ʻEletā Randy D. Funk

ʻO e Kau Fitungofulú

Kuo moʻui ʻaki ʻe ʻEletā Lenitī Tenisi Fanga ʻo e Kōlomu hono Ua ʻo e Kau Fitungofulú e foʻi tefitoʻi moʻoni mālohi ko ʻení: “Falala ki he ʻEikí mo ʻEne leleí.”

Lolotonga e taʻu hono tolu ʻo ʻene ʻi ha ako laó, kuo feitama hono uaifí ʻi heʻena pēpē fika uá pea ko e tokoni ʻētita ia ʻi he vakaiʻi ʻo e laó, feʻunga mo e hoko mai ʻa e ui ke hoko ko e palesiteni ʻo e kōlomu ʻo e kaumātuʻá. Naʻá ne pehē, “Naʻá ku tali ʻa e uí ʻi he taimi faingataʻa ko ʻení mo lotu ki he Tamai Hēvaní ke ne fakakakato e toengá. Naʻá ku fie maʻu tokoni ke fakahoko hoku fatongiá, fakaʻosi lelei ʻeku akó, maʻu ha ngāue, mo tauhi hoku kiʻi fāmili kei foʻoú. Ko e ngaahi tāpuaki ne mau maʻú ne ope atu ia ʻi he meʻa ne mau taau mo iá. Naʻe ʻomi ʻe he aʻusia ko iá kiate au ha tui lahi ki he lelei ʻa e ʻEikí pea mo ʻEne ngaahi tāpuaki kiate kinautolu ʻoku feinga faivelenga ke tauhi kiate Iá.”

Naʻe fāʻeleʻi ia ʻi ʻAokosi 1952 kia C. Tenisi mo Lepeka Fanga, tupu hake ʻi Manitai ʻi ʻIutā; Metisoni ʻi Uisikonisini; mo Simififila ʻi ʻIutā, USA. Naʻá ne siofi e ngāue faivelenga ʻene tangataʻeikí ʻi he Siasí pea naʻe akoʻi ia ki hono mahuʻinga ʻo e fakahoko e ngaahi fatongia ʻo e lakanga fakataulaʻeikí.

Hili ʻene ngāue fakafaifekau ʻi ʻInitonēsiá, ne mali mo ʻEnitulia Kalaiti he ʻaho 29 ʻo Mē 1976, ʻi he Temipale Lōkani ʻIutaá. Ko e mātuʻa kinaua ʻa ha fānau ʻe toko ono. Naʻe maʻu ha mataʻitohi ʻo ʻEletā Fanga ʻi he hisitōliá mei he ʻUnivēsiti ʻo e Siteiti ʻo ʻIutaá pea mo hono mataʻitohi Toketā Lao mei he ʻUnivēsiti ʻo ʻIutaá. Ko ha maʻu ʻinasi ia ʻi ha kautaha lao lahi ʻi Tenivā ʻi Kololato, ki muʻa pea ngāue taimi kakato ki he Siasí, ʻa ia naʻe kamata ʻi hono ui ia ko e palesiteni ʻo e Misiona ʻInitia Pangikaloá he 2010.

“[Ko e taimi ne ma ō ai ki ʻInitiá, naʻá ma falala ki he folofola ʻa e Fakamoʻuí: ‘Pea ko e tahá, ʻoku ou pehē kaite koe, ʻilonga ʻa kinautolu te ke fekauʻi atu ʻi hoku hingoá, ʻi he leʻo ʻo ho kāinga ko e Toko Hongofulu Mā Uá, ʻa ia kuo fakaongoongoleleiʻi mo fakamafaiʻi totonu ʻe kimoutolú, te nau maʻu ʻa e mālohi ke fakaava ʻa e matapā ʻo hoku puleʻangá ki ha puleʻanga pē ʻa ia te mou fekauʻi atu ʻa kinautolu ki aí’ (T&F 112:21).” Kuo ʻosi hoko ʻa ʻEletā Fanga ko ha palesiteni ʻo e kōlomu ʻo e kaumātuʻá, palesiteni ʻo e Kau Talavoú, pīsope, palesiteni fakasiteiki, mo e Fitungofulu Fakaʻēlia.