Carol F. McConkie

Tokoni ʻUluaki ʻi he Kau Palesitenisī ʻo e Kau Finemuí

Talu mei he kei siʻi ʻa Kalo Foli Makongikī, mo ʻene “fakaʻānaua ki he Temipalé.” Kuo tataki ʻe he tokanga ko iá ʻene ngaahi tōʻongá ʻi heʻene moʻuí kotoa.

Naʻe fāʻeleʻi ia ʻi ʻEpeleli 1952 ʻi Sipoukeini ʻi Uāsingatoni, USA, kia Uiliami mo Soana W. Foli, naʻe kei tō-tuʻu pē ʻa Sisitā Makongikī ʻi he taimi naʻe tukituki atu ai e ongo faifekaú he matapā ʻo ʻene ongomātuʻá ʻi Uilimingitoni ʻi Telaueá, ʻo fakafeʻiloaki ai hono fāmilí ki he ongoongoleleí. Naʻe tali vave ʻe heʻene ongomātuʻá ʻa e ngaahi akonakí neongo ʻa e fakafepakí mo e pau ke fai ha liliu heʻenau tōʻonga moʻuí.

Naʻe fononga mo hono fāmilí ʻi heʻene kei siʻí ʻi ha lēlue ʻo kolosi ʻi he fonuá ke silaʻi ʻi he Temipale Manitai ʻIutaá.

Naʻá ne pehē, “[Ko ha aʻusia mātuʻaki fakafiefia ia. ʻOku ou manatuʻi ʻeku teunga hiná pea mo e mahuʻinga ʻo e meʻa ko iá ki hoku fāmilí. Ko ha aʻusia mahuʻinga moʻoni, pea neongo naʻá ku fuʻu kei siʻi, ʻoku ou kei manatuʻi ʻa e ongo naʻá ku maʻú, ʻa e hinaekiakí, mo e fakaʻofoʻofa ʻo e ʻaho ko iá. Naʻe ʻomi ʻe he aʻusia ko iá ʻa ʻeku fuofua fakaʻamu ke pukepuke maʻu pē temipalé ʻi heʻeku moʻuí].”

Naʻe hoko ʻa e temipalé ko ha fakaʻilonga ʻo e ʻamanaki lelei lolotonga e ngaahi taimi faingataʻá ʻi he taimi naʻá ne maʻu fāmili aí.

Naʻe fetaulaki mo hono husepānití, ʻOsikā Uolotā Makongikī III, he lolotonga ʻo ʻena ako he ʻUnivēsiti Fakasiteiti ʻo ʻAlesoná. Naʻe maʻu ʻe Sisitā Makongikī hono BA ʻi he ako lea faka-Pilitāniá. Naʻá na mali he ʻaho 22 ʻo Tīsema 1973, ʻi he Temipale Mesa ʻAlesoná pea ko e mātuʻa kinaua ki ha fānau ʻe toko fitu.

ʻI he taimi ne ui ai ko e tokoni ʻuluaki ʻi he kau palesitenisī lahi ʻo e Kau Finemuí, ne lolotonga hoko ʻa Sisitā Makongikī ko e mēmipa ʻo e poate lahi ʻo e Kau Finemuí. Ko e lahi taha ʻo ʻene ngāue ʻi he Siasí naʻe ʻi ha ngaahi fatongia ia fekauʻaki mo e faiakó, pea ʻi heʻene hoko ko e palesiteni ʻo e Kau Finemuí ʻi he uōtí, mo e tokoni ʻi he kau palesitenisī ʻo e Fineʻofá mo e Palaimelí. Naʻe ngāue mo hono husepānití ʻi heʻene palesiteni he Misiona Kalefōnia Seni Hōseí mei he 2005 ki he 2008.