Neill F. Marriott

Tokoni Ua ʻi he Kau Palesitenisī Lahi ʻo e Kau Finemuí

Ki muʻa pea toki kau ʻa Nila Fitu Melioti ki he Siasí, naʻá ne ʻilo kei siʻi pē ʻe ia ʻoku ʻi ai ha ʻOtua ʻoku ʻofa mai kiate ia.

Naʻe pehē ʻe he tokoni foʻou ʻi he kau palesitenisī lahi ʻo e Kau Finemuí, “Ko ʻeku tamaí ko e sīpinga ia ʻa ʻetau Tamai Hēvaní. Naʻe ʻikai ha ngataʻanga ʻo ʻene ʻofa mo tali e niʻihi kehé. Ko e kiʻi fulihi siʻi pē ʻo e ʻofa mo e falala naʻá ku maʻu ki heʻeku tamai fakamāmaní ke u falala mo ʻofa ai ʻi heʻeku Tamai Hēvaní.”

Naʻe fāʻeleʻi ia kia Siaosi mo ʻAnitonia Futi ʻi ʻOkatopa 1947 ʻi ʻAlekisanitulia ʻi Luisiana, USA, ko e toufefine pē ia ʻe taha ki ha kau tautehina ʻe toko ono. Hili ʻene ʻosi mei he ʻUnivēsiti Saute Metotisi ʻi Tālasi, Tekisisi mo ha mataʻitohi ʻi he talanoa Faka-Pilitāiná mo e ako lautohi puleʻangá, ne hiki leva ki Kemipilisi ʻi Masasūseti, ʻo ne ngāue ai ko ha sekelitali ʻi he ʻUnivēsiti Hāvatí. Naʻe fetaulaki ai mo Tēvita Kēnoni Melioti, ʻa ia naʻá ne talange ki ai, “ʻOku ʻi ai haku ngaahi kaungāmeʻa ʻoku ou loto ke ke feʻiloaki mo kinautolu.” Naʻe ʻikai hano taimi kuó ne ʻomi ʻa e ongo faifekaú ke akoʻi ia mo hono kaungālokí.

Naʻá ne pehē ko e taimi naʻe fanongo ai ki he ongo faifekaú, “naʻe fakafonufonu ʻe he ngaahi lēsoní ʻa e ngaahi konga ne mole mei heʻeku mahino ki he ongoongoleleí.” Hili hono papitaiso ʻi Mē 1970, ne na kei kaungāmeʻa pē mo Tēvita; pea ʻosi ha taʻu ʻe taha, ne na kamata teiti leva peá na mali ʻi Sune 1971 ʻi he Temipale Sōlekí.

Naʻe ngāue fakataha ʻa Sisitā Melioti mo hono husepānití, ʻo ne nofo pē ʻi ʻapi ʻo tokangaʻi ʻena fānau ʻe toko 11 kae ngāue fakapisinisi ia. Kuó na ʻosi ngāue ʻi ha ngaahi uiuiʻi fakasiasi lahi. Naʻe ngāue mo ia ʻi heʻene hoko ko e palesiteni ʻo e Misiona Sao Paulo ʻInitalakó mei he 2002 ki he 2005, pea kuó ne ʻosi hoko ko e taha ngāue ouau ʻi he Temipale Sōlekí, ʻosi hoko ko ha palesiteni fineʻofa ʻi he siteikí mo e uōtí, ko ha palesiteni Finemui ʻi he uōtí, faiako ʻo e Tokāteline ʻo e Ongoongoleleí, mo ha mataotao he fakatolonga ʻo e meʻatokoní.

ʻOku ʻamanaki ʻa Sisitā Melioti ʻi hono fatongia foʻoú, ke ne vahevahe ʻa e fakamoʻoni tatau naʻá ne maʻu ʻi heʻene kei finemuí. ʻOkú ne fie maʻu ʻa e kau finemuí ke nau ʻilo, “ʻoku ʻofaʻi kinautolu ʻe heʻenau Tamai Hēvaní ʻi he ʻofa moʻoni mo nāunauʻia tahá.”