Ang ika-183 nga Tinuig nga Kinatibuk-ang Komperensya Naglakip sa Pagpaluyo sa Bag-ong Kinatibuk-ang Kapangulohan sa Young Women

“Natandog ang atong mga kasingkasing,” miingon si Presidente Thomas S. Monson sa panapos nga sesyon sa ika-183 nga Tinuig nga Kinatibuk-ang Komperensya sa Abril 7, 2013, “ug nalig-on ang atong mga pagpamatuod mahitungod niining balaan nga buhat samtang atong gibati ang Espiritu sa Ginoo. Hinaut atong mahinumduman ang atong mga nadungog niining milabayng duha ka adlaw.”

Makatabang Ikaw

Sila si Presidente Thomas S. Monson ug si Elder Russell M. Nelson sa Korum sa Napulog Duha ka mga Apostoles miawhag sa mga miyembro sa pagtampo ngadto sa General Missionary Fund. Pagka-Abril 4, 2013, 65,634 ka full-time nga mga misyonaryo ang nagserbisyo, nga duna pay kapin sa 20,000 ang nakadawat na og tawag.

Atol sa pangbukas nga sesyon sa kinatibuk-ang komperensya, si Presidente Monson miingon, “Aron mamintinar kining pwersa sa misyonaryo, ug tungod kay daghan sa atong mga misyonaryo naggikan sa lisud nga kahimtang, amo kamong gidapit, kon mahimo ninyo, sa pagtampo og ubay-ubay sa General Missionary Fund sa Simbahan.”

Ang mga miyembro makaamot o makatampo gamit ang slip nga sulatanan sa donasyon sa ikapulo ug sa pagsulat sa kantidad nga gusto nilang itampo sa General Missionary Fund. Ang mga miyembro makadonar usab pinaagi sa internet ldsphilanthropies.org.

Kapin sa 100,000 ka tawo ang mitambong sa lima ka sesyon sa kinatibuk-ang komperensya didto sa Conference Center sa Siyudad sa Salt Lake, Utah, USA, niadtong Abril 6 ug 7. Mga milyon ang nanan-aw ug naminaw sa tibuok kalibutan pinaagi sa TV, satellite, radyo, ug pinaagi sa Internet nga mga pagsibya. Sa sibya ug pinaagi sa internet video, audio, ug mga teksto bahin sa komperensya nga naa sa LDS.org, ang mga miyembro maka-access sa komperensya sa 95 ka pinulongan.

Si Presidente Monson mibukas sa tinuig nga komperensya pinaagi sa pagpahibalo sa mga plano sa pagtukod og mga templo sa Cedar City, Utah, USA, ug sa Rio de Janeiro, Brazil—naghimo sa gidaghanon nga 29 ka mga templo ang gipahibalo o gipangtukod pa. Sa karon, dunay 141 ka mga templo ang nag-operate.

Daghang kausaban ang gihimo sa pagpangulo sa Simbahan atol sa sesyon sa Sabado sa hapon. Ang tanang sakop sa kinatibuk-ang kapangulohan sa Young Women gi-release, ug si Elder Walter F. González gi-release isip sakop sa Kapangulohan sa Seventy. Singkwenta y uno ka mga Area Seventy ang gipang-release usab.

Si Elder Ulisses Soares sa Unang Korum sa Seventy gipaluyohan isip sakop sa Kapangulohan sa Seventy.

Gipaluyohan isip bag-ong kapangulohan sa Young Women sila si Bonnie Lee Green Oscarson, presidente; Carol Foley McConkie, unang magtatambag; ug Neill Foote Marriott, ikaduhang magtatambag.

Tulo ka bag-ong sakop sa Unang Korum sa Seventy gipaluyohan usab: Sila si Elder Edward Dube nga Taga-Zimbabwe; Elder S. Gifford Nielsen nga Taga-Sugar Land, Texas, USA; ug Elder Arnulfo Valenzuela nga Taga-Queretaro, Mexico. Lima ka bag-ong sakop sa Ikaduhang Korum sa Seventy gipaluyohan usab.

Si Elaine S. Dalton, kanhi kinatibuk-ang presidente sa Young Women, miserbisyo sa kinatibuk-ang kapangulohan sa Young Women, isip magtatambag o isip presidente, sulod sa 11 ka tuig sa wala pa siya ma-release niadtong Abril.

Tan-awa ang kompleto nga lista sa mga pagpaluyo ug pag-release sa pahina 26.

Pangitaa ang mga biography sa bag-ong natawag nga mga lider sugod sa pahina 139.