Kamata ʻi ʻOkatopa e Ngaahi Tefito Foʻou ki he Faiako ʻAʻahí
ʻE kamata ʻi ʻOkatopa 2013 ʻe fakatefito e Pōpoaki Faiako ʻAʻahí ʻi he misiona fakalangi ʻo Sīsū Kalaisí mo Hono ngaahi fatongiá mo e ʻulungāngá.
ʻI heʻetau lau ʻi he Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá, “ʻI he taimi naʻe kei ʻi māmani ai ʻa Sīsū Kalaisí, naʻá Ne fakahaaʻi mai kiate kitautolu e founga ʻoku totonu ke tau moʻui ʻaí.”1 ʻI hono ako mo fakatefito ʻi he ngaahi fatongia mo e ʻulungaanga ʻo e Fakamoʻuí, ʻe ako e kau fafine ʻo e Siasí ke hangē ko Iá2 pea lava ke fealeaʻaki mo e kau fafine ʻoku nau tokoniʻí e founga ʻe lava ke takiekina ai ʻe he ngaahi akonaki mo e sīpinga ʻo e Fakamoʻuí ʻenau moʻuí.
Ne fakahaaʻi mai ʻe he ʻEikí e founga ʻo e ngāue tokoní—founga ʻo e tauhí, fakamālohiá mo e feakoʻakí. Naʻá Ne ngāue tokoni ki he fakafoʻituituí, ʻo fakahoko tautautokotaha.3 Ko e Faiako ʻAʻahí ko hotau faingamālie ke muimui ʻi Heʻene sīpingá.
Naʻe fakamoʻoni ʻa Palesiteni Henelī B. ʻAealingi, ko ha tokoni ʻi he Kau Palesitenisī ʻUluakí, “ko e faiako ʻaʻahí ko ha konga ia e palani ʻa e ʻEikí ke tokoniʻi e kakai kotoa pē ʻi he māmaní. … ‘Naʻá Ne fokotuʻu ha sīpinga.’”4 ʻI heʻetau hoko ko e kau faiako ʻaʻahí, ʻoku tau toe manatu ki he akonaki ʻa Palesiteni Tōmasi S. Monisoni: “Ko e toʻukupu kitautolu ʻo e ʻEikí ʻi he funga ʻo e māmaní kuo fekauʻi mai ke tau tokoniʻi mo hiki hake ʻEne fānaú. ʻOkú Ne fakafalala mai kiate kitautolu takitaha.”5
© IRI