Sa Iyang Kaugalingong Panahon, sa Iyang Kaugalingong Paagi
Gikan sa pakigpulong nga gihatag ngadto sa bag-ong mga presidente sa misyon niadtong Hunyo 27, 2001.
Ang pagpadayag tinuod. Moabut kini sa pamaagi ug sumala sa panahon sa Ginoo.
Ganahan ko nga moeksamin sa pipila ka mga baruganan nga magamit sa tanan nga komunikasyon gikan sa Espiritu—komunikasyon ngadto sa tawo nga nagtudlo, sa tawo nga nagtinguha sa pagkat-on, ug sa matag miyembro sa Simbahan.
Una, kita kinahanglang moila nga ang Ginoo mopadayag kanato pinaagi sa Espiritu sa Iyang kaugalingong panahon ug sa Iyang kaugalingong paagi. Daghang mga tawo ang wala makasabut niini nga baruganan. Nagtuo sila nga kon sila andam ug kon kini mohaum sa ilang kasayon, sila makatawag diha sa Ginoo ug motubag Siya diha-diha dayon, gani tukma sa ilang gusto. Ang pagpadayag dili moabut niana nga paagi.
Pagkahimong Takus para sa Pagpadayag
Sukaranan sa bisan unsa nga paningkamot aron makadawat og pagpadayag mao ang pasalig sa pagbuhat kutob sa atong mahimo ug paghukom. Kini nagpasabut nga kita kinahanglan nga moserbisyo ug motrabaho.
Usa ka importante nga paagi nga makasarang alang sa pagpadayag mao ang pagpadayon sa atong pagserbisyo ug pagbuhat. Sa akong pagtuon sa mga kasulatan akong namatikdan nga kadaghanan sa mga pagpadayag ngadto sa mga anak sa Dios moabut kon sila naglihok, dili kay naglingkod lang diha sa ilang nahimutangan nga nagpaabut sa Ginoo sa pagsulti kanila sa unsay unang buhaton.
Sama pananglit, mahinungdanon nga timan-an nga ang pagpadayag nga nailhan nga “ang Pulong ug Kabubut-on sa Ginoo mahitungod sa Kampo sa Israel” (D&P 136:1) wala gihatag didto sa Nauvoo samtang ang Korum sa Napulog Duha nagplano sa paglalin gikan sa Nauvoo niadtong masulub-ong mga adlaw human sa Pagkamartir sa Propeta niadtong 1844; ni kini gihatag diha sa kasadpang kilid sa Sapa sa Mississippi. Kini gihatag sa Winter Quarters, Nebraska, human ang mga Santos migahin og usa ka tuig nga daghang pagsulay sa pagbalhin gikan sa Nauvoo padulong sa kasadpan latas sa Iowa ngadto sa temporaryo nga mga kampo sa Sapa sa Missouri. Ang pagpadayag aron sa paggiya sa paglatas sa mga Santos sa kapatagan gihatag niadtong Enero 14, 1847, sa dihang ang mga Santos nakalatas og hapit na katunga sa agianan padulong sa mga walog sa kabungturan.
Kita dasigon sa Espiritu kon atong buhaton ang tanan natong mahimo, kon kita nagkugi og maayo kaysa maglingkod lang nga nag-ampo og direksyon para sa unang lakang nga buhaton. Ang pagpadayag moabut kon ang mga anak sa Dios naglihok.
Mao nga atong buhaton ang tanan natong mahimo. Dayon magpaabut kita sa Pagpadayag sa Ginoo. Siya adunay iyang kaugalingong panahon.
Tayming ug Matang
Mga 35 ka tuig na ang milabay, sa dihang ako ang presidente sa Brigham Young University, kami nagplano aron sa pagdani sa presidente sa Estados Unidos nga mamulong sa unibersidad. Nakahunahuna kami og mga pihong panahon nga sayon para namo ug mga butang nga buot namo niyang ipamulong ug buhaton samtang naa siya. Apan kaming tanan nasayud nga dili namo makontak ang tawo nga may pinakataas nga awtoridad sa Estados Unidos ug dapiton siya sa pag-adto sa campus sa BYU—gani mamulong sa 26,000 ka mga tawo—ug maghimo og mga kondisyones sa iyang pagbisita.
Kami nasayud nga sa pagdapit sa presidente, kami makaingon lang, “Kami mo-welcome kanimo kon kanus-a ka makaanhi dinhi ug sa oras nga gusto nimong moanhi ug ikaw ang magbuot kon unsay imong ipamulong ug buhaton samtang anaa ka dinhi. Among ipahiangay ang among mga eskedyul ug sabut sa tibuok panahon sa imong pagbisita.”
Karon, kon kana ang paagi sa usa ka komunidad nga may 26,000 ka mga tawo sa pagtagad sa tawo nga may pinakataas nga awtoridad sa nasud, dili ikatingala nga ang usa ka tawo—bisan unsa pa kaimportante—walay katungod sa paghimo og mga kondisyon o sa pagpahamtang og personal nga tayming sa pagbisita o pagpakig-istorya sa Pinakataas nga Awtoridad sa uniberso.
Sa pagkatinuod, kini ang baruganan nga gipadayag sa Ginoo ngadto sa Iyang mga anak diha sa talagsaong pagpadayag nga giimprinta sa seksyon 88 sa Doktrina ug mga Pakigsaad. Ang Ginoo miingon, “Paduol ngari kanako ug Ako mopaduol nganha kaninyo; pangita kanako nga makugihon ug kamo makakita kanako; pangayo, ug kamo makadawat; tuktok, ug kini pagabuksan nganha kaninyo” (bersikulo 63).
Sunod, ang Ginoo namahayag nga kon bug-os ang atong tinguha ngadto sa Iyang himaya, ang atong tibuok lawas mapuno sa kahayag ug kita makasabut sa tanan nga mga butang. Dayon, ang Iyang instruksyon nagpadayon uban niining talagsaon nga saad: “Busa, ibalaan ang inyong mga kaugalingon aron ang inyong mga hunahuna mahimo nga ipahinungod ngadto sa Dios, ug ang mga adlaw moabut nga kamo makakita kaniya; kay siya mopakita sa iyang nawong nganha kaninyo, ug kini diha sa iyang kaugalingon nga higayon, ug sa iyang kaugalingon nga paagi, ug sumala sa iyang kaugalingon nga kabubut-on” (bersikulo 68; emphasis gidugang).
Ang baruganan nga gipahayag niana nga pagpadayag magamit sa tanang komunikasyon ngadto sa atong Langitnong Amahan. Dili nato mapugos ang espirituhanong mga butang.
Sa kasagaran, ang “iyang kaugalingon nga paagi” dili mao ang nagdahunog nga tingog o ang makapabuta nga kahayag apan mao ang gipasabut nga “hinay nga hinagawhaw nga tingog” diha sa mga kasulatan (1 Mga Hari 19:12; 1 Nephi 17:45; D&P 85:6). Daghan ang nasayop sa pagsabut niini nga baruganan. Isip resulta, daghan ang nangita ra sa talagsaong mga pagpakita nga narekord diha sa mga kasulatan ug napakyas sa pag-ila sa “hinay nga hinagawhaw nga tingog” nga gihatag ngadto kanila. Susama kini sa paghunahuna nga kita makakat-on lang sa usa ka magtutudlo nga dako og tingog ug kita dili maminaw sa pinakamaalamong pagtulun-an nga nagagikan sa paghunghong.
Kita kinahanglang masayud nga ang Dios panagsa mamulong nga dako og tingog. Iyang mga mensahe hapit kanunay moabut sa usa ka hunghong.
Pagpadayag isip Paglamdag ug Kalinaw
Ang usa sa labing mahinungdanon nga pagpasabut kon sa unsang paagi nga ang Espiritu nagtudlo kanato anaa sa pagpadayag nga gihatag ngadto kang Oliver Cowdery sa Harmony, Pennsylvania, niadtong Abril 1829. Niini nga pagpadayag ang Ginoo misulti kang Oliver:
“Oo, tan-awa, Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing.
“Karon, tan-awa, kini mao ang espiritu sa pagpadayag” (D&P 8:2–3; emphasis gidugang).
Sa samang paagi, si Propeta Joseph Smith mipasabut sa espiritu sa pagpadayag isip “lunsay nga salabutan,” nga “mahimong mohatag kanimo og hinanaling pagsantup sa mga ideya.”1 Sa laing pagpadayag, si Oliver napahinumduman nga siya nangutana sa Ginoo ug nga “sa makadaghan nga ikaw nagpakisayud ikaw nakadawat og panudlo sa akong Espiritu” (D&P 6:14). Sa unsang paagi miabot kana nga instruksyon? “Tan-awa,” ang Ginoo miingon, “ikaw nahibalo nga ikaw nagpakisayud kanako ug Ako milamdag sa imong panumduman” (bersikulo 15; emphasis gidugang). Kana nga pagtulun-an gibalik sa pagpadayag nga gihatag ngadto ni Hyrum Smith diin ang Ginoo miingon, “Sa pagkatinuod, sa pagkatinuod, Ako mingon nganha kanimo, Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay” (D&P 11:13; emphasis gidugang). Mao kini ang talagsaon nga mga paghulagway sa mga paagi nga ang Ginoo mopadayag kanato pinaagi sa Iyang Espiritu.
Sa dugang instruksyon ngadto kang Oliver Cowdery, ang Ginoo mipahinumdom kaniya sa panahon nga siya nag-ampo nga siya masayud “sa kamatuoran niini nga mga butang” (D&P 6:22). Ug ang Ginoo mihulagway kon sa unsang paagi Siya mitubag nianang pag-ampo ug gihatag ni Oliver ang pagpadayag: “Wala ba Ako magsulti og kalinaw nganha sa imong hunahuna mahitungod niini nga butang? Unsa ka labaw nga kamatuoran ang imong maangkon kay sa gikan sa Dios?” (bersikulo 23; emphasis gidugang).
Gikan niining mga pagpadayag atong makat-unan nga ang Dios nagtudlo kanato pinaagi sa gahum sa Iyang Espiritu, nga molamdag sa atong hunahuna ug mamulong og kalinaw kanato mahitungod sa mga pangutana nga atong gipangutana.
Ang Pagpadayag Usa ka Pagbati
Atong nakat-unan usab gikan niining mga pagpadayag nga kinahalanglan ta nga molihok aron matudloan sa Espiritu. Kanunay ang komunikasyon sa Ginoo dili moabut kon wala nato tun-i kining butanga sa atong hunahuna. Dayon kita makadawat og kumpirmasyon.
Ang proseso gipasabut ngadto ni Oliver Cowdery sa lain nga pagpadayag nga nadawat sa Harmony, Pennsylvania, niadtong Abril 1829. Gihulagway sa Ginoo nganong si Oliver wala makahubad sa Basahon ni Mormon:
“Tan-awa, ikaw wala makasabut; ikaw nagdahum nga Ako mohatag niini nganha kanimo, samtang ikaw wala maghunahuna gawas sa pagpangutana kanako.
“Apan, tan-awa, Ako moingon nganha kanimo, nga ikaw kinahanglan gayud nga magtuon niini diha sa imong hunahuna; unya ikaw kinahanglan nga mangutana kanako kon kini husto, ug kon kini husto Ako mohimo sa imong dughan nga moinit diha sulod kanimo; busa, imong mabati nga kini husto” (D&P 9:7–8; emphasis gidugang).
Kini mahimong usa sa labing importante ug wala kaayo masabti nga pagtulun-an diha sa tibuok Doktrina ug mga Pakigsaad. Ang mga pagtulun-an sa Espiritu kanunay nga moabut isip mga pagbati. Kana nga kamatuoran mao ang labing importante, apan daghan ang wala kaayo makasabut niini. Daghan ko og kaila nga naghunahuna nga sila walay pagsaksi gikan sa Espiritu Santo tungod kay sila wala gayud mibati nga ang ilang dughan “miinit”. Ang kainit sa dughan, mosugyot ko, dili usa ka pagbati sama sa kainit sa pagsunog sa calorie apan usa ka pagbati sa kalinaw ug kaaghop ug kamaayo.
Ang Pagpadayag Dili Kanunay
Ang pagpadayag dili kanunay. Ang pamaagi sa Ginoo nag-limit kon kapila Siya mamulong kanato pinaagi sa Iyang Espiritu. Wala kaayo makasabut niini, ang pipila nasayop sa pagsabut nga kanunay magdahum og pagpadayag.
Nagkomentaryo sa mga buhat sa Espiritu, si Presidente Boyd K. Packer, Presidente sa Korum sa Napulog Duha Ka mga Apostoles, miingon, “Akong nakat-unan nga ang kusganon, impresibo nga espirituhanong mga kasinatian dili moabot kanato pirmi.”2
Sa paghulagway niini nga punto, ikonsiderar unsay gitudlo nato kabahin sa atong unang mga ginikanan human sila gipapahawa sa Tanaman sa Eden ug nalayo sa presensya sa Ginoo. Ang Ginoo misugo kang Adan nga kinahanglan niyang isakripisyo ang unang mga anak sa iyang kahayopan isip halad ngadto sa Ginoo. Siya misunod. Ang Ginoo ba mipadayag kaniya diha-diha dayon? Ang kasulatan nag-ingon: “Ug human sa daghan nga mga adlaw usa ka anghel sa Ginoo nagpakita ngadto kang Adan” (Moises 5:6; emphasis gidugang).
Si William E. Berrett, usa sa atong labing maayo nga magtutudlo sa ebanghelyo, kinsa miserbisyo isip tigdumala sa BYU ug sa Church Educational System, miingon niini kabahin sa makanunayon o padayon nga pagpadayag: “Kadtong nag-ampo nga ang Espiritu mogiya kanila diha-diha dayon sa tanang gagmay nga mga butang mipahimutang sa ilang kaugalingon ngadto sa bakak nga mga espiritu nga daw andam nga motubag sa atong mga pangamuyo ug molibug kanato. … Ang mga tawo nga akong nailhang naglibug pag-ayo niini nga simbahan mao kadtong nagtinguha og personal nga pagpadayag sa tanang butang. Gusto nila ang personal nga kasiguroan gikan sa Espiritu sugod sa buntag hangtud sa gabii sa tanan nilang buhaton. Ako moingon nga sila mao ang labing naglibug nga mga tawo nga akong nailhan tungod kay daw ang tubag usahay naggikan sa sayop nga tinubdan.”3
Si Propeta Joseph Smith miingon og susama nga butang. Sa dihang ang mga Santos “nangamuyo diha sa trono sa grasya,” siya mitambag, nga dili ni angay nilang buhaton sa dili importanting mga butang apan kinahanglang “mag-ampo nga matinguhaon alang sa labing maayong mga gasa.”4 Kana importante nga baruganan. Kita padayong mag-ampo alang sa giya, apan kita dili magdahum og makanunayong pagpadayag. Kami maglaum og makanunayong pagpadayag, nga mao ang padayon nga kasigurohan sa pagpadayag kon kita nagtinguha og giya ug ang atong mga kahimtang ingon nga ang usa ka maalamon ug mahigugmaong Ginoo nagpili nga mohatag niini kanato.
Ang Pagpadayag ug Pagpamatuod
Ang panan-awon mahitabo. May mga tingog nga madunggan gikan sa pikas tabil. Ako nasayud niini. Apan kini nga mga kasinatian talagsaon. Ug kon kita adunay usa ka nindot kaayo ug talagsaong kasinatian, dili kaayo nato kini ipamulong sa publiko tungod kay kita gidid-an niini (tan-awa sa D&P 63:64) ug tungod kay kita nakasabut nga ang agianan sa pagpadayag masirado kon atong ipakita kining mga butanga sa kalibutan.
Kadaghanan sa mga pagpadayag nga nadawat sa mga lider ug mga miyembro sa Simbahan nahitabo pinaagi sa “hinay nga hinagawhaw nga tingog” o sa usa ka pagbati kay sa usa ka panan-awon o tingog nga mamulong og piho nga mga pulong nga atong madungog. Ako mopamatuod sa katinuod niana nga matang sa pagpadayag, nga akong nasinati isip pamilyar, gani matag adlaw, nga kasinatian aron sa paggiya kanato sa buhat sa Ginoo.
Wala makasabut niining mga baruganan sa pagpadayag, daghang mga tawo milangay-langay sa pag-ila sa ilang pagpamatuod o sa ilang espirituhanong kalamboan hangtud sila makasinati og milagrusong panghitabo. Napakyas sila sa pagkaamgo nga alang sa kadaghanan sa mga tawo—ilabi na niadtong nagdako sa Simbahan—ang bililhon nga pagpadayag nga naghatag kanato og pagpamatuod dili usa ka panghitabo apan usa ka proseso. Si Elder Bruce R. McConkie (1915–85) nakaobserbar: “Ang pagbag-o hinay-hinay usab nga proseso, gawas lang sa pipila ka talagsaon nga hitabo nga milagroso kaayo nga kini gisulat diha sa mga kasulatan. Kon may kalabutan lang sa kinatibuk-ang mga miyembro sa Simbahan, kita nabag-o hinay-hinay, ug kita natawo pag-usab sa dugang kahayag ug dugang kahibalo ug dugang mga tinguha alang sa pagkamatarung samtang kita mosunod sa mga sugo.”5
Kita kinahanglang makasabut nga ang Ginoo mopadayag kanato sa Iyang kaugalingong panahon ug paagi. Kini sa kasagaran mao ang gipasabut sa mga kasulatan nga “hinay nga hinagawhaw nga tingog” sa paglamdag. Kita kanunayng obligado sa pagbuhat sa atong labing maayo nga paghukom, ubos sa makapugong nga impresyon sa Espiritu kon kita molapas sa gitugotang utlanan.
Ang pagpadayag tinuod. Moabut kini sa pamaagi ug sumala sa panahon sa Ginoo.
Mopamatuod ako nga kining mga butanga tinuod. Anaa kanato ang gasa sa Espiritu Santo, ang katungod sa makanunayong panag-uban sa Espiritu sa Ginoo nga nagpamatuod sa Amahan ug sa Anak, aron modala kanato ngadto sa kamatuoran, sa pagtudlo kanato sa tanang mga butang, ug sa pagpahinumdom kanato sa tanang mga butang (tan-awa sa Juan 14:26; 16:13).
Gikan sa mga pagpadayag ngadto ni Hyrum Smith (gipakita sa ibabaw) ug ni Oliver Cowdery, atong makat-unan nga ang Dios nagtudlo kanato pinaagi sa gahum sa Iyang Espiritu, nga molamdag sa atong mga hunahuna ug mamulong og kalinaw kanato mahitungod sa mga pangutana nga atong gipangutana.
Ang Ginoo wala mopadayag ni Adan diha-diha dayon human siya misunod sa sugo sa pagsakripisyo sa mga unang anak sa iyang kahayopan. Ang kasulatan nag-ingon, “Ug human sa daghan nga mga adlaw usa ka anghel sa Ginoo nagpakita ngadto kang Adan” (Moises 5:6).