Ne Kau ʻi he Konifelenisi Lahi Hono 183 Hono Hikinimaʻi ʻo e Kau Palesitenisī Lahi ʻo e Kau Finemuí
Naʻe pehē ʻe Palesiteni Tōmasi S. Monisoni ʻi he fakatahaʻanga fakaʻosi ʻo e Konifelenisi Lahi Fakataʻu hono 183 ʻi he ʻaho 7 ʻo ʻEpeleli 2013, “Kuo ongo ki hotau lotó pea kuo fakamālohia ʻetau fakamoʻoni ki hono fakaʻotua ʻo e ngāué ni, ʻi heʻetau ongoʻi e Laumālie ʻo e ʻEikí. ʻOfa ke tau manatua fuoloa e ngaahi meʻa kuo tau fanongoa he ongo ʻaho ʻe ua ne toki ʻosí.”
Ne laka hake ʻi ha kakai ʻe toko 100,000 ne nau maʻu ʻa e ngaahi fakatahaʻanga ʻe nima ʻo e konifelenisi lahí ʻi he Senitā Konifelenisí ʻi Sōleki Siti, ʻIutā, USA, he ʻaho 6 mo e 7 ʻo ʻEpelelí. Naʻe mamata ha lauimiliona ʻi he funga ʻo e māmaní pe fanongo ʻi he TV, satelaité, leitoó, pe ngaahi fakamafola he ʻInitanetí. Naʻe lava ʻa e kāingalotu ke maʻu ʻa e konifelenisí ʻi ha ngaahi lea fakafonua ʻe 95 ʻi he ngaahi fakamafola mo e vitiō ʻi he ʻinitanetí, ongó, pea mo e fakamatala tohí.
Naʻe fakaava ʻe Palesiteni Monisoni e konifelenisi fakataʻú ʻaki hano fanongonongo ha palani ke langa ha ongo temipale ʻi Sita Siti, ʻIutā, USA pea mo Lio Ti Senelo, Palāsila—ko e temipale ʻaki ia hono 29 kuo fanongonongo pe ʻoku lolotonga langa. ʻOku lolotonga ngāue he taimí ni ha temipale ʻe 141.
Naʻe fai ha ngaahi liliu ki he niʻihi ʻo e kau taki ʻo e Siasí he lolotonga e fakataha ʻi he hoʻatā Tokonakí. Naʻe tukuange kotoa ʻa e kau mēmipa ʻo e kau palesitenisī lahi ʻo e Kau Finemuí, pea tukuange mo ʻEletā Uolotā F. Konisālesi mei he mēmipa ʻi he Kau Palesitenisī ʻo e Kau Fitungofulú. Naʻe tukuange foki mo ha kau Fitungofulu Fakaʻēlia ʻe toko nimangofulu mā taha.
Naʻe hikinimaʻi ʻa ʻEletā ʻUlise Soalesi ʻo e Kolumu ʻUluaki ʻo e Kau Fitungofulú ko ha mēmipa ʻo e Kau Palesitenisī ʻo e Kau Fitungofulú.
Ko kinautolu naʻe fokotuʻu ko e kau palesitenisī lahi foʻou ʻo e Kau Finemuí ko Bonnie Lee Green Oscarson, ke palesiteni; Carol Foley McConkie, tokoni ʻuluaki; pea mo Neill Foote Marriott, ke tokoni ua.
Naʻe hikinimaʻi foki mo ha kau mēmipa foʻou ʻe toko tolu ʻo e Kōlomu ʻUluaki ʻo e Kau Fitungofulú: ʻEletā ʻEtuate Tupe ʻo Simipāpué; ʻEletā S. Kīfooti Nilaseni ʻo Sukaleni, Tekisisi, USA; mo ʻEletā ʻAunofo Valenisuela ʻo Kueletalo, Mekisikoú. Naʻe hikinimaʻi foki mo ha kau mēmipa ʻe toko nima ʻo e Kōlomu hono Ua ʻo e Kau Fitungofulú.
Naʻe ngāue ʻa ʻIleini S. Tolotoni, ʻa e palesiteni lahi kimuʻa ʻo e Kau Finemuí, ʻi he kau palesitenisī lahi ʻo e Kau Finemuí, ko ha tokoni pe palesiteni ʻi ha taʻu ʻe 11 kimuʻa pea toki tukuange ʻi ʻEpelelí.
Vakai ki he lisi kakato ʻo e ngaahi fokotuʻú mo e tukuangé ʻi he peesi 26.
Maʻu e piokālafi ʻo e kau taki ne toki uiuiʻí ʻo kamata he peesi 139.