Ko Hono ʻOmi ʻo e Palaimelí ki ʻApí
Te u Tauhi ki he ʻOtuá ʻaki Hoku Lotó, Iví, ʻAtamaí, mo e Mālohí Kotoa
Lolotonga e mālōlō siʻi ʻi ha ʻaho ʻe taha ne fakatokangaʻi ʻe Metisoni ha kiʻi taʻahine ʻoku tangi he naʻe lea taʻeʻofa ki ai ha taha. Ne fakaʻofaʻia ʻa Metisoni ʻi he kiʻi taʻahiné pea lue atu leva ke fakanaʻanaʻa. “Te ke fie vaʻinga mo au?” ko ʻene ʻeke ange ia ki he kiʻi taʻahiné.
Naʻe tokoni ʻa Metisoni ʻi he ʻaho ko iá ʻaki hono lotó Naʻe muimui he sīpinga ʻa Sīsū Kalaisí ʻo fakahaaʻi ha ʻofa ki ha taha faingataʻaʻia. Te tau lava ʻo fakahaaʻi ʻetau ʻofa ki he Tamai Hēvaní ʻaki haʻatau tokoni ki he niʻihi kehé ʻaki hotau lotó, iví, ʻatamaí, mo e mālohí kotoa. Te tau lava ʻo tokoni ʻaki ʻetau moʻuí kotoa!
Te tau lava fēfē ʻo tokoni ʻaki hotau lotó? Te tau lava ʻo tokoni ʻaki hotau lotó ʻaki haʻatau fakahaaʻi ha ʻofa mo manavaʻofa ki he niʻihi kehé. ʻOku tau tokanga ki he fiemaʻu ʻa e niʻihi kehé. Ko e taimi ʻoku tau tokoni fiefia aí, ʻoku tau tokoni ai ʻaki hotau lotó.
ʻOku anga fēfē ʻetau tokoni ʻaki hotau ʻatamaí? Te tau lava ʻo tokoni ʻaki hotau ʻatamaí ʻaki haʻatau fakakaukauʻi ha ngaahi founga ke tokoni ai ki he niʻihi kehé. Ko e taimi ʻoku tau fakatokangaʻi ai e ngaahi fiemaʻu ʻa e niʻihi ʻoku tau feohí pea tau fakakaukauʻi e meʻa te tau lava ʻo fai ke tokoní, ʻoku tau tokoni ai ʻaki hotau ʻatamaí.
ʻOku anga fēfē ʻetau tokoni ʻaki hotau iví mo e mālohí? ʻE lava ʻa e tokoni ʻaki hotau iví mo e mālohí, ko hano fai ha fanga kiʻi ngāue mo ngāue mālohi ke tokoniʻi e niʻihi kehé. Te tau lava ʻo faʻa tāpuakiʻi mo tokoniʻi ʻa e kakai matuʻotuʻa angé ʻaki haʻatau fai e ngaahi meʻa ʻoku faingataʻa ke nau faí.
Toʻohemá: tā fakatātaaʻi ʻe Greg Newbold; Toʻomataʻú: tā fakatātaaʻi ʻe Val Chadwick Bagley