Kuo Pau ke Fakaʻaongaʻi e Lakanga Fakataulaʻeikí ʻi he Tuʻunga Taau

ʻOku foaki ʻe he Tamai Hēvaní ha konga Hono mālohí mo e mafaí ki he kau mēmipa tangata moʻui taau ʻo e Siasí. ʻOku ui ʻa e mafai ko ʻeni kuo foaki maí ko e lakanga fakataulaʻeiki. ʻOku fakamafaiʻi kinautolu ʻoku nau maʻu ʻa e lakanga fakataulaʻeikí ke nau ngāue ʻi he huafa ʻo e ʻEikí ʻi hono tataki Hono Siasí, akoʻi ʻo e ongoongoleleí, tāpuakiʻi ʻo e mahakí, pea mo hono fakahoko e ngaahi ouau toputapu ʻoku fie maʻu ki he fakamoʻuí.

Kuo pau ke fakaʻaongaʻi ʻa e lakanga fakataulaʻeikí ʻi he tuʻunga tatau koeʻuhí, ʻo hangē ko hono fakahā ʻe he ʻEikí kia Siosefa Sāmitá, “ko e ngaahi totonu ʻo e lakanga fakataulaʻeikí kuo fakamaʻu taʻelava ke veteki ki he ngaahi mālohi ʻo e langí, pea … ʻoku ʻikai lava ke mapuleʻi pe ngāueʻaki ʻa e ngaahi mālohi ʻo e langí kae ngata pē ʻi he ngaahi founga ʻo e māʻoniʻoní” (T&F 121:36). Ko ia, ʻoku ʻi ai ai ha faikehekehe ʻi he mafai pea mo e mālohi ʻo e lakanga fakataulaʻeikí. Ko e mālohi ʻo e lakanga fakataulaʻeikí … ko hono fakamafaiʻi ia ke ngāue ʻi he huafa ʻo e ʻOtuá. … ʻi he hilifaki nima. ʻOku toki maʻu pē e mālohi ʻo e lakanga fakataulaʻeikí he taimi ʻoku moʻui taau ai ʻa kinautolu ʻoku nau fakaʻaongaʻi iá mo ngāue ʻo fakatatau ki he finangalo ʻo e ʻOtuá.”¹

Koeʻuhí ko e lakanga fakataulaʻeikí ko e mālohi ia ʻo e ʻOtuá, ko Ia ʻokú ne fokotuʻu ʻa e tuʻunga ʻo e moʻui taau ki hono fakaʻaongaʻí pea fakahā ʻa e ngaahi tuʻunga moʻui taau ko iá ki Heʻene kau palōfitá mo e kau ʻaposetoló. ʻOku moʻui taau ʻa e kau maʻu lakanga fakataulaʻeikí ʻaki ʻenau fakatomala mei heʻenau ngaahi angahalá mo moʻui fakatatau mo e ongoongoleleí pea mo e ngaahi fekau ʻa Sīsū Kalaisí. ʻE tokoni e tākaua ʻo e Laumālie Māʻoniʻoní ʻi heʻenau moʻuí ke nau ʻiloʻi ai honau tuʻunga tāú.

ʻOku maʻu ʻe he kau maʻu lakanga fakataulaʻeikí e mālohi ʻi he lakanga fakataulaʻeikí ʻi he tuí mo e talangofuá:

Angaʻofa ki ho uaifí, fānaú, mo e niʻihi kehē.
Maʻu e sākalamēnití ʻi he tuʻunga taau.
Mōihū ʻi he temipalé.
Ngāue faivelenga ʻi ho fatongiá.
Fakaʻaongaʻi e lakanga fakataulaʻeikí ʻi hano fie maʻu.

Maluʻi mo Moʻui Taau mo e Lakanga Fakataulaʻeikí

“Kuo pau ke taau ʻo ʻikai fakaangaʻi ngofua hotau ʻulungāngá… ʻOku toe mahuʻinga ange hotau ʻulungaanga fakafoʻituituí. Kuo pau ke tatau ia mo e tuʻunga moʻui kuo fokotuʻu ʻe he ʻEikí. ʻE ʻikai ke tau lava ʻo fakamāʻulaloʻi kitautolu ke fiefia ʻi he angahalá, pe ʻufiʻufi ʻetau ngaahi angahalá. ʻE ʻikai te tau lava ʻo fakafiemālieʻi ʻetau fie lahí. ʻE ʻikai te tau lava ʻo fakahōhōloto ʻi he muna ʻo e ngaahi holi taʻe-māʻoniʻoní. ʻE ʻikai te tau lava ʻo ngāue ʻaki ʻa e fakakouná, pe puleʻi, pe fakamālohiʻi hotau uaifí pe fānaú, pe ko ha niʻihi kehe pē ʻi ha kihiʻi founga taʻe-māʻoniʻoni.

“ʻE mahuʻi atu ʻa e ngaahi mālohi ʻo e langí, kapau te tau fai ha taha ʻo e ngaahi meʻa ko ʻení. ʻE mamahi ʻa e Laumālie ʻo e ʻEikí. ʻE fakataʻeʻaongaʻi ai ʻa e mālohi ʻo hotau lakanga fakataulaʻeikí. ʻOku mole ai hono mafaí. …

“… ʻoku hoko ʻa e [lakanga fakataulaʻeikí] ko ha fakahinohino [ki he founga ʻetau moʻui ʻaki ʻetau moʻuí]. ʻOku aʻu atu hono fonú mo hono mafaí ki he tafaʻaki ʻe taha ʻo e veili ʻo e maté ki he ngaahi taʻengata ʻoku hanga mai mei muʻá.

“ʻOku ʻikai ha meʻa ʻe ala fakatataua ia ki ai ʻi he māmaní kotoa. Maluʻi ia, mataʻi koloa ʻaki ia, ʻofa ai, pea moʻui ke mou taau mo feʻunga mo ia.”

President Gordon B. Hinckley (1910–2008), “Moʻui Taau Fakatāutaha ke Ngāueʻaki ʻa e Lakanga Fakataulaʻeikí,” Liahona, Siulai 2002, 58, 61.