ʻEletā Adrián Ochoa

ʻO e Kau Fitungofulú

Lolotonga ʻene hoko ko e Fitungofulu Fakaʻēlia ʻi Mekisikoú, ne fakamoleki ai ʻe ʻEletā ʻEtiliane ʻŌkoa ha ngaahi ʻaho ʻi he kolo Siuāuā ke talanoa mo e palesiteni faksiteikí mo ha niʻihi kehe, pea toki heka he vakapuna ke fokí. Ka ʻi he hili ʻene nofo ʻi hono nofoʻangá, naʻá ne maʻu ha ueʻi fakalaumālie mālohi ʻoku teʻeki ʻosi ʻene ngāue ʻi Siuāuaá.

Naʻe fakahoko ʻe he kau ngāue ʻo e vaká ʻa e ngaahi teuteu fakaʻosi kae puná. Ka naʻe pehē ʻe ʻEletā ʻŌkoa, “Ka naʻaku ʻilo kuo pau ke u hifo mei he vakapuná.” Ko ia, naʻe hifo leva. Naʻe maʻu ʻi ha ngaahi ʻinitaviu ne hoko hoko atu aí ha fakamatala mahuʻinga naʻá ne fakaleleiʻi ha palopalema faingataʻa pea lava ai ke fakalakalaka fakalaumālie ha fāmili.

Naʻe teʻeki pē ke ʻosi e ngāue ʻa ʻEletā ʻŌkoa ʻi Siuāuá. Naʻe toe taki ia ʻe he Laumālié ki ha ʻapi masiva ʻo ha taha ʻokú ne tokoua ʻaki ka kuo teʻeki ai toe sio ki ai ʻi ha ngaahi taʻu lahi. Naʻá ne maʻu e taha ko ʻeni ʻokú ne tokoua ʻakí, ʻa ia kuo fuoloa ʻene pulí—ko ha mēmipa māmālohi—mo hono kiʻi fāmilí ʻi ha feituʻu masiva. Naʻá ne pehē, “[Naʻá ku ʻilo ko e Siasí mo Kalaisi honau tokoní. Naʻá ku kole ki hoku tokouá ni ke foki ki he siasí].”

Naʻe foki mai e taha ʻokú ne tokoua ʻakí ʻo mālohi, pea naʻe toe fakahoko ai ha fetuʻutaki fakafāmili mahuʻinga. Naʻe lava ke fakahaofi ʻe he ʻEikí ha ngaahi moʻui lahi ʻi Siuāuā koeʻuhí he naʻe talangofua ha tangata ki he ngaahi ueʻi ʻa e Laumālié.

Naʻe fakamoʻoniʻi ʻe ʻEletā ʻŌkoa, ʻoku tau maʻu kotoa ʻa e totonu ki he faʻahinga ueʻi fakalaumālie liliu moʻui peheé, pea kuó ne ʻosi ngāue ʻi ha ngaahi uiuiʻi fakasiasi kehekehe he lolotonga ʻo ʻene ngāue ʻi he tafaʻaki ʻo e tuʻuakí. Naʻá ne palesiteni ʻi he Misiona Honitulasi Seni Petuloó mei he 2004 ki he 2007 pea mei he 2009 ʻo aʻu ki hono ui ia ki he Kōlomu hono Ua ʻo e Kau Fitungofulú, naʻá ne ʻosi hoko ai ko e tokoni ua ʻi he kau palesitenisī lahi ʻo e Kau Talavoú.

Naʻe fāʻeleʻi ia ʻi Māʻasi 1954 ʻi Seni Felenisisikou ʻi Kalefonia, USA, kia ʻEtuate mo Konisuelo ʻŌkoa, ʻo ne tupu hake ai ʻi Kalefōnia mo Mekisikou fakatouʻosi. ʻI heʻene kei talavoú, naʻe ui ia ke ngāue fakafaifekau ʻi he fetuʻutaki mo e kakaí ʻi Mekisikou. Naʻe silaʻi ia mo hono uaifi ko Nenisī Vilalelí, ʻi he Temipale Mekisikou Sití. Ko e mātuʻa kinaua ʻa ha fānau ʻe toko nima.