Hingoa ʻe Fā
Ko e ʻahó ni, ʻoku ou fie fokotuʻu atu ha hingoa ʻe fā … ʻe ala tokoni ke tau fakatokangaʻi hotau ngaahi fatongia fakafoʻituitui ʻi he palani taʻengata ʻa e ʻOtuá mo e tuʻunga te tau malava ke aʻusia ko e kau maʻu lakanga fakataulaʻeikí.
‘E hoku ngaahi tokoua mo e kaungāmeʻa ʻofeina, ʻoku fonu fakafetaʻi mo fiefia hoku lotó ke fakataha mo kimoutolu. ʻOku ou fakamālōʻia kimoutolu ngaahi tamai kuo mou ʻomi homou ngaahi fohá mo e makapuna tangatá. Fakamālō atu kiate kimoutolu kau talavou kuo mou fili ke ʻi heni he ʻahó ni. Ko e feituʻu ʻeni ke mou ʻi aí. ʻOfa ʻoku mou ongoʻi ʻa e ongoʻi fakatokoua ʻokú ne fakatahaʻi kitautolú, pea ʻoku ou fakatauange te mou lata, poupou, pea mo anga fakakaumeʻa ʻi heni he lotolotonga homou ngaahi tokouá.
Ko kitautolu tangatá ʻoku faʻa ui ʻaki ha ngaahi hingoa. Ko hatau tokolahi ʻoku lahi hotau ngaahi hingoá, pea ʻoku nau takitaha tala ha meʻa mahuʻinga fekauʻaki mo kitautolu. Hangē ko ʻení, ʻoku fakamatalaʻi ʻe ha hingoa ʻe niʻihi hotau fatongia he fāmilí, hangē ko e fohá, tokouá, husepānití, mo e tamaí. ʻOku fakamatalaʻi ʻe ha ngaahi hingoa ʻe niʻihi ʻetau ngāue ʻi māmaní, hangē ko e toketaá, sōtiá, pe taha tufungá. Pea ʻoku fakamatalaʻi ʻe ha niʻihi hotau tuʻunga ʻi he Siasí.
Ko e ʻahó ni, ʻoku ou fie fokotuʻu atu ha hingoa ʻe fā ʻoku ou tui ʻe kaunga ki he kau maʻu lakanga fakataulaʻeiki kotoa pē he funga māmaní—ko ha ngaahi hingoa ʻe ala tokoni ke tau fakatokangaʻi hotau ngaahi fatongia fakafoʻituitui ʻi he palani taʻengata ʻa e ʻOtuá mo e tuʻunga te tau malava ke aʻusia ko e kau maʻu lakanga fakataulaʻeiki ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Foha ʻo e Tamai Hēvaní
‘Oku ‘i ai ha hingoa ‘okú ne fakamatalaʻi kotoa kitautolu, ʻi ha founga mahuʻinga, ko e foha ʻo e Tamai Hēvaní. Tatau ai pē pe ko e hā hatau toe tuʻunga pe meʻa ʻoku tau fai ʻi he moʻuí, kuo pau ke ʻoua naʻa teitei ngalo ʻiate kitautolu ko e fānau fakalaumālie moʻoni kitautolu ʻa e ʻOtuá. Ne tau hoko ko ʻEne fānau ki muʻa pea tau toki omi ki māmaní, pea te tau kei hoko ai pē ko ʻEne fānau ʻo lauikuonga. ʻOku totonu ke liliu ʻe he foʻi moʻoni mahinongofua ko ʻení ʻa e anga ʻo ʻetau vakai kiate kitautolú, ki hotau ngaahi tokouá mo e tuofāfiné, pea naʻa mo e moʻuí.
Meʻapango, he ʻoku ʻikai ha taha ʻiate kitautolu ʻoku moʻui fakatatau mo e meʻa kotoa pē ʻoku fakafōtunga mai ʻe he hingoa ko ʻení, “he kuo faiangahala kotoa pē, pea tōmui ʻi he fakamālō mei he ʻOtuá.”1
ʻE lava pē ʻo fakalotofoʻi he taimi ʻe niʻihi ke ʻilo hono ʻuhinga ʻo e hoko ko e foha ʻo e ʻOtuá ka tau kei tōnounou pē. ʻOku manako ʻa e filí ke ne ngāue ʻaonga ʻaki ʻa e ngaahi ongo ko ʻení. ʻOku sai ange kia Sētane ke ke fakamatalaʻi ʻaki koe hoʻo ngaahi angahalá kae ʻikai ko e tuʻunga fakalangi te ke ala aʻusiá. Ngaahi tokoua, ʻoua te mou fanongo ki ai.
Kuo tau ʻosi mamata kotoa ʻi ha ki ʻi valevale ʻoku ako ʻalu. ʻOku kiʻi manga siʻisiʻi pea sālue. ʻOku tō. ʻOku tau ʻitangiʻi nai e faʻahinga feinga peheé? ʻIkai ʻaupito. Ko e faʻahinga tamai fēfē ia te ne tauteaʻi ha kiʻi valevale ʻi heʻene humú? ʻOku tau fakalotolahiʻi, mo fakahikihikiʻi, he ko e kiʻi foʻi laka kotoa pē, ʻoku fakaʻau ʻo tatau ange ai ʻa e kiʻi tamasiʻí mo ʻene mātuʻá.
Ko ʻeni, ʻe hoku ngaahi tokoua, fakatatau ki he tuʻunga haohaoa ʻo e ʻOtuá, ko kitautolu matelié ia ʻoku tau hangē tofu pē ko e fanga kiʻi valevale ʻoku tō mo humú. Ngaahi tokoua, ʻoku finangalo ʻetau Tamai Hēvani ʻofá ke tau hoko ʻo tatau lahi ange mo Ia, ʻoku totonu ke hoko ia ko ʻetau taumuʻa taʻengatá foki. ʻOku mahino ki he ʻOtuá he ʻikai vave ʻetau aʻu ki aí kae ʻi he foʻi laka ʻe taha he taimi kotoa pē.
ʻOku ʻikai ke u tui au ki ha ʻOtua te ne fokotuʻu ha ngaahi tuʻutuʻuni mo ha ngaahi fekau ʻo fakatatali ke tau tō ka ne tauteaʻi kitautolu. ʻOku ou tui ki ha Tamai Hēvani ʻoku ʻofa mo tokanga pea ʻoku fiefia ʻi heʻetau feinga kotoa pē ke tuʻu mo foki ange kiate Iá. Naʻa mo e taimi ʻoku tau tō-mo-humu aí, ʻokú Ne poupouʻi kitautolu ke ʻoua naʻa tau loto-foʻi—ʻoua naʻa tau teitei foʻi pe hola mei hotau tufakanga fakangāué—ka ke tau loto toʻa, maʻu ʻetau tuí, pea mo kei feinga pē.
ʻOku tataki heʻetau Tamai Hēvaní ʻa ʻEne fānaú pea ʻokú Ne faʻa fekauʻi mai ha tokoni fakalangi ʻoku ʻikai lava ʻo sio ki ai ke ne tokoniʻi kinautolu ʻoku holi ke muimui he Fakamoʻuí.
Ākonga ʻa Sīsū Kalaisi
ʻOku ʻomi ai kitautolu ki he hingoa hono hoko ʻoku tau tatau kotoa aí: ʻoku ui kinautolu kotoa ʻoku feinga faivelenga ke muimui ʻia Kalaisí ko ʻEne kau ākonga. Neongo ʻoku tau ʻiloʻi ʻoku ʻikai ha taha ʻiate kitautolu ʻe haohaoa, ka ʻoku ʻikai ke tau ngāue ʻaki e foʻi moʻoni ko iá ko ha ʻuhinga ke holoki ai ʻetau ʻamanakí, taʻe-fakaʻaongaʻi e ngaahi faingamālié, fakatoloi e ʻaho ʻo ʻetau fakatomalá, pe ke fakafisi ai mei haʻatau tupulaki ʻo hoko ko ha kau muimui lelei ange, haohaoa ange, pea mo akoʻi lelei ange ʻo hotau ʻEikí mo e Tuʻí.
Manatuʻi, ʻoku ʻikai langa ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ni, maʻá e kakai tangata mo e kakai fefine ʻoku haohaoa pe ʻikai uesia ʻe he ngaahi fakatauele fakamatelié ka, ʻoku langa ia moʻó e kakai tatau tofu pē mo kitauá. Pea ʻoku langa ia ʻi he funga maka ʻo hotau Huhuʻí, ko e ʻEiki ko Sīsū Kalaisí,2 ʻa ia ko ʻEne Fakaleleí ʻe lava ai ʻo fakamaʻa kitautolu pea tau hoko ko e “kaungā-kolo … [ʻo e] fale ʻo e ʻOtuá.”3
Ka ne taʻe-ʻoua ʻe Fakalelei ʻa Sīsū Kalaisí, ʻoku ʻikai hano ʻaonga e moʻuí, ʻo ʻikai ha ʻamanaki lelei pe kahaʻu. Ka ʻi he Fakaleleí, ʻoku langaki ai ʻa e moʻuí, ko ha fononga loto-toʻa ʻo e tupulekina mo e fakalakalaka ki he moʻui taʻengata ʻi he ʻao ʻo ʻetau Tamai Hēvaní.
Neongo ʻoku fakataumuʻa ʻa e Fakaleleí ke tokoni ke tau hoko ʻo tatau ange mo Kalaisi, ʻoku ʻikai ʻuhinga ia ke ʻai ai ke tau tatau kotoa. ʻOku tau faʻa fetoʻoaki he taimi ʻe niʻihi ʻa e ngaahi faikehekehe ʻi he ʻulungāngá mo e faiangahalá. ʻOku aʻu ki heʻetau maʻuhala ʻo pehē tokua ka kehe ha taha meiate kitautolu, ʻoku mahino ʻoku ʻikai ke nau fakahōifua ki he ʻOtuá. ʻOku taki ʻe he faʻahinga fakakaukau ko ʻení ha niʻihi ke nau tui ʻoku loto e Siasí ke oʻi ʻa e mēmipa kotoa pē ke nau tatau—tokua ʻoku totonu ke fōtunga, ongo, fakakaukau, pea mo anga tatau ʻa e taha kotoa. ʻE fehangahangai ʻeni mo e poto ʻo e ʻOtuá, ʻa ia naʻá Ne fakatupu ʻa e tangata kotoa ʻo kehekehe mei hono tokouá, ʻo kehe ʻa e foha kotoa mei heʻene tamaí. Naʻa mo e ongo māhanga tataú ʻoku ʻikai ke na faitatau ʻi hona ʻulungāngá mo e ngaahi natula fakalaumālié.
ʻOku toe fepaki foki ia mo e fakakaukau pea mo e taumuʻa ʻo e Siasi ʻo Sīsū Kalaisí, ʻa ia ʻokú ne fakamoʻoniʻi mo maluʻi ʻa e tauʻatāina ke filí—fakataha mo hono ngaahi ola taukakapa kotoa—ki he fānau kotoa ʻa e ʻOtuá. ʻI heʻetau hoko ko e kau ākonga ʻa Sīsū Kalaisí, ʻoku tau taha ʻi heʻetau fakamoʻoni ki he ongoongolelei kuo toe fakafoki maí pea mo ʻetau tukupā ke tauhi e ngaahi fekau ʻa e ʻOtuá. Ka ʻoku tau māvahevahe ʻi hotau anga fakafonuá, fakasōsialé, mo e ngaahi meʻa fakapolitikalé.
ʻOku tupulekina e Siasí he taimi ʻoku tau ngāue ʻaonga ʻaki ai ʻa e faikehekehe ko ʻení mo fepoupouaki ke fakatupulaki mo ngāue ʻaki hotau ngaahi talēnití ke hiki hake mo fakamālohia hotau kaungā ākonga.
Ngaahi tokoua, ko e moʻui fakaākongá ko ha fononga ʻi he moʻuí kotoa ʻo muimui ki hotau Fakamoʻuí. ʻI hotau hala ko ia mei Pētelihema ki Kolokotá, ʻe ʻi ai ha ngaahi faingamālie lahi ke tau siʻaki ai ʻetau fonongá. ʻE ʻi ai ha taimi ʻe niʻihi ʻe hangē ʻoku lahi ange e fie maʻu ʻa ʻetau fonongá ʻi he meʻa ne tau ʻamanaki ki aí. Ka ʻi heʻetau hoko ko e kau tangata ʻo e lakanga fakataulaʻeikí, kuo pau ke tau maʻu ʻa e lotolahi ke muimui ʻi hotau Huhuʻí ʻo aʻu ki he taimi ʻe ngali fuʻu mamafa ai hotau kolosí ki hono fuá.
ʻOfa ke tau manatuʻi ʻi he foʻi laka kotoa pē ʻoku tau fai ke muimui he ʻAlo ʻo e ʻOtuá, ʻoku teʻeki ai ke tau haohaoa. Ka ʻoku tonu ke tau hoko ko ha kau ākonga tuiaki mo vilitaki. ʻOua naʻa tau foʻi. Tau fai pau ki heʻetau ngaahi fuakavá. ʻOua naʻa ngalo ʻiate kitautolu hotau Taukapó mo hotau Huhuʻí ʻi heʻetau fononga atu kiate Iá, ʻi he foʻi laka taʻe-haohaoa kotoa pē.
Faifakamoʻui ʻo e Ngaahi Laumālié
Kāinga, kapau te tau muimui moʻoni ʻi hotau ʻEiki ko Sīsū Kalaisí, kuo pau ke tau tali mo e hingoa hono tolú: ko e faifakamoʻui ʻo e ngaahi laumālié. ʻOku ui kitautolu ko ia kuo ʻosi fakanofo ki he lakanga fakataulaʻeiki ʻo e ʻOtuá, ke tau fakaʻaongaʻi e “[founga ʻa e Fakamoʻuí].”4
Ko hotau fatongiá ke langa hake, fakaleleiʻi, fakaivia, hiki hake, pea mo fakamoʻui. Ko ʻetau ngāué ke muimui ki he sīpinga ʻa e Fakamoʻuí mo tokoni kiate kinautolu ʻoku faingataʻaʻiá. ʻOku tau “tangi fakataha mo kinautolu ʻoku tangí … mo fakafiemālieʻi ʻa kinautolu ʻoku ʻaonga ki ai ʻa e fakafiemālié.”5 ʻOku tau haʻihaʻi ʻa e kafo ʻo e faingataʻaʻiá. ʻOku tau “tokoniʻi ʻa e vaivaí, hiki hake ʻa e ngaahi nima ʻoku tautau ki laló, pea fakamālohi ʻa e ngaahi tui ʻoku vaivaí.”6
ʻOku tau hoko ko e kau faifakamoʻui ʻi heʻetau hoko ko e kau faiako fakaʻapí. ʻOku tau hoko ko e kau faifakamoʻui ʻi heʻetau hoko ko e kau maʻu lakanga fakataulaʻeikí. ʻI heʻetau hoko ko e ngaahi tamai, foha, mo e husepānití, ʻoku totonu ke tau hoko ko e kau faifakamoʻui līʻoa mo mateaki. ʻOku ʻi hotau nima ʻe tahá ha hina ʻo e lolo tapú ke tāpuakiʻi ʻa e mahakí; pea ʻi he nima ʻe tahá ha foʻi mā ke fafanga ʻa e fiekaiá; pea ʻoku ʻi hotau lotó ʻa e folofola fakanonga ʻa e ʻOtuá, “ʻoku fakamoʻui ʻa e laumālie kuo kafó.”7
Ko hotau ʻuluaki fatongia mahuʻinga taha ia ʻi heʻetau hoko ko e kau maʻu lakanga fakataulaʻeikí—pea ʻoku fakatou tatau pē ia ki he Lakanga Taulaʻeiki Faka-ʻĒloné mo e Melekisētekí. ʻOku ʻikai ngata pē ʻi hono tāpuakiʻi ʻe he ongoongolelei kuo toe fakafoki mai ʻo Sīsū Kalaisí e moʻuí ʻi he taimi pē ʻoku tau tui ki aíka ʻoku toe lahi ange ʻi he taimi ʻoku tau moʻui ʻaki ai iá. ʻOku langaki ʻa e fakafoʻituituí mo fakamālohia ʻa e ngaahi fāmilí ʻi hono moʻui ʻaki e ngaahi tefitoʻi moʻoni ʻo e ongoongoleleí. Ko hotau faingamālié mo hotau fatongiá ke ʻoua naʻa tau lea pē ka ke tau fakahoko foki ia.
Ko e Fakamoʻuí ʻa e tokotaha fakahoko ʻo e ngaahi maná. Ko ia ʻa e Fai-fakamoʻui maʻongoʻongá. Ko ia hotau faʻifaʻitakiʻangá, mo ʻetau māmá, ʻo aʻu ki he ngaahi momeniti fakapoʻuli tahá, pea ʻokú Ne fakahā mai ʻa e hala totonú kiate kitautolu.
Tau muimui muʻa kiate Ia. Tau tuʻu ʻo fua hotau fatongiá ʻo hoko ko e kau faifakamoʻuí ʻaki ʻetau tokoni ki he ʻOtuá mo hotau kāingá.
ʻEa-hoko ʻo e Moʻui Taʻengatá
Ko e hingoa hono faá, ʻokú ne fakafoki kitautolu ki he hingoa ʻuluaki ʻi heʻetau lisí. ʻI heʻetau hoko ko e ngaahi foha ʻo ʻetau Tamai Hēvaní, ʻoku tau hoko ai ko e kau ʻea-hoko ki he meʻa kotoa ʻoku ʻAʻaná.
“Pea ʻoku fakamoʻoni ʻe he Laumālie pē ko iá mo hotau laumālié, ko e fānau ʻa e ʻOtuá ʻa kitautolu:
“Pea kapau ko e fānau, pea tā ko e kau hoko; ko e kau hoko ki he ʻOtuá, pea ko e kau hoko fakataha mo Kalaisi; ʻo kapau te tau mamahi mo ia, koeʻuhí ke tau maʻu ʻa e hakeakiʻí fakataha mo ia.”8
Fakakaukau ki he meʻá ni, ngaahi tokoua ʻofeina. Ko e kaungā ʻea-hoko kitautolu mo Kalaisi!
ʻOku ʻi ai nai hano ʻuhinga lelei ke fakamoleki ai ʻe hatau tokolahi ha konga lahi ʻo hotau taimi mahuʻingá, ʻetau fakakaukaú, koloá, mo hotau iví ke tulia e ngeiá pe koloa fakaemāmaní pe ke fakafiefiaʻi ʻe he ngaahi vaʻinga fakaʻilekitulōnika foʻou taha mo lelei tahá?
Kuo ʻosi tuku ʻe he ʻEikí ʻi hotau ʻaó ʻa e talaʻofa fakalangi “ʻilonga ʻa kinautolu ʻoku faivelenga ʻo aʻu ki hono maʻu ʻo e ongo lakanga fakataulaʻeikí ni, … mo fakaongoongoleleiʻi ʻo honau lakangá, … [te nau] maʻu au, ʻoku folofola ʻe he ʻEikí; … pea ko ia ia ʻokú ne tali aú ʻokú ne tali ʻeku Tamaí; … ko ia ko e meʻa kotoa pē ʻoku maʻu heʻeku Tamaí ʻe foaki ia kiate ia.”9
ʻOku ʻikai ke u makupusi pe mafakakaukaua e meʻa kotoa ʻoku kātoi he talaʻofa ko ʻení. Ka ʻoku ou ʻiloʻi ʻoku fakaʻofoʻofa, ʻoku fakalangi, ʻoku taʻengata, pea ʻoku taau ne tau ngāueʻi ʻi he kotoa ʻo e moʻuí.
ʻI heʻetau ʻilo ʻení, ko e hā te tau toe taʻe-kau loto fiemālie mo fiefia ai ʻi he tokoni ki he ʻEikí mo hotau kāingá mo fakahoko hotau ngaahi fatongia ʻi he lakanga fakataulaʻeiki ʻo e ʻOtuá?
Ko e ngāue fakaʻeiʻeiki taha ʻeni te ne liliu kitautolu he tapa kotoa mo e meʻa ʻoku tau lavá. ʻOku tau fakaʻamu ʻapē ke mamata ʻoku fakaava ʻa e ngaahi langí mo sio tonu ʻi hono ueʻi kitautolu ʻe he Laumālie Māʻoniʻoní ʻi hono fakahinohino ʻo e halá? Tau toʻo ā ʻetau ngaahi hele tuʻusí pea tuku atu hotau iví ki he ngāue maʻongoʻongá ni—ko ha ngāue ʻoku māʻolunga ange ʻiate kitautolú!
ʻE poleʻi mo liliu kitautolu ʻe he tokoni ki he ʻOtuá mo hotau kāingá ki ha faʻahinga meʻa ʻoku lelei ange ʻi ha toe meʻa ne tau fakakaukau ʻe malava.
Mahalo te ke pehē ʻoku ʻikai fie maʻu koe, liʻaki koe pe taʻe-fiemaʻua, pe ko ha meʻanoa pē koe.
ʻOku ou ongoʻi loto mamahi moʻoni kapau ʻoku ʻi ai ha taha maʻu lakanga fakataulaʻeiki ʻoku ongoʻi pehē. ʻOku ʻikai teitei ngalo pe taʻe fie maʻu koe ʻe he Tamai Hēvaní. ʻOkú Ne ʻofa ʻiate koe. Pea te u tala tonu atu ʻoku fie maʻu koe ʻe homou Siasí.
ʻOku ʻikai ʻapē te ke ʻilo “Kuo fili ʻe he ʻOtuá ʻa e ngaahi meʻavale ʻo e māmaní ke [fakamaaʻi] ʻa e potó; pea kuo fili ʻe he ʻOtuá ʻa e ngaahi meʻa vaivai ʻo e māmaní ke [fakamaaʻi] ʻa e mālohí”?10
Mahalo pē ʻoku moʻoni ʻoku tau vaivai. Mahalo ʻoku ʻikai ke tau poto pe ivi lahi. Ka ko e taimi ʻoku ngāue ai ʻa e ʻOtuá ʻiate kitautolú, he ʻikai ha taha pe ha meʻa te ne lava ʻo fakafepakiʻi kitautolu.11
Ko e ʻuhinga ia ʻoku fie maʻu ai koé. ʻOku ʻi ai ʻa e meʻa ke ke fai, pea ʻe lava ke fakalahi ʻe he ʻOtuá e tokoni ko iá ʻi ha founga kāfakafa. Ko hoʻo malava ke tokoní ʻoku ʻikai fakafalala ia ʻi ho fatongia he Siasí. ʻOku taʻe fakangatangata ho ngaahi faingamālie ke tokoní. Kapau ʻokú ke matavaʻinga pē mei he tafaʻakí, ʻoku ou poupou atu ke ke hū mai ʻo kau.
ʻOua te ke tali ki ha fatongia pau ka ke toki kau kakato ʻi hono langa e puleʻanga ʻo e ʻOtuá. ʻI hoʻo hoko ko e taha maʻu lakanga fakataulaʻeikí, kuo ʻosi ui ai koe ke ngāue. Ako fakaʻaho e folofola ʻa e ʻOtuá, lotu fakaʻaho ki he Tamai Hēvaní, fakatōkakano e ngaahi tefitoʻi moʻoni ʻo e ongoongolelei kuo toe fakafoki maí, fakafetaʻi ki he ʻOtuá, mo kolea ʻEne fakahinohinó. Peá ke ʻuluaki moʻui ʻaki e meʻa ʻokú ke ʻiló, ʻi ho fāmilí pea mo e ngaahi tūkunga kotoa pē foki ʻo hoʻo moʻuí.
ʻI he tāmeʻa maʻongoʻonga ʻa e Tupuʻangá, ʻoku ʻi ai hoʻo konga ke tā—ngaahi nota ke ke hivaʻi. Kapau he ʻikai ke ke fai ia, ʻe kei hoko atu pē fasí ia. Ka ʻo kapau te ke tuʻu ʻo kau ʻi he hivá mo tuku e mālohi ʻo e ʻOtuá ke ngāue ʻiate koe, te ke fakatokangaʻi ʻe fakaava ʻa e “ngaahi matapā ʻo e langí,” pea te Ne “lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai.”12 Fakahoko e meʻa ʻokú ke lava ʻi hoʻo hoko ko e foha ʻo e ʻOtuá, pea te ke lava ʻo hoko ko ha mālohi ki he leleí ʻi ho fāmilí, ʻi ho ʻapí, ʻi ho koló, ʻi ho puleʻangá, pea ʻi māmani foki.
Pea ʻi hoʻo fai iá, ʻi he “mole [hoʻo] moʻuí” ʻi he tokoni ki he niʻihi kehé,13 te ke tupulaki mo fakalakalaka kae ʻoua kuó ke aʻu “ki he fuofua ʻo e lahi ʻo hono fonu ʻo Kalaisí.”14 Te ke toki mateuteu leva ke maʻu, fakataha mo Kalaisi, ʻa e meʻa kotoa ʻoku ʻa hoʻo Tamaí.
ʻOkú ke Mahuʻinga ki he ʻOtuá
Siʻi ngaahi tokoua ʻofeina, ʻoku mou mahuʻinga. ʻOku ʻofaʻi kimoutolu. ʻOku fie maʻu kimoutolu. ʻOku moʻoni ʻa e ngāué ni. Ko e lakanga fakataulaʻeiki ʻokú ke faingamālie ke maʻú, ʻoku ʻo e ʻOtuá moʻoni ia.
Fakatauange ko e taimi te ke fakakaukaulotoa ai e ngaahi hingoa lahi ʻo ha tokotaha maʻu lakanga fakataulaʻeiki moʻui tāú te ke ʻiloʻi ai ha ivi fakalangi ke ne tokoniʻi koe, ke ne hiki hake maʻu ai pē koe ki ʻolunga, ki he tofiʻa maʻongoʻonga kuo fakatatali ʻe he Tamai Hēvaní maʻaú. ʻOku ou tuku atu ʻa e tāpuakí ni mo ʻeku fakamoʻoní, ʻi he huafa toputapu ʻo Sīsū Kalaisí, ʻēmeni.