ʻEletā Terence M. Vinson
ʻO e Kau Fitungofulú
Ko ʻEletā Telanisi M. Vinisoní, ʻa ia naʻe toki uiuiʻi foʻou ki he Kolomu hono Ua ʻo e Kau Fitungofulú, naʻe teʻeki ai fanongo ia he foʻi lea Māmongá kimuʻa peá ne toki fetaulaki mo Kei Ane Kāteni ʻi he konga ki muʻa ʻo e 1970 ʻi Senē, ʻi ʻAositelēlia. Naʻe talanoa ʻa e ongomeʻá ni ki he tui fakalotú pea aʻu ʻo na felotoi. Ko e Sāpate kotoa pē, te na fakatou maʻulotu ʻi he siasi ʻo Telanisí pea mo ha kiʻi kolo ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e kulupu ʻe taha naʻe lotu ia ʻi ha fulu fale lahi fakaʻofoʻofa, ka ko e kulupu ʻe tahá naʻe lotu ia ʻi ha feituʻu naʻe totongi he ko e meʻa ia naʻe lava ʻo maʻu ʻe he Kāingalotu tokosiʻi ko ʻeni ʻo e Ngaahi ʻAho Kimui Ní.
Kae hili pē ha taimi nounou, “kuo fakamā ʻa e fakafehoanakí,” pea kamata leva ke tali ʻe Telanisi ʻa e lēsoni fakafaifekaú. Naʻe lahi ʻene ngaahi fehuʻí. Pea lolotonga haʻane ʻi ha konifelenisi fakasiteiki, naʻá ne ongoʻi ha pōpoaki ʻo mahino tatau pē mo e anga hono fakahokó. Naʻa ne pehē, “Naʻá ku fie kau ki he Siasí kau lava ʻo fakalakalaka. ʻE lava ʻo tali e ngaahi fehuʻi kotoa naʻá ku maʻú.”
Naʻe papitaiso ia ʻi he uike hono hokó.
Naʻe fāʻeleʻi ʻa Telanisi Maikolo Vinisoni ʻi Senē ʻi ʻAositelelia ʻi Māʻasi 1951 kia Sione Lolenisi mo Mei Telesa A. Vinisoni. Naʻe feilaulau ʻene tamaí, ʻa ia naʻe hoko ko ha taha tāmate afi, kae lava ʻene fānau ʻe toko fitú ʻo ako.
Naʻe maʻu ha mataʻitohi BA ʻo ʻEletā Vinisoni ʻi he fiká mei he ʻUnivēsiti ʻo Seneé pea mo ha tipiloma fakafaiako mei he Kolisi Fakafaiako ʻo Seneé. Naʻe toe maʻu foki haʻane tipiloma he palani ʻo e meʻa fakapaʻangá mei he ʻUnivēsiti Teakiní mo ha mataʻi tohi MA ʻi he ngāue fakapaʻangá mei he ʻUnivēsiti Maukalí. Lolotonga ʻo ʻene ngāué, naʻe ʻiloa ia ko ha taha faiako, lea, mo ʻetivaisa fakapaʻanga ʻiloa pea naʻá ne puleʻi ha kautaha palani fakapaʻanga mo fakahū paʻanga.
Naʻá ne mali mo e Kei ʻAne, ʻa e fefine naʻá ne fakafeʻiloaki ia ki he ongoongoleleí, ʻi he ʻaho 2 ʻo Mē 1974, ʻi Senē, pea naʻe silaʻi ʻa e ongomatuʻá ni ʻi he ʻaho 23 ʻo ʻAokosi 1975, ʻi he Temipale Hēmilitoni Nuʻu Silá; ʻoku ʻi ai ʻena fānau ʻe toko ono. Teʻeki ʻosi ha taʻu ʻe tolu ʻo ʻene papitaisó, kuo ui ʻa ʻEletā Vinisoni ko e pīsope. Kuó ne ʻosi ngāue ʻi he kau palesitenisī fakasiteikí pea hoko ko ha fakafofonga fakavahelahi mo e Fitungofulu Fakaʻēlia.