Ngaahi Fakakaukau Maʻá e Efiafi Fakafāmili ʻi ʻApí

ʻOku ‘i he pulusinga ko ʻení ha ngaahi fakamatala mo ha ngaahi ‘ekitivitī ‘e lava ke fakaʻaongaʻi ki he efiafi fakafāmili ʻi ʻapí. Ko ha sīpinga ‘eni ‘e ua.

“Ko e hā hano Fuʻu Mahuʻinga ʻo e Fale Lahi mo ʻAtaʻataá?” peesi 48: Lau e fakamatalá mo ho fāmilí. Fakakaukau ke ʻeke ange pe kuo ʻi ai nai ha taimi ne nau mā ai ke moʻui ʻaki e ngaahi tuʻunga moʻui ʻo e Siasí; te ke lava ʻo fakamatalaʻi ha taimi ne ke ongoʻi pehē ai mo e meʻa naʻá ke akó. Aleaʻi e faikehekehe ʻo e pehē he ʻikai ke u lava ʻo fai ha meʻá mo e pehē he ʻikai ke u fai ha meʻá. ʻE lava homou fāmilí ʻo muimui ki he ngaahi potu folofola ko ʻení ke ako lahi ange ki he fenāpasi ʻa e tauʻatāina ke filí mo e palani ʻa e ʻOtuá: Mōsese 4:1–4; 2 Nīfai 2:14–16, 22–27; Sōsiua 24:15; Mōsaia 2:41; Tokāteline mo e Ngaahi Fuakava 82:10; 130:20–21. Te mou lava leva ke hivaʻi “Fili ʻa e Moʻoní” (Ngaahi Himi, fika 146) pe ha himi kehe fekauʻaki mo e ngaahi fili leleí.

“Ko Hono Tohi Totonú,” peesi 64, mo e “Naʻá ku Fili ʻa e Totonú,” peesi 71: Fakakaukau ke vahevahe ʻa e anga hono kumi ʻe Kala mo ʻEkene ʻi he ongo talanoa ko ʻení ha ngaahi founga ke taukaveʻi ai e moʻoní. Te mou lava ʻo aleaʻi hono ʻuhinga ʻo e “hoko ko e kau fakamoʻoni ʻo e ʻOtuá” (Mōsaia 18:9). Mou fakakaukauʻi ha ngaahi founga ke vahevahe ai hoʻo fakamoʻoní pea fokotuʻu ha palani ke fai ia he uiké ni. ʻE lava homou fāmilí ke lau pe fakamanatu e ngaahi talanoa fakafolofola ʻa ia ne hoko ai ha taha ko ha fakamoʻoni ʻo e ʻOtuá; pea mou fakatātaaʻi e kakai ko ia he talanoá, ke hoko ko ha ʻekitivitī. Ko ha ngaahi fakakaukau ʻeni ki he ngaahi talanoá ʻa ia ʻe ala kau ai ʻa e fakafisi ʻa Taniela mo hono kaungāmeʻá ke kai e ngaahi meʻa ʻoku koví (Taniela 1), ko hono fakamoʻoniʻi ʻe Sitīveni ʻa Sīsū Kalaisí (Ngāue 6–7), mo hono poupouʻi ʻe Nīfai hono ngaahi tokouá ke nau ō ʻo ʻomi e ngaahi lauʻi peletí (1 Nīfai 3–4).

ʻI Hoʻo Lea Fakafonuá

ʻOku maʻu ʻa e Liahoná mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.

Faitaaʻi ʻe Cody Bell