ʻEletā Edward Dube

ʻO e Kau Fitungofulú

Naʻe fakafeʻiloaki ʻa ʻEletā ʻEtuate Tupe ki he ongoongoleleí ʻi he 1981 ʻe ha taha naʻe ngāue ki ai ʻi hono ʻapí. Naʻe ʻoange ʻe he tangatá ha tatau ʻo e Tohi ʻa Molomona. Naʻá ne toki lau pē ia ʻi he 1983 pea naʻe ongo moʻoni ki ai ʻa e fakamoʻoni ʻa Siosefa Sāmita ki he ʻaʻahi mai ʻa Molonaí ʻo ne tali ai e fakaafe ke maʻulotu ʻi ha houalotu ʻaukai mo e fakamoʻoni ʻi ha falelotu ʻi Kueki, ʻi Simipāpué.

Naʻe ʻikai ke ne ongoʻi lata he kamataʻangá, he naʻá ne ongoʻi ʻoku ʻi ha tuʻunga fakatamaioʻeiki ki he tokolahi ʻo kinautolu naʻe ʻi he lotú.

ʻOkú ne manatuʻi, “Ka ʻi heʻenau fai ʻenau fakamoʻoni ki he Tohi ʻa Molomoná, naʻá ku ongoʻi ha faʻahinga fetuʻutaki mo e kakaí ni. Pea naʻá ku lava ʻo vahevahe ʻeku ngaahi ongo ki he Tohi ʻa Molomoná.”

Naʻá ne maʻu kimui e ngaahi lēsoni fakafaifekaú, papitaiso, pea iku ngāue ʻi he Misiona Simipāpue Halalé.

Lolotonga ʻe taimi ko iá, naʻá ne akoʻi e fāmili ʻo Naume Kelesia Salasaní, naʻe kei taʻu 16 pē. Naʻe hoko atu ʻenau mahení ʻi he ʻosi ʻene ngāue fakafaifekaú peá na mali ʻi Kueki he ʻaho 9 ʻo Tīsema 1989. Naʻe silaʻi kinaua ʻi Mē 1992 ʻi he Temipale Sohānisipeki ʻAfilika Tongá. Ko ha mātuʻa kinaua ʻa ha ngaahi ʻofefine ʻe toko tolu mo e foha ʻe toko taha.

Naʻe fāʻeleʻi ia ʻi Mē 1962 ʻi he kiʻi kolo Silumanisuú, ʻi Simipāpué, ʻia Kelemeni mo Losemalei Tupe, naʻe maʻu ʻe ʻEletā Tupe ha tipiloma ʻi he ako fakaʻatamaí mei he Kolisi Zimbabwe D. E. ʻi he 1992 pea ngāue leva ki he Polokalama Ako ʻa e Siasí, ʻi hono fokotuʻu ʻo e ngaahi semineli mo e ngaahi ʻinisititiuti fakalotu ʻi Simipāpué, Semipiá, mo Malauai. Kuo tāpuekina ia ke mamata ki ha fānau ako tokolahi naʻá ne foaki ki ai ha ngaahi tohi fakamoʻoni ako ʻi heʻenau ʻosi mei he akó, ʻi heʻenau ngāue he ngaahi tuʻunga fakatakimuʻa he Siasí ʻi he ngaahi fonua ko iá ʻi he tupu ko ʻeni ʻa e Siasí.

Naʻe ʻosi hoko ko ha palesiteni he kōlomu ʻo e kau kaumātuʻá, palesiteni fakakolo, palesiteni fakavahefonua, palesiteni fakasiteiki, tokoni ʻi he kau palesitenisī fakamisioná, pea mei he 2009 ki he 2012, ko e palesiteni ʻo e Misiona Simipāpuē Halalé. Kimuʻa pea ui ia ki he Kolomu ʻUluaki ʻo e Kau Fitungofulú, naʻe hoko ko e Fitungofulu Fakaʻēlia.