Bag-ong Online Tools o Himan Makatabang sa Pagpreserbar ug Pagpakigbahin sa mga Litrato sa Pamilya ug mga Handumanan
Ang mobisita sa FamilySearch.org makamatikod og pipila ka mahinungdanong kausaban sugod Abril 2013. Presko, sanag nga mga kolor, makadani nga mga litrato, ug hut-ong sa bag-ong mga feature ang nagtanyag og lain-laing kasinatian nga mas labaw kay sa pagsiksik. Bisan og ang site maayo gihapon kaayong destinasyon alang sa mga genealogists ug tigsiksik, ang bag-ong mga feature makaagni og mas daghan ug lahi-lahing mga bisita.
Ang bag-ong mga feature makatabang sa pag-uswag sa family history nga lisud nang siksikon ug makaagni og daghang bag-o nga family historians mga batan-on ug tigulang. Ang mga bisita makahimo na karon sa ilang family tree diha sa internet ug makapreserbar niini ug makapakigbahin sa ilang mga litrato ug mga sugilanon—ang tanan libre.
Ang mga litrato ug mga istorya sa pamilya makapahinudom nato sa atong katigulangan. Ang mga tawo nga hingtungdan niana nga mga petsa makatudlo kanato sa mga baruganan sama sa bili sa tinuoray nga pagtrabaho, pag-atubang sa mga hagit sa kinabuhi, ug sa unsang paagi nakaapekto sa atong kinabuhi ang atong mga pagpili.
Ang paghimong sayon sa pagrekord ug pagpreserbar sa kasaysayan sa pamilya makatabang nga makonektar kita sa atong nangagi ug makamugna og panulundon sa umaabut.
Bag-ong mga Feature sa FamilySearch.org
FamilySearch Family Tree. Sa unang higayon sa FamilySearch.org, ang mga indibidwal makasugod sa paghimo og ilang family tree tanan pinaagi sa internet, sugdan pinaagi sa pagdugang og impormasyon bahin sa ilang kaugalingon ug dayon magpadayon ngadto sa nangagi nga henerasyon.
Importanting mga feature sa Family Tree:
-
Pangitaa kini diha sa FamilySearch.org ubos sa tab nga “Family Tree”.
-
Ang family tree dunay kapin sa 900 ka milyon nga indibidwal nga mga ngalan nga gitampo sa mga patron.
-
Libre kini.
-
Makapahimo kini sa mga indibidwal sa paghimo, pagdumala, ug pagpakigbahin sa kasaysayan sa ilang pamilya tanan pinaagi sa internet.
-
Ang mga user o tiggamitan mahimong makakita sa unsay nakaplagan sa uban kabahin sa kasaysayan sa ilang pamilya.
-
Ang mga user o tiggamitan makabutang og mga litrato ug sugilanon ug link sa mga tinubdan.
-
Ang mga user o tiggamitan makapreserbar sa ilang family tree alang sa umaabut nga mga henerasyon.
-
Ang sayon ra nga feature nga “grab and pull” makahimo sa mga tiggamitan nga makabalhin-balhin pataas ug paubos sa ilang family tree sa kasayon.
-
Ang mga patron dunay access sa bilyon ka walay bayad nga mga rekord sa FamilySearch.org aron makompleto ang may kulang nga mga sanga sa ilang Family Tree.
Mga litrato. Ang mga tiggamitan mahimong mopreserbar og mga litrato sa katigulangan, mo-attach niini sa ilang profile diha sa FamilySearch Family Tree, ug mopakigbahin niini pinaagi sa social media. Kapin na sa 200,000 ka mga litrato ang natampo, napreserbar, ug napakigbahin.
Mga istorya. Ang mga tiggamitan mahimong mosulat sa paborito nilang mga istorya bahin sa usa ka piho nga katigulangan diha sa FamilySearch Family Tree. Kini nga feature makahimo nga ang ilang pamilya makatigom, makapakigbahin, ug makapreserbar kanunay sa mga istorya sa ilang pamilya.
Interactive nga Fan Chart. Niadtong 2012 ang FamilySearch mitesting og usa ka feature nga makapahimo sa mga indibidwal nga makakita sa ilang kaugalingon ug sa ilang kaliwatan diha sa mabulukon nga fan chart. Kini nga feature gipalambo na karon ug naa na sa FamilySearch.org.
Family Tree Wizard. Kadtong mga bag-o pa sa paghimo sa ilang family tree makakita nga mapuslanon kini nga himan [tool]. Sa usa ka madapiton nga matang sa interbyu, ang himan [tool] mangutana kabahin sa inyong buhi pa ug patay na nga katigulangan, dayon himoon kini nga mga koneksyon ngadto sa family tree aron kamo makasugod.
Tabang diha sa Internet. Ang interes kabahin sa family history nagkadako sa tibuok kalibutan. Ang FamilySearch mibukas og usa ka tibuok kalibutan nga komunidad sa internet nga naghatag og libre nga tabang sa produkto ug personal nga tabang sa pag-research pinaagi sa telepono ug pakig-chat diha sa internet 24 oras sa usa ka adlaw—karon sa 10 ka pinulongan.
Mga Pinulongan. Ang tanang bag-o nga features ug mga serbisyo anaa na unya sa 10 ka pinulongan. Usa ka koleksyon sa libre nga mga video nga magpakita kon unsaon ug unsa ang uban pang kapanguhaan ang anaa sa internet alang sa tanang feature. I-klik lang ang Help button alang sa dugang nga detalye.
© IRI
© IRI