Ko e hā ʻoku kamata faiako fakaʻapi ai ʻa e kau talavoú ʻi heʻenau taʻu 14 kae toki kamata faiako ʻaʻahi ʻa e kau finemuí ia ʻi heʻenau taʻu 18?

ʻI ha fakahā ne fai ʻi he taimi naʻe fokotuʻu ai ʻa e Siasí ʻi he 1830, naʻe fakahā ʻe he ʻEikí, “Ko e fatongia ʻo e akonakí ke leʻohi ʻa e siasí maʻu ai pē pea ke ne ʻiate kinautolu mo fakamālohia ʻa kinautolu” (T&F 20:53). Makehe mei he kau akonaki ʻi he Lakanga Taulaʻeiki Faka-ʻĒloné, ʻoku fua ʻa e fatongia ko ʻení ʻe he kau taulaʻeikí mo kinautolu ʻoku nau maʻu e Lakanga Taulaʻeiki Faka-Melekisētekí (vakai, T&F 20:45–52). Ko e faiako fakaʻapí ko ha founga ia ʻe taha ʻoku nau fakahoko ai ʻa e fatongiá ni ʻaki haʻanau tali ha ngaahi ngāue pau mei he kau taki lakanga fakataulaʻeikí. Ko e faiako ʻaʻahí, neongo ʻokú na meimei tatau, ʻoku kiʻi kehe hono taumuʻá, ko hano foaki ha faingamālie ki he houʻeiki fafine ʻo e Fineʻofá ke nau fefakamālohiaʻaki mo feakoʻiʻaki ʻi he ngaahi ngāue ʻoku vahe mei he kau palesitenisī ʻo e Fineʻofá (ʻi hano fakangofua ʻe he pīsopé pe palesiteni fakakoló). Ko e kau finemuí foki (tautautefito ki he kau palesitenisī fakakalasí) ʻoku totonu ke nau feinga ke fefakamālohiaʻaki mo fepoupouaki ʻi ha ngaahi founga kehekehe, ka ʻoku ʻikai vahe kinautolu ke nau fai ha ngaahi ʻaʻahi fakamāhina ki ha kakai pau.