Elder Edward Dube

Sa Seventy

Si Elder Edward Dube gipaila sa ebanghelyo niadtong 1981 sa usa ka employer kansang balay iyang gitrabaho. Ang maong tawo mihatag kaniya og kopya sa Basahon ni Mormon. Wala kini niya basaha hangtud pagka 1983 diin siya nadasig sa pagpamatuod ni Joseph Smith sa pagbisita ni Moroni mao nga midawat siya sa imbitasyon nga motambong sa miting sa pagpamatuod ug pagpuasa sa meetinghouse sa Kwekwe, Zimbabwe.

Sa sinugdanan dili siya komportable, kay gibati niya nga ubos ra siya ikumparar sa mga nanambong.

“Apan dihang mipamatuod sila kabahin sa Basahon ni Mormon, akong gibati nga may koneksyon ako niining mga tawhana,” nahinumdum siya, “ug nakahimo ko sa pagpakigbahin sa akong gibati bahin sa Basahon ni Mormon.”

Dayon siya natudloan sa mga leksyon sa misyonaryo, nabunyagan, ug sa kadugayan nagserbisyo sa Zimbabwe Harare Mission.

Nianang panahona, gitudloan niya ang pamilya ni Naume Keresiya Salazani, nag-edad pa og 16. Padayon silang naghigalaay human sa iyang misyon ug naminyo sa Kwekwe niadtong Disyembre 9, 1989. Pagka-Mayo 1992 na-sealed sila sa Templo sa Johannesburg South Africa. Ginikanan sila sa tulo ka anak nga babaye ug usa ka lalaki.

Natawo niadtong Mayo 1962 sa balangay sa Chirumanzu, Zimbabwe, kang Clement ug Rosemary Dube, si Elder Dube nakaangkon og diploma sa edukasyon gikan sa Zimbabwe D. E. College niadtong 1992 ug dayon nanarbaho sa Church Educational System, miestablisar sa seminary ug institutes of religion sa Zimbabwe, Zambia, ug Malawi. Bulahan siya nga nakakita sa daghang estudyante nga iyang natunulan sa mga certificate of graduation nga miserbisyo og mga posisyon sa pagkapangulo sa Simbahan sa mga nasud samtang milambo ang Simbahan.

Nakaserbisyo siya isip presidente sa elders quorum, presidente sa branch, presidente sa district, presidente sa stake, magtatambag sa kapangulohan sa misyon, ug, sugod 2009 hangtud 2012, presidente sa Zimbabwe Harare Mission. Sa wala pa siya matawag ngadto sa Unang Korum sa Seventy nagserbisyo siya isip Area Seventy.