Mālōlō ʻa ʻEletā Eldred G. Smith ʻi hono taʻu 106
Naʻe mālōlō he ʻaho 4 ʻo ʻEpeleli 2013 ʻa ʻEletā ʻElituleti G. Sāmita ne hoko ko ha Pēteliake ki he Siasí mei he 1947 ki he 1979, ʻi hono ʻapí. Naʻe taʻu 106.
ʻOku pehē ne moʻui ʻa ʻEletā Sāmita ʻo lōloange ʻi ha toe Taki Māʻolunga kimuʻa, pea ʻoku fai e tui ko e tangata toulekeleka taha ia ʻi ʻIutaá.
Naʻe ʻaʻahi ʻa e Palesiteni ʻo e Siasí, Tōmasi S. Monisoni kia ʻEletā Sāmita ʻi hono ʻaho faʻeleʻi fakamuimui tahá, he ʻaho 9 ʻo Sānuali 2013. Naʻe pehē ʻe Palesiteni Monisoni, “Ko ʻEletā Sāmitá ko hoku kaungāmeʻa lelei. Kuó ma faʻa fononga lōloa fakataha. ʻOku ou ʻofa mo fakaʻapaʻapaʻi e tangatá ni.”
Naʻe ui ʻa ʻElituleti G. Sāmita ko e Pēteliake ki he Siasí ʻi he ʻaho 10 ʻo ʻEpeleli 1947, ʻe he Palesiteni ʻo e Siasí he taimi ko iá ko Siaosi ʻAlipate Sāmita pea ko e tokotaha fakamuimui taha ia ke ne fua e fatongia ko iá. Naʻe ʻoange ke ne maʻu e tuʻunga mālōlō ʻi he 1979. Naʻe kamata ʻa e tuʻunga ko iá ʻi he 1833 ʻi hono ui ʻa Siosefa Sāmita ko e Lahí, tamai ʻa e Palōfita ko Siosefa Sāmitá. Ko ʻEletā Sāmitá ko e mokopuna tolu ia ʻo e tokoua ʻo e Palōfitá, ko Hailame.
Lolotonga ʻene hoko ko e Pēteliake ʻo e Siasí, ne fononga ʻa ʻEletā Sāmita ki ha ngaahi feituʻu lahi he māmaní ʻo ne foaki ha ngaahi tāpuaki fakapēteliake lahi ʻi he ngaahi feituʻu naʻe ʻikai ke ʻi ai ha pēteliaké. Naʻe folau ʻi he 1966 mo ʻEletā Monisoni ki ʻAositelēlia mo Haʻamoa ke foaki ha ngaahi tāpuaki fakapēteliake ki he kāingalotu ʻi aí. Ko e fuofua taimi ia ki ha pēteliake pule ke faifaiangé pea ʻaʻahi ki Haʻamoa. Ko e lahi taha ʻo e ngaahi siteikí he ʻahó ni ʻoku ʻi ai ha pēteliake ʻoku nofo ʻi he lotoʻi siteikí.
Naʻe fakatou malanga ʻa Palesiteni Monisoni mo ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he meʻafakaʻeiki ʻo ʻEletā Sāmitá. Naʻe lau ʻe Palesiteni Monisoni ha tohi fie-kaungāmamahi mo e fāmilí mei he Kau Palesitenisī ʻUluakí, peá ne toki tānaki atu, “Kuo mole fakataimi haku kaungāmeʻa lelei.”
Naʻe lea ʻa ʻEletā Pālati, ko ha mokopuna tolu foki ia ʻo Hailame Sāmita, fekauʻaki mo e ngaahi tokoni ʻa ʻEletā Sāmita ʻi hono pukepuke e hisitōlia honau fāmilí. Naʻá ne pehē, “ʻOku tau fakamanatua ia ko e Pēteliake ʻo e Siasí mo e pēteliake ʻo homau fāmilí.” Naʻá ne toe pehē naʻá ne ʻilo ne ongoʻi ʻe ʻEletā Sāmita ko ʻene lavameʻa lahi tahá ko hono fāmilí.
Naʻe mali ʻa ʻElituleti Sāmita mo Sini ʻOtilī Nesi ʻi he 1932; naʻe ʻi ai ʻena fānau ʻe toko nima. Hili e pekia hono uaifí ʻi Sune 1977, naʻá ne mali leva mo Hotenisi Saila; naʻe hoko he taimi ko iá ko ha tokoni ʻi he kau palesitenisī lahi ʻo e Kau Finemuí. Naʻe mālōlō ʻi Mē 2012.
ʻOku kei moʻui ha ongo foha ʻo ʻEletā Sāmita mo ha ʻofefine ʻe ua (kuo mālōlō hano ʻofefine ʻe taha), makapuna ʻe toko 22 (toko ua ai kuó na ʻosi mālōlō), makapuna ua ʻe toko 63, mo e makapuna tolu ʻe toko 22.
Ko e fakamatalá ni ne ʻomi ia ʻe Gerry Avant.
Ko e ʻaʻahi ʻa Palesiteni Tōmasi S. Monisoni, ʻi toʻomataʻú, kia ʻEletā ʻElituleti G. Sāmita, ʻa ia naʻe hoko ko e Pēteliake ki he Siasí mei he 1947 ki he 1979, ʻi he hoko hono taʻu 106, ʻaho 9 ʻo Sānuali 2013. Naʻe mālōlō ʻa ʻEletā Sāmita ʻi he ʻaho 4 ʻo ʻEpelelí ʻi hono ʻapí.
Faitaaʻi ʻe Gerry Avant, Church News