Ko e ʻOfa ʻa e Tamai Hēvaní
ʻAna Nikitisiva, Lūsia
ʻI ha taimi ki muʻa atu, ne kole ai homau ongo kaungāmeʻá pe ʻe lava ʻena tamasiʻi ko Sioné, mo hono kaumeʻa fefiné ʻo nofo ʻi homau ʻapí ʻi ha uike ʻe taha. ʻOku māmālohi ʻa Sione, pea ʻoku ʻikai ke Siasi hono kaumeʻa fefiné. Ne ma ʻoange leva ki he taʻahiné ʻa e loki ʻema tamasiʻí kae mohe ʻa Sione ʻi he sea he lotofalé.
Naʻá ma lotu ki he Tamai Hēvaní, ʻi he teʻeki ke na aʻu maí, ʻo fehuʻi pe te ma anga fēfē kiate kinaua—ʻi heʻema hoko ko ha ongo faiako, mātuʻa, pe maheni peé? Naʻe maʻu ʻa e talí ʻoku fie maʻu ke ma muimui ki he ngaahi ueʻi ʻa e Laumālié mo tokoni fakalaumālie kiate kinaua.
Ko e efiafi kotoa pē naʻe tangutu ai hoku husepānití, ʻema tamasiʻí, pea mo au ʻo mau ako folofola. ʻI he ʻuluaki efiafi mo ʻemau ongo fakaafé, naʻa mau ongoʻi ʻoku ʻikai totonu ke mau fakaafeʻi kinaua ke mau ako fakataha. Ka ʻi he efiafi hono hokó, ki muʻa ʻi he ako folofolá, ne kiʻi tukituki mai ʻa Sione homa matapaá ʻo fakahoko mai, “ʻOku ilifia ʻa Mele ke ʻeke atu, ka ʻokú ne fie ʻilo pe te ma lava ʻo kau.”
Naʻa mau fakaava ʻa e matapaá, fakaafeʻi mai kinaua, pea mau kamata ako fakataha leva e Tohi ʻa Molomoná. Naʻe teʻeki tuʻotaha ke lau ʻe Mele e folofolá ki muʻa pea ʻikai ke ne ʻilo pe ʻoku tui ki he ʻOtuá. Naʻá ne pehē ko e taimi naʻe haʻu ai ki homau ʻapí, naʻe manavasiʻi naʻa mau ʻai ke kau ʻi ha faʻahinga meʻa fakalotu naʻe ʻikai mahino ki ai.
Koeʻuhí ke nonga ʻa Mele, ne fakamatala ai ʻe hoku husepānití ki ai ʻa e palani ʻo e fakamoʻuí, ʻa e Fakamoʻui ko Sīsū Kalaisí, ʻUluaki Mata Meʻa-hā-mai ʻa Siosefa Sāmitá mo e Tohi ʻa Molomoná. Naʻa mau talanoa ʻo aʻu ki he tuʻuapoó.
ʻI he ʻaho hono hokó, ne kau mai ʻa Sione mo Mele ʻi ha talanoa mo e ongo faifekaú. He ʻikai toe ngalo ʻiate au ʻa e laumālie naʻá ne fakafonu e lokí. Hili haʻamau pōtalanoa nounou, ne mau talanoa leva ki he natula ʻo ʻetau Tamai Hēvaní. Pea fehuʻi leva ʻe Mele pe ko e hā ʻoku fakangofua ai ʻe he ʻOtuá ʻa e mamahí kapau ʻoku ʻofa ʻiate kitautolu, ko ha fehuʻi ne u fakakaukauʻi ʻi ha taimi lahi.
Naʻá ku maʻu ʻi he ngaahi ʻaho siʻi ki muʻá ha tohi mei haku kaungāmeʻa naʻe tamatō ʻi heʻene pēpē fika tolú, pea naʻe ongo ki hoku lotó e fehuʻi ʻa Melé. Naʻá ku fakamoʻoniʻi ʻoku ʻikai faʻa akoʻi fēfē kitautolu ʻe he taimi ʻo e fiefiá mo e nēkeneká ʻo tatau mo e taimi ʻo e mamahi fakafoʻituituí. Naʻá ku talaange kia Mele ʻe lava ʻe he mamahí ʻo oʻi kitautolu ʻo hangē ko hono fakamolū ʻe he afí ʻa e ukameá. Kapau te tau kei tuʻu maʻu ʻi he ʻOtuá he lolotonga ʻo ʻetau foua e ngaahi faingataʻá, ʻe tupulaki ʻetau tuí.
Ko ha pōtalanoa fakangalongataʻa. Hili ia pea mau tangutu fakalongolongo kae fakamoʻoniʻi ʻe he Laumālié ʻa e ʻofa ʻetau Tamai Hēvaní. Ko e taimi naʻe hanga hake ai ʻa Melé, naʻe ʻāʻā hono fofongá mo fonu ʻa loʻimata.
ʻOku ʻikai ke u ʻilo pe ko e hā ʻe hoko he ngaahi taʻu ka hokó, ka ʻoku ou ʻiloʻi pau ko e mahino naʻá ku fakatokangaʻi ʻi he fofonga ʻo Melé ʻi he ʻaho ko iá, te ne tokoniʻi ia he toenga ʻo ʻene moʻuí mo ala tokoni ke taki ia ki heʻene Tamai Hēvaní.