Elder Adrián Ochoa

Sa Seventy

Samtang nagserbisyo isip Area Seventy sa Mexico, si Elder Adrián Ochoa migahin og mga adlaw sa siyudad sa Chihuahua sa pakigtambag sa presidente sa stake ug sa uban, dayon misakay og eroplano aron mopauli. Apan human makalingkod sa lingkuranan nakadawat siya kusog nga espirituhanong pag-aghat nga ang iyang buluhaton sa Chihuahua wala pa mahuman.

Ang flight crew nangandam na alang sa paglupad. “Apan,” miingon si Elder Ochoa, “nasayud kong kinahanglan ko nga manaog sa eroplano.” Mikanaog siya. Usa ka nagsunod nga mga pag-interbyu ang nakapagawas sa importanting impormasyon nga nakasulbad sa lisud nga problema ug nakahatag og espirituhanong kalamboan sa usa ka pamilya.

Apan ang buluhaton ni Elder Ochoa sa Chihuahua wala pa gihapon mahuman. Gigiyahan na usab siya ngadto sa mapaubsanong panimalay sa usa ka ig-agaw nga wala na niya igkita sulod sa mga katuigan. Iyang nakaplagan ang napahilayo na niya nga ig-agaw—dili na aktibo nga miyembro—ug ang gamay niyang pamilya nga nagkalisud sa kinabuhi. “Nasayud ko nga ang Simbahan ug si Kristo mao ang sulbad. Akong gihangyo ang akong ig-agaw nga mobalik sa simbahan,” miingon siya.

Ang iyang ig-agaw naaktibo gayud, ug ang bililhong relasyon sa pamilya nahibalik. Ang Ginoo nakaluwas og daghang kinabuhi sa Chihuahua tungod kay ang usa ka tawo mipatalinghug sa mga pag-aghat sa Espiritu.

Ang tanan may katungod niana nga makapausab sa kinabuhi nga espirituhanong pag-aghat, mipamatuod si Elder Ochoa, kinsa nakaserbisyo og lain-laing calling samtang nagtrabaho sa advertising. Nakadumala siya sa Honduras San Pedro Sula Mission sugod 2004 hangtud 2007 ug, sugod 2009 hangtud gitawag siya ngadto sa Ikaduhang Korum sa Seventy, miserbisyo isip ikaduhang magtatambag sa kinatibuk-ang kapangulohan sa Young Men.

Natawo niadtong Marso 1954 sa San Francisco, California, USA, kang Eduardo ug Consuelo Ochoa, nagdako siya sa California ug Mexico. Isip usa ka batan-on, gitawag siya nga moserbisyo sa usa ka espesyal nga misyon sa public affairs sa Mexico. Siya ug ang iyang asawa, si Nancy Villareal, na-sealed sa Mexico City Temple. Mga ginikanan sila sa lima ka anak.