Ngaahi Sitepu ki he Fiefiá
Mei ha malanga naʻe fai ki he toʻu tupú ʻi Salatā, ʻi ʻĀsenitina, ʻi Nōvema 2011.
ʻOku ʻikai foaki ʻa e ngaahi fekaú ke fakangatangata ka ke fakaʻatā ʻa e meʻa ʻoku tau fie maʻu moʻoní pea mo e meʻa ʻoku fie maʻu heʻetau Tamai Hēvani ʻoku ʻofa ʻiate kitautolú, maʻatautolú.
Tā fakatātaaʻi ʻe David Habben; Tā fakatātaaʻi ʻo e ʻatá ʻe Robert Casey © IRI
ʻOku puputuʻu ʻa e kakaí ʻi he taimi ʻe niʻihi, ʻi heʻenau pehē ko e ngaahi fekaú ko ha ngaahi fakataputapui pe fakangatangata ʻokú ne fakafaingataʻaʻiaʻi ʻa e moʻuí, tokua ʻokú ne toʻo ʻa e ngaahi faingamālié pe fiefiá pe ngaahi meʻa lelei ʻo e moʻuí. Ko hono moʻoní, ʻoku maluʻi mo tataki kitautolu ʻe he ngaahi fekaú ki he fiefiá. ʻOku ʻikai taumuʻa ke nau taʻofi ka ke fakaʻatā—ke fakangofua kitautolu ke tau aʻusia ʻi he moʻuí ni mo e moʻui kahaʻú—ʻa e meʻa ʻoku tau fie maʻu moʻoní pea mo e meʻa ʻoku fie maʻu heʻetau Tamai Hēvani ʻoku ʻofa ʻiate kitautolú, maʻatautolú.
ʻOku nau hangē ha ngaahi sitepú. ʻE ala fakafofongaʻi ʻe he sitepu takitaha ha fekau, pea ʻi he fekau kotoa pē ʻoku tau talangofua ki ai, ʻoku tau lava ʻo hiki hake leva. Pea, kapau ʻe mahino kiate kitautolu ʻa e uho ʻo e ngaahi fekaú, te tau fie maʻu lahi ange. He ʻikai ke tau ongoʻi taʻe-fietali e ngaahi fekaú; te tau fie maʻu lahi ange ka tau lava ʻo fakalakalaka lahi ange. Pea ʻoku foaki ʻe he Tamai Hēvani ʻoku ʻofa ʻiate kitautolú ʻo fakatatau mo hotau lotó. Kapau te tau fie maʻu ia, te Ne foaki kiate kitautolu ha ngaahi fekau lahi ange ke lava ʻo tokoniʻi ʻetau fakalakalaká.
Ko ia, toʻu kei talavou, kātaki ʻo tuku e lāunga fekauʻaki mo e ngaahi fekaú. ʻOua te ke pehē, “ʻOku ʻikai ke u toe fie maʻu ʻe au,” kae pehē, “ʻIo, ʻomi ke toe lahi ange. ʻOku ou fie fakalakalaka. ʻOku ou fie fiefia. ʻOku ou fie tatau mo ʻeku Tamai Hēvaní. Pea ʻoku fakahaaʻi mai ʻe he ngaahi fekaú ʻa e founga ke u fai ai iá. ʻOku nau tofa ʻa e halá ʻi muʻa ʻiate au mo toe maluʻi foki au mei he koví mo e ngaahi meʻa ʻokú ne fakaʻauha ʻa e fiefiá—pea ʻoku nau maluʻi mo e moʻuí he taimi ʻe niʻihi.”
ʻOku ou fakatauange ʻoku mou tui ki ai. Kuo pau ke tau fai e meʻa kotoa pē ʻoku fie maʻu ke tauhi ai e ngaahi fekaú, neongo kapau te tau tuʻu tokotaha pē ʻi heʻetau fai iá.
Ke ma’u ha fakamatala lahi ange kau ki he kaveinga ko eni, vakai, Thomas S. Monson, “ʻOku ʻOmi ʻe he Talangofuá ʻa e Ngaahi Tāpuakí,” Liahona, Mē 2013, 89; mo L. Tom Perry, “Ko e Tauʻatāiná ʻa e Talangofua ki he Fonó,” Liahona, Mē 2013, 86.
Ngaahi Lēsoni ʻo e Sāpaté
Tefito ʻo e Māhina ní: Ko e Ngaahi Fekaú