Ko e Lea ‘i he ‘Aho ní
Ko e Talaange ʻe ʻEletā Peuli ki he Kau Fakaʻosi Akó ke Tauhi ke Palanisi ʻEnau Moʻuí
Ko e lea ʻa ʻEletā L. Tom Perry ʻo e Kōlomu e Kau ʻAposetolo ʻe Toko Hongofulu Mā Uá ʻi ha polokalama fakaʻosi ako ʻi he ʻUnivēsiti Pilikihami ʻIongí ʻi Polovó, ʻIutā, USA, ʻi ʻEpeleli 2013. Naʻá ne lea ki he fie maʻu ke palanisi e moʻuí mo fakamamafaʻi e fie maʻu ke ʻi ai ha taimi maʻá e fāmilí, ngāué, akó, ngāue tokoní, taimi maʻá ta pea tautautefito ki he ongoongolelei ʻo Sīsū Kalaisí.
Naʻá ne akonaki ki he kau ʻosi mei he akó ke moʻui fakapotopoto. Naʻá ne pehē, “Ko e taha ʻo e ngaahi lēsoni mahuʻinga taha te mou akó ko e malu mo e nonga ʻoku maʻu mei he moʻui fakatatau ki he meʻa ʻokú te maʻú.”
Naʻá ne toe fakamamafaʻi e mahuʻinga ʻo hono fokotuʻu ha ʻapi ʻoku fakatefito ʻia Kalaisi. Naʻá ne pehē, “ʻOku totonu ke hoko e lotu fakaʻahó mo e ako folofolá ko ha konga ʻo e ʻapi Siasi kotoa pē. ʻAi e ongoongolelei ʻo Sīsū Kalaisí ko ha konga mahuʻinga mo longomoʻui ʻo hoʻomou moʻuí.”
ʻAʻahi ʻa ʻEletā Nalesoni ki he ʻĒlia ʻĒsia Noaté
Mei he ʻaho 23 Fēpueli ki he ʻaho 3 Māʻasi 2013, ne ʻaʻahi ai ʻa ʻEletā Russell M. Nelson ʻo e Kōlomu ʻo e Kau ʻAposetolo ʻe Toko Hongofulu Mā Uá ki he ʻĒlia ʻĒsia Noaté. Ne pehē ʻe ʻEletā Nelson, ʻe tatau ai pē pe ko fē feituʻu ʻe ʻalu ki ai ʻi he māmaní, ʻoku tatau pē ʻene pōpoakí. Naʻá ne talaange ki he kāingalotu ʻi he ʻēliá, “ʻoku tau ʻi heni ke akoʻi mo fakamoʻoni ki he ʻEiki ko Sīsū Kalaisí mo ʻEne ongoongolelei kuo toe fakafoki maí. “Ko ʻetau pōpoakí ko e pōpoaki ʻo e melino mo e fiefia, mo hono fakamālohia e fāmilí, vāofi e husepānití mo e uaifí, fānaú ki heʻena mātuʻá pea mo e kakaí ki heʻenau ngaahi kuí … ke nau lava ʻo fiefia kotoa ʻi he moʻui taʻengata he ʻao ʻo e ʻOtuá hili ʻenau fononga ʻi he māmaní.”
Tānaki atu ki heʻene fakataha mo e kau taki lakanga fakataulaʻeikí mo e kau mēmipa ʻi he ʻēliá mo ha vahefonua makehe maʻá e kau tau maluʻi fonua ʻi ʻOkinauá, ne toe fakataha foki ʻa ʻEletā Nalesoni mo e ongo fakafofonga puleʻanga ʻi Siapani.
Faitā ʻa Jeffrey D. Allred