Ko e feituʻu ʻoku ou nofo aí, ʻoku lau ʻokú mo kaumeʻa hili ha teiti tuʻo taha pē. ʻE lava fēfē ke teiti ha taha mo ha kakai kehekehe kae taʻe lau ko ha taha havala mo taʻe faitotonu?
Tā fakatātaaʻi ʻo e ʻatá ʻe Matthew Reier; paʻanga maká © Thinkstock/iStockphoto
Ko ha palopalema faingataʻa ʻeni ki ha toʻu tupu tokolahi ʻo e Kāingalotú ʻi he funga ʻo e māmaní kotoa. Kuo faleʻi kinautolu ke nau “fakaʻehiʻehi mei he faʻa toutou teiti mo e tokotaha tatau peé” koeʻuhí ke ʻoua naʻa nau fakatupulaki ha feohi vāofi ʻoku nau kei taʻu siʻi (Ki hono Fakamālohia ʻo e Toʻu Tupú [kiʻi tohi, 2011], 4). Ka ʻi he anga fakafonua he konga lahi ʻo e māmaní, ʻoku faʻa hoko ʻa e fakaafe ia ke soó ki muʻa ʻoku teʻeki ke na teiti tuʻo taha; pea ʻoku pehē pē, ʻe lava ʻe he teiti tuʻo tahá ke ne fakafōtunga ha feohi makehe mo ha ʻamanaki ke lotoʻaki. ʻI he faʻahinga anga fakafonua peheé, ko e teiti mo ha kakai kehekehé ʻoku hangē ʻokú ne maumauʻi ʻa e “feohí” pea te ne lava ʻo ʻai ho ongoongó ko ha taha angaʻuli mo taʻe faitotonu. Ko e hā leva e meʻa ʻoku totonu ke ke faí?
ʻUluakí, fakapapauʻi ʻoku ʻilo ʻe he taha kotoa hoʻo tui mo hoʻo lotoʻaki e ngaahi tuʻunga moʻui ʻa e ʻEikí ʻi he angamaʻá mo e maʻa fakasekisualé ke ʻoua naʻa ʻi ai ha maʻuhala fekauʻaki mo ho ʻulungāngá mo hoʻo tōʻongá. Hokó, te ke lava ʻo ngāue lahi ke liliu ʻa e anga fakafonua ʻo e teití ʻokú ke ʻi aí ke lelei ange ʻaki haʻo lea ki he ngaahi fakahinohino ʻa e Siasí. Kapau ʻe fehuʻia koe ʻe he kakaí fekauʻaki mo hoʻo ngaahi tuʻunga moʻui he teití, ʻeke ange pe ko e hā e ʻuhingá, kapau ʻoku ʻikai ke nau fie mali vave, ko e hā ʻoku nau ongoʻi ai e fiemaʻu ke feohi vāofi fakaeloto mo fakaesino pea tautautefito ʻi he faʻahinga taʻu kei siʻi peheé. Fakaafeʻi ke nau kau fakataha mo koe ʻi ha teiti fakatokolahi ke nau lava ʻo ʻilo ʻa e fiefia te nau lava ʻo maʻú kae fakaʻehiʻehi mei he ngaahi fakatuʻutāmaki fakaangamaʻa taʻeʻaongá mo e ngaahi ongo fakaeloto ʻo e feʻofaʻaki kei taʻu hongofulu tupú. Pea ʻai ke nau ʻilo ki he fakahinohino mo e faleʻi kuo fai kiate koe ʻe he kau palōfita mo e kau ʻaposetolo moʻuí.