ʻOku Tokoni e Ngaahi Nāunau Foʻou ʻi he ʻInitanetí ʻi hono Maluʻi mo Vahehvahe ʻa e Ngaahi Tā mo e Ngaahi Manatu Fakafāmilí
ʻE fakatokangaʻi ʻe he kau ʻaʻahi ki he FamilySearch.org ha ngaahi liliu lalahi ne kamata ʻi ʻEpeleli 2013. ʻOku ʻomi ʻe he ngaahi lanu māmá, ngaahi fakatātā fakaʻofoʻofá, mo ha ngaahi fōtunga foʻou kehe ha ngaahi aʻusia kehekehe ʻo fakalaka atu ʻi he fekumi pē. Neongo ʻe fakamānako e uepisaití ki he kau tohi-hohokó mo e kau fakatotoló, ʻe tohoakiʻi ʻe he ngaahi fōtunga foʻoú ha kau ʻaʻahi tokolahi ange.
ʻE tokoni ʻa e ngaahi fōtunga foʻou ko ʻení ke ʻunuaki e hisitōlia fakafāmilí ʻo fakalaka atu ʻi he fakatotoló pea tohoakiʻi mai ha kau taukei hisitōlia fakafāmili kei talavou mo matuʻotuʻa fakatouʻosi. ʻOku lava he taimí ni ʻe kinautolu ʻoku ō ki aí ʻo fokotuʻu honau laine fakafāmilí mo maluʻi mo vahevahe ʻa e ngaahi tā pea mo e ngaahi talanoa fakafāmilí—taʻe totongi kotoa.
ʻOku toe fakamoʻui mai ʻe he ngaahi tā mo e ngaahi talanoa fakafāmilí ʻa e ngaahi kuí. ʻOku akoʻi kitautolu ʻe he kakai moʻoni ko ʻeni ʻoku fakafofongaʻi ʻaki pē ngaahi ʻahó ʻa e ngaahi tefitoʻi moʻoni hangē ko e mahuʻinga ʻo e ngāue mālohí, founga ke fefaʻuhi ai mo e ngaahi faingataʻa ʻo e moʻuí, mo e anga hono uesia ʻe he ngaahi filí ʻetau moʻuí.
ʻOku fakafaingofua ange ai ke lekooti mo maluʻi ʻa e ngaahi hisitōlia fakafāmilí mo tokoni ke tau fehokotaki mo hotau hisitōliá mo faʻu ha tukufakaholo ki he kahaʻú.
Ngaahi Fōtunga Foʻou ʻi he FamilySearch.org
FamilySearch Family Tree. Ko e fuofua taimi ʻeni ʻi he FamilySearch.org, ke lava ai ʻa e fakafoʻituituí ʻo kamata ʻo fevahevaheʻaki kakato honau laine fakafāmilí ʻi he ʻinitanetí, ʻo kamata ʻaki hano tānaki atu ha fakamatala fekauʻaki mo kinautolu tonu pea toki fakalahi ki he ngaahi toʻu tangata he kuo hilí.
Ngaahi meʻa mahuʻinga ʻi he Laine Fakafāmilí:
-
Maʻu ia ʻi he FamilySearch.org ʻi he konga ki he “Family Tree.”
-
ʻOku ʻosi ʻi ai ha ngaahi hingoa ʻe 900 miliona tupu ne ʻosi fakahū mai ʻe ha kau pataloni.
-
ʻOku taʻe-totongi.
-
ʻOkú ne fakafaingofuaʻi ʻa e fakafoʻituituí ke nau kaungā langa, puleʻi, mo vahevahe honau hisitōlia fakafāmili kakató ʻi he ʻinitanetí.
-
ʻE lava ke ʻilo ai e meʻa naʻe ʻosi maʻu ʻe ha niʻihi fekauʻaki mo honau hisitōlia fakafāmilí.
-
ʻE lava lelei ʻe kinautolu ʻoku nau fakaʻaongaʻí ʻo tānaki atu ki ai ha ngaahi tā mo ha ngaahi talanoa pea fakafehokotaki ʻa e ngaahi fehokotakiʻanga maʻuʻanga tokoní.
-
ʻE lava ʻe kinautolu ʻoku nau fakaʻaongaʻí ʻo maluʻi honau laini fakafāmili ʻoku vahevahé ki he ngaahi toʻu tangata ʻi he kahaʻú.
-
ʻOku hanga ʻe he founga faingofua hono “maʻu pea tohó” ʻo fakaʻatā ke hanga ʻe kinautolu ʻoku nau fakaʻaongaʻí ʻo hiki faingofua pē ki ʻolunga pe ki lalo ʻi honau hisitōlia fakafāmilí.
-
ʻE lava ʻa e kau pataloní ʻo hū ki ha ngaahi lekooti ʻe lauipiliona ʻi he FamilySearch.org ke tokoni ʻi hono fakafonu e ngaahi vaʻa ʻoku kei puli ʻi Honau Laine Fakafāmilí.
Ngaahi Taá. ʻE lava foki ai ʻo maluʻi e ʻū tā ʻoku nau saiʻia ai ʻo ʻenau ngaahi kuí, fakapipiki kinautolu ki honau puipuituʻá ʻi he Laine Hisitōlia Fakafāmilí, mo vahevahe kinautolu ʻi he fetuʻutaki fakamītiá. Kuo ʻosi fakahū mai, maluʻi, mo vahevahe ha ʻū tā ʻe 200,000 tupu.
Ngaahi talanoá ʻE lava ʻe kinautolu ʻoku nau ngāue ʻaki e polokalamá ke hiki e ngaahi talanoa ʻoku nau saiʻia ai fekauʻaki mo ha kui pau ʻi he Laine Fakafāmili he FamilySearch. ʻOku ʻai ʻe he meʻá ni ke lava ʻa e ngaahi fāmilí ʻo tānaki, vahevahe, pea mo maluʻi e ngaahi talanoa honau fāmilí.
Saati Fengāueʻaki ʻa e Kakaí. Naʻe ʻahiʻahiʻi ʻe he FamilySearch ʻi he 2012 ha founga ʻokú ne ʻai ke lava ʻa e fakafoʻituituí ʻo sio kiate kinautolu pea mo ʻenau ngaahi kuí ʻi ha saati fakalanulanu fakaʻofoʻofa. Kuo ʻosi toe fakalahi ʻeni ʻa e saati ko ʻení mo ʻatā ʻi he FamilySearch.org.
Tokoni ke Kamataʻi e Laine Fakafāmilí. ʻE ʻilo ʻe kinautolu ʻoku foʻou ki hono faʻu hanau laine fakafāmilí, ʻoku ʻaonga lahi e founga ko ʻení. ʻOku fai ʻe he foungá ni ha ngaahi fehuʻi ʻi ha founga fakaʻekeʻeke fekauʻaki mo hoʻo ngaahi kui kei moʻuí mo e ngaahi kui kuo pekiá, peá ne fakafehokotaki leva ʻa e ngaahi fehokotaki ko iá ki ha laine fakafāmilí ke ke lava ʻo kamata.
Tokoni Hangatonu. ʻOku tupulaki e mahuʻingaʻia he hisitōlia fakafāmilí ʻi māmani. Kuo ʻosi kamata ʻe he FamilySearch ha kau fengāueʻaki fakamāmani lahi ʻokú ne tuku taʻe-totongi mai ha tokoni ki he nāunaú mo ha tokoni ki he fakatotolo fakafoʻituituí ʻi he telefoní mo e uepisaití houa 24 ʻi he ʻaho—ʻi ha lea fakafonua ʻeni ʻe 10.
Ngaahi Lea Fakafonuá ʻE maʻu kotoa ʻa e ngaahi founga mo e ngaahi tokoni foʻou ko ʻení ʻi ha ngaahi lea fakafonua ʻe 10. ʻOku ʻi ai ha ngaahi vitiō taʻe totongi ki he foungá pea mo ha ngaahi maʻuʻanga tokoni he ʻinitanetí ki he polokalamá kotoa. Lomiʻi ʻi he Help ke maʻu ha fakaikiiki lahi ange.
© IRI
© IRI