ʻOku Fie Maʻu ʻe he Siasí e Fakapotopoto mo e Taukei ʻa e Mātuʻa Mali Matuʻotuʻá

ʻOku toe fie maʻu lahi foki e mātuʻa mali matuʻotuʻá ʻi he ngaahi misiona he funga ʻo e māmaní, neongo e tokolahi ange ʻo e kau faifekau kei talavoú tuʻunga ʻi hono tukuhifo e taʻu ngāue fakafaifekaú. ʻI he toki fokotuʻu ko ʻeni e misiona foʻou ʻe 58, ʻe fie maʻu ha kau faifekau mali matuʻotuʻa tokolahi ange ke nau ʻomi ʻe taukei fakatakimuʻá mo e ngaahi tokoni kehe ʻoku mātuʻaki mahuʻinga ki he ola lelei ʻa e ngāue fakafaifekaú.

ʻI he konifelenisi ʻo ʻEpeleli 2013, ne meʻa ai ʻa Palesiteni Tōmasi S. Monisoni fekauʻaki mo e tupu vave e tokolahi ʻo e kau faifekaú mo fakahaaʻi ʻene ʻofa kiate kinautolu ʻoku loto fiemālie ke ngāue maʻá e ʻEikí ʻi he malaʻe ʻo e ngāue fakafaifekaú (vakai, peesi 4, 66). Naʻe hanga ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo fakatefito ʻene poupoú ki he kakai mali matuʻotuʻá ke nau ngāue. Naʻá ne pehē, “Ko kimoutolu mātuʻa mali matuʻotuʻá, mou palani ki he ʻaho te mou lava ai ʻo ngāue fakafaifekau. Te mau fakahoungaʻi lahi hoʻomou tokoní” (vakai peesi 45).

Naʻe pehē ʻe Palesiteni Monisoni ʻi he ngaahi fuofua momeniti ʻo e konifelenisi lahi ʻo ʻOkatopa 2012: “ʻOku kei hoko atu ʻetau fie maʻu ha ngaahi hoa mali matuʻotuʻá. Fakatatau mo homou tūkungá, mo hoʻomou ʻatā ke maʻu vāhenga mālōloó pea mo hoʻomou moʻui leleí, ʻoku ou poupou atu ke mou fakaʻataʻataaʻi kimoutolu ke ngāue fakafaifekau taimi kakato. ʻE fakatou maʻu ʻe he husepānití mo e uaifí ha fiefia lahi ange ʻi heʻena ngāue fakataha ʻo tokoniʻi e fānau ʻa ʻetau Tamaí” (“Talitali Lelei ki he Konifelenisí,” Ensign pe Liahona, Nōvema 2012, 5).

Kuo taʻu lahi hono poupouʻi ʻe he kau taki ʻo e Siasí ʻa e kakai mali matuʻotuaʻá ke nau ngāue. Naʻe pehē ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku fie maʻu ʻe he ngaahi misiona he feituʻu kotoa ha ngaahi mātuʻa hoa mali. ʻOku hanga ʻe he fakapotopoto mo e taukei ʻa e ngaahi hoa mali matuʻotuʻá ʻo ʻai ke nau lava ʻo akoʻi ʻa e kau taki fakafeituʻú mo fakamālohia e kāingalotú pea mo e kakai taʻe-siasí foki ke nau omi kia Kalaisi.” (“Missionary Couples—Trading Something Good for Something Better,” Ensign, Sune 1988, 9, 11).

ʻOku poupouʻi ʻa e mātuʻa mali moʻui tāú ke nau hoko ko ha kau faifekau pea ʻoku poupouʻi ke nau fakahā ki heʻenau kau pīsopé pe kau palesiteni fakakoló ʻa ʻenau fakaʻamu ke ngāué. ʻE lava ke nau ngāue ʻi ha vahaʻataimi ko e mahina ʻe 6 ki he 23.

Ko kinautolu ʻoku ʻi ai haʻanau fehuʻi fekauʻaki mo e ngāue fakafaifekau taʻu matuʻotuʻá, telefoni ki he 1-800-453-3860, ext. 2-6741 (pe 1-801-240-6741), pe ʻīmeili ki he SeniorMissionaryServices@ldschurch.org ke maʻu ha tali ki haʻanau ngaahi fehuʻi pau.

ʻOku hanga ʻe he fakapotopoto mo e taukei ʻa e ngaahi hoa mali matuʻotuʻá ʻo akoʻi ʻa e kau taki fakafeituʻú mo fakamālohia e kāingalotú pea mo e kakai taʻe-siasí foki ke nau omi kia Kalaisi.