dapit nagkinahanglan og dugang nga mga magtiayon. Ang ilang kahingkud ug kasinatian makahimo og pinakamaayong mga misyonaryo. Ang talagsaon nilang kahanas … makahimo nga sila epektibong makabansay og lokal nga mga lider, makalig-on ug makapaaktibo sa mga miyembro, ug makadala sa dili mga miyembro ngadto kang Kristo” (“Missionary Couples—Trading Something Good for Something Better,” Ensign, Hunyo 1988, 9, 11).
Ang takus nga mga magtiayon nga gustong magmisyon giawhag nga mopahibalo sa ilang mga bishop o presidente sa branch sa ilang tinguha sa pagserbisyo. Ang gidugayon sa pagserbisyo mahimo nga 6 ug ngadto sa 23 ka bulan.
Kadtong dunay mga pangutana bahin sa senior nga pagmisyon makatawag sa 1-800-453-3860, ext. 2-6741 (o 1-801-240-6741), o mag-email SeniorMissionaryServices@ldschurch.org aron makadawat og tubag sa piho nga mga pangutana.
Ang talagsaong kahingkud ug kasinatian sa senior nga mga magtiayon makahimo nga sila epektibong makabansay og lokal nga mga lider ug makalig-on ug makapaaktibo sa mga miyembro, ug makadala sa dili mga miyembro ngadto kang Kristo.
Gilitratohan ni Don L. Searle © IRI