Naʻá ku Fili ʻa e Totonú
Kapau te u fakafisi ke inu ʻa e uainé ʻe lava pē ke tauteaʻi au, pea pehē ki hoku fāmilí.
“Ako ʻi hoʻo kei siʻí ke tauhi ʻa e ngaahi fekau ʻa e ʻOtuá” (ʻAlamā 37:35).
Naʻá ku ʻalu mo hoku fāmilí ke ʻeva ki he kolo ʻo ʻeku ongomātuʻá ʻi he kātoangaʻi ʻo e Taʻu Foʻoú. Ko e taʻu ʻaki ʻeni hono tolu talu mei heʻemau ʻaʻahi fakamuimui ki aí, pea ne mau ʻamanaki atu ke toe mamata ki ha ngaahi kaungāmeʻa mo e kau mēmipa ʻo e fāmilí. Naʻe talitali fiefia kimautolu ʻi heʻemau aʻu atú.
Ne mau fakatahataha mo ha niʻihi ʻi he hoko e Taʻu Foʻoú ki ha ouau tukufakaholo ko e talamonū ʻo ha maluʻi, moʻui fuoloa, pea mo ha tuʻumālie ki he foha lahi taha ʻi he ngaahi fāmilí takitaha. Ko e foha lahi taha au ʻi hoku fāmilí. Naʻá ku ʻosi ʻilo ʻe fie maʻu ʻa e taha kotoa pē ʻe kau aí ke inu uaine he ko e konga ia ʻo e ouaú.
Naʻá ku fuʻu hohaʻa ʻaupito. Naʻá ku ʻilo ko e inu ʻo e uainé ko hono maumauʻi ia e Lea ʻo e Potó. Ka naʻá ku toe ʻiloʻi foki kapau he ʻikai ke u inu e uainé, ʻe lava ʻo tauteaʻi au ʻi heʻeku taʻe-fakaʻapaʻapá—pea ʻe ala tauteaʻi mo hoku fāmilí foki. Peá u toki manatuʻi e meʻa naʻe akoʻi mai heʻeku faʻeé: ko hoʻo ʻilo pē ʻokú ke ʻi ha tuʻunga ʻoku ʻikai ke ke lava ʻo puleʻi, ʻoku totonu ke ke lotu ki he Tamai Hēvaní ʻo kole ke tokoni atu.
Ne u lotu fakalongolongo ai, “Tamai Hēvani, tuku muʻa Ho Laumālié ke ne tataki mo tokoniʻi au ke u fai e meʻa ʻoku totonú.”
ʻI he hokosia e taimi ke u inu e uainé, naʻá ku tailiili, ka naʻá ku lea leʻo lahi mo mahino. “Ko hoku sinó ko ha temipale. He ʻikai ke u maumauʻi e Lea ʻo e Potó,” ko ʻeku leá ange ia.
Naʻe mātuʻaki ʻohovale ʻa e ʻulumotuʻa he koló. Naʻá ne tafoki mai leva kiate au mo pehē mai, “ʻOku hangē ʻokú ke mātuʻaki fakapapauʻí e meʻa ʻokú ke faí. Kātaki, ʻoku mau fie fanongo lahi ange ki hoʻo ngaahi fakakaukaú.”
Naʻe ʻikai ke tauteaʻi au mo hoku fāmilí, pea naʻe fakamālohia ʻemau tuí. ʻOku ou ʻilo naʻe tokoniʻi au ʻe he Tamai Hēvaní ke u loto-toʻa ke fili ʻa e totonú.
Tā fakatātaaʻi ʻe Steve Kropp