Kae ʻOua Ke Tau Toe Feʻiloaki
Ko e Houalotu Sākalamēniti Lōloa Tahá
ʻOku nofo ʻa e tokotaha naʻá ne faʻú ʻi Lākosi, Naisīlia.
Ko e houalotu sākalamēnití ʻoku faʻa miniti pē ʻe 70. Ka ʻi ha Sāpate ʻe taha naʻe hangē ia he ʻikai toe ʻosí.
ʻOku ou manako ke lau e ngaahi tohi fakalotu ʻa e Siasí. Pea koeʻuhí ʻoku ʻikai maʻu ʻa e ngaahi tohi ko ʻení ʻi Naisīlia, ʻoku ou kole kinautolu mei haku kaungāmeʻa. ʻI heʻeku fie fakafoki e ngaahi tohi hoku kaungāmeʻá ʻi ha ngaahi ʻaho siʻi peé, naʻá ku ʻalu holo pē mo kinautolu ʻo lau ʻi hoku fanga kiʻi taimi ʻataá.
Naʻe ʻiate au ha tohi naʻe kole ʻi ha Sāpate ʻe taha ʻi heʻeku ʻi he houalotu sākalamēnití he uooti ne vahe au ki ai ko e alēleaʻanga māʻolungá. Naʻá ku lau e tohí he lolotonga ʻeku tali ke fakahoko ki he pīsopé e pōpoaki mei he kau palesitenisī fakasiteikí. ʻI he aʻu mai ʻa e pīsopé, naʻá ne kole mai ke u talanoa mo hono tokoni ʻuluakí he naʻe fie maʻu ke talanoa mo ha kau ʻaʻahi. ʻI he ʻosi pē hono ʻoange ʻo e pōpoakí ki he tokoni ʻuluakí, ne u tangatu leva ʻi muʻa.
Neongo ia, ne ʻikai hano taimi ʻeku tangutú, kuó u fakatokangaʻi kuo pulia e tohi hoku kaungāmeʻá. ʻI he toe pē miniti ʻe nima pea kamata e lotú—pea ʻosi ʻi muʻa mo e maʻu mafai pulé—ne u pehē ʻoku ʻikai totonu ke u ʻalu. Naʻe kamata ai ʻeku palopalemá, ʻo ʻita hono fakaloto mamahiʻi hoku kaungāmeʻá, ʻi he houalotu sākalamēniti lōloa taha ko ʻeni kuó u ʻi aí.
Naʻá ku fakaʻamu ke fai mo ʻosi ʻa e taimí, ka ko e polokalama kotoa he ʻasenitá naʻe hangē ia he ʻikai toe ʻosí. Naʻá ku taʻemanonga, peá u lotu fakalongolongo pē ke maluʻi ʻe he ʻOtuá ʻa e tohí. Ko hono moʻoní, naʻe ʻikai lōloa e ngaahi malangá, ka ne maʻu au ʻe ha lotohohaʻa tōtuʻa. Toe ha miniti ʻe nima pea ʻosi ʻa e lotú, kuo ʻikai ke u toe lava ʻo kātaki. Ne u mono atu ha kiʻi tohi ki he tokoni ʻuluakí ʻo ʻeke ange pe naʻá ku tuku e tohí ʻi hono tafaʻakí. Naʻá ku fakaʻamu ke kamo mai hono ʻulú. Ka naʻe kalokalo ia.
Naʻe ʻikai ke kuikui hoku matá he lolotonga ʻo e lotu tukú ka naʻá ku siofi fakalelei ʻa e ongo feituʻu naʻá ku fakakaukau ʻe ʻi ai ʻa e tohí. Lolotonga iá, naʻá ku fakakaukau, ka fie maʻu, te u ʻalu ki he ngaahi kalasi ʻo e Lautohi Faka-Sāpaté ʻo fanongonongo ai e mole ʻa e tohí.
Neongo ia, naʻe fakaʻohovale, ha liliu lahi hoku lotó ʻi he ʻosi ʻa e houalotu sākalamēnití, ʻo ʻikai ke u toe hohaʻa au ki he tohí. Naʻe fakahā mai ʻe he Laumālie Māʻoniʻoní kiate au—ʻi ha ngaahi mōmēniti fakamaama fakalaumālie siʻi—naʻe taʻe-ʻuhinga ʻeku loto hohaʻá. Naʻá ku ako ko e meʻa ʻoku mahuʻinga moʻoní pe te u maluʻi ʻa e ngaahi meʻa ʻe tuku ʻe he ʻOtuá ke u tokangaʻí. Naʻe fakalau leva ʻe heʻeku fakakaukaú e meʻa ne u lava ʻo manatuʻi ʻoku fakafalala mai ʻe he ʻOtuá kiate aú: hoku laumālié, hoku fāmilí, kinautolu ʻoku ou faiako fakaʻapi ki aí, kinautolu ʻoku totonu ke u vahevahe ki ai e ongoongoleleí, kau mēmipa ʻo e uooti ʻoku ou ngāue ki aí, ngaahi kui kuo pekia ʻoku nau fie maʻu e ngāue fakatemipalé, mo e ngaahi meʻa peheé.
Naʻá ku toe maʻu e tohí ʻi he hili e hoko ha meʻa ko ha aʻusia fakalaumālie mahuʻinga. Ka ʻi he ʻosi e houalotu sākalamēniti lōloa tahá ni, naʻá ku toe ʻilo ai ha ngaahi tafaʻaki ʻo ʻeku moʻuí naʻe fie maʻu ke fakaleleiʻi. Pea naʻá ku lotoʻaki ke ngāue ki he ngaahi meʻa mahuʻinga taha ʻoku fie maʻu ʻe he Tamai Hēvaní.
Tā fakatātaaʻi ʻo e ʻatá ʻe Les Nilsson