Ko e fē taimi ʻoku totonu ke u kamata totongi foaki ʻaukai ai mo fai e ngaahi foaki kehé?

Kapau ʻoku ʻi ai haʻo maʻuʻanga paʻanga mo ha loto fie foaki, te ke lava ʻo kamata foaki ʻaukai ʻi ha faʻahinga taʻu pē. Ko hono moʻoní, ko e taimi ʻokú ke maʻu ai ha paʻangá, kuo fekau ʻe he ʻEikí ke ke totongi vahehongofulu ʻi hoʻo paʻanga hū maí. ʻIkai ngata aí, “ʻoku kau ʻi he ʻaho ʻaukai totonú ʻa e … fai ha foaki ʻaukai ʻoku lahi ke tokoniʻi ʻaki e kau faingataʻaʻiá” (Ki hono Fakamālohia ʻo e Toʻu Tupú [kiʻi tohi, 2011], 39). ʻOku ʻikai ʻuhinga e totongi ʻe hoʻo ongo mātuʻá e meʻakai ʻa e fāmilí he ʻikai ke ke lava ai ʻo fai ha foaki ʻiate koe pē kapau ʻoku ueʻi koe ʻi he taimi kotoa pē ʻoku ʻaukai ai ho fāmilí he māhina takitaha. Manatuʻi, neongo ʻokú ke kei siʻi, ʻe tatau ai pē pe ko e hā e lahi hoʻo foakí, ko e meʻa ʻoku mahuʻinga tahá ko e foʻi moʻoni ʻokú ke talangofua ki he ngaahi fekau ʻa e ʻEikí mo tokoni taʻesiokita ke tāpuakiʻi ʻa e niʻihi kehé. ʻE tāpuekina koe pea pehē ki ha niʻihi kehe foki ʻi hoʻo feilaulaú. Kapau ʻokú ke ongoʻi ʻoku ueʻi fakalaumālie koe pea ʻokú ke lava ʻo fakahoko ia, mahalo ʻoku totonu ke ke fakakaukau ke feongoongoi mo hoʻo mātuʻá mo fakahoko ha ngaahi foaki ki he ngaahi sinoʻi paʻanga kehe ʻa e Siasí ʻoku hiki atu ʻi he laʻi pepa foaki ʻo e Vahehongofulú mo e Ngaahi Foaki kehé.