Ko e Temipale Nāvuú mo e Fale Fakapōpula Kātesí

Fai ʻe Jennifer Maddy

Haʻu ke tau vakaiʻi e ngaahi feituʻu mahuʻinga ko ʻeni ʻi he hisitōlia ʻo e Siasí!

Naʻe masiva ha tokolahi ʻo e Kāingalotu ʻi Nāvuú ʻi he 1841. Ka ne nau ʻilo naʻe fie maʻu ke nau langa ha temipale, he kuo fakahā ange ʻe he ʻEikí. Naʻe laka hake ʻi ha kau tangata ʻe toko 1,000 tupu ne nau ngāue ke langa e temipalé. Naʻe tuitui ʻe he kakai fefiné ha ngaahi sote mo feimeʻakai maʻá e kau ngāué. Naʻe feilaulau ha kakai tokolahi ki hono langa ʻo e temipalé. Naʻa nau nofo ʻamanaki ki he ngaahi tāpuaki te nau maʻu aí.

Fale Fakapōpula Kātesí

Ne tuʻu e ngāue ʻi he temipalé ʻi Sune 1844, ʻi he taimi naʻe fakapoongi ai ʻa e Palōfita ko Siosefa Sāmitá. Naʻe ʻave ʻa Siosefa mo ha kau tangata tokosiʻi kehe ki he Fale Fakapōpula Kātesí. Naʻe ʻohofi ʻe ha kau fakatanga ʻa e fale fakapōpulá ʻi he ʻaho 27 ʻo Suné. Naʻa nau fanaʻi ʻo fakapoongi ʻa Siosefa mo hono tokoua ko Hailamé.

Ko Hono Fakaʻosi ʻo e Temipalé

Naʻe loto mamahi ʻa e Kāingalotú ʻi he mole honau Palōfitá. Naʻe ʻilo ʻe Pilikihami ʻIongi, ʻa ia ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻe hoko atu e ngāue ʻa e ʻEikí. Naʻe faifai pea fakaʻosi ʻe he Kāingalotú ʻa e temipalé. Naʻe ngāue ʻa e kau taki ʻo e Siasí ʻi he ʻaho mo e pō he temipalé ke lava ʻa e Kāingalotú ʻo papitaiso maʻa ʻenau ngaahi kuí pea mo silaʻi ko ha ngaahi fāmili taʻengata.

Ko Hono Toe Langa ʻo e Temipalé

Hili ʻa e mavahe ʻa e Kāingalotú mei Nāvuú, naʻe fakaʻauha ʻa e temipalé ʻe ha vela mo ha ʻahiohio. ʻI he 1999, naʻe fakahā ai ʻe Palesiteni Kōtoni B. Hingikelī (1910–2008) ʻe toe langa ʻa e Temipale Nāvuú ʻi he feituʻu tatau. ʻOku mou lava he ʻahó ni ke mamata ki he temipale fakaʻofoʻofá ni ʻo hangē pē ko hono fōtunga ʻi he 1840 tupú.

Naʻe tongi ha foʻi māhina kalipa ʻi tuʻa he holisi ʻo e temipalé.

Ko e ʻuluaki Temipale Nāvuú naʻe ʻi ai ha ngaahi maka ʻe 30 ai ʻo e laʻaá.

ʻOku tuʻu ha maka fakamanatu ʻo Siosefa mo Hailame ʻi muʻa he Fale Fakapōpula Kātesí. “Naʻe ʻikai te na mavahevahe ʻi he moʻuí, pea naʻe ʻikai fakamāvaeʻi ʻa kinaua ʻi he maté!” (T&F 135:3).

Naʻe lele hake ʻa e kau fakatangá ʻi he sitepu ʻi he Fale Fakapōpula Kātesí ke aʻu kia Siosefa mo hono kaungā tangatá.

Naʻe ʻi he loki ʻi ʻolunga he fale fakapōpulá ʻa Siosefa mo ha kau tangata ʻe niʻihi.