Naʻá Ne Tapuakiʻi ʻEku Leʻo Uá
Lenitī Lonisiteila, ʻAlapeta, Kānata
Naʻe kulamūmū hoku telingá heʻeku maá ʻi he taimi naʻe ʻosi ai ʻeku hivaʻi mo hoku foha ko Teulekí ʻa e [“Ke Nonga Hoku Laumālié”] (Be Still, My Soul)1 he houalotu sākalamēnití. Naʻe ʻikai ke u fakamāmāfana lelei hoku leʻó ki muʻa pea kamata ʻa e lotú, pea ko hono olá, ko e taimi naʻá ku feinga ai ke aʻu ki he nota maʻolungá, ne ongo kovi ʻaupito hoku leʻó.
Naʻá ku moulu hifo ki hoku nofoʻangá, mo ongoʻi taʻe-fiemālie, neongo e malimali fie poupou mai hoku uaifí, mo fakapapauʻi mai naʻe ʻikai ke u uesia ʻa e laumālie ʻo e fakatahá.
Ne u hangatonu ki heʻeku kaá ʻi he hili ʻo e lotu tukú ke toʻo mai ha tohi lēsoni. Naʻe tuʻu ha fefine ʻi homau uōtí ofi ki he matapaá, ʻo tangi. Naʻe tokoni ki ai hano kaungāmeʻa ʻo hili hono nimá ʻi hono funga umá. ʻI heʻeku fakalaka atú, ne ui mai e fefine naʻe tangí hoku hingoá mo fakahaaʻi ʻene fakahoungaʻi ʻeku fili ʻa e himi ne ma hivaʻí pea mo hono hivaʻi ia ʻi ha founga ne ongo moʻoni ki hono lotó.
Naʻá ne pehē naʻe fāʻele taʻe-hoko ʻi ha kiʻi pēpē he ngaahi ʻaho siʻi ki muʻá pea naʻe fefaʻuhi mo e ʻitá mo e loto mamahí talu mei ai. ʻI heʻeku hivaʻi mo Teuleki ʻa e himí, naá ne ongoʻi hono ʻōʻōfaki ʻe he Laumālié hono lotomamahí ʻi ha ʻofa naʻe nonga mo fakafiemālie. Kuó ne fakafonu ia ʻaki e ʻamanaki lelei naʻá ne fie maʻu ke fuesia hono kolosi ʻo e loto mamahí.
Naʻá ku fakamālō leʻo siʻi ange pē peá u hū ki tuʻa ʻi he matapaá, mo ongoʻi tāpuekina mo fakatōkilalo ʻi heʻene ngaahi leá. ʻI heʻeku aʻu ki he kaá ne u manatuʻi ha lea ʻi ha fakatahaʻanga lotu naʻe fai ʻe Kimi B. Kalake, (Kim B. Clark), ko e palesiteni ʻo e ʻUnivēsiti Pilikihami ʻIongi–ʻAitahoó. Naʻá ne pehē, “Ko e taimi ʻoku tau ngāue ai ʻi he tui kia [Sīsū] ke fakahoko ʻEne ngāué, ʻoku fononga mo kitautolu” ke tokoniʻi ʻa e niʻihi kehé mo “tāpuakiʻi kitautolu ke tau leaʻaki pē meʻa ʻoku nau fie fanongo ki aí.” Naʻá ne toe akoʻi foki “ko e meʻa te tau leaʻakí mo fakahokó mahalo ʻe kiʻi ongo faikehe pe taʻe-mateuteu. … Ka ʻoku toʻo ʻe he Fakamoʻuí ʻetau ngaahi leá mo ʻetau ngaahi angafaí ʻo ʻoatu ia ʻi Hono laumālié ki he loto ʻo e kakaí. ʻOkú Ne toʻo ʻetau feinga fakamātoato taʻe-haohaoá ʻo liliu ia ki ha faʻahinga meʻa ʻoku feʻunga mālie, moʻoni, pea ki ha faʻahinga meʻa ʻoku haohaoa.”2
Naʻe fakafonu hoku matá ʻe he loʻimata ʻo e houngaʻiá ʻi heʻeku foki ki he falelotú. Kuo tāpuekina ʻe he ʻEikí ha foʻi fasi taʻemateuteu ʻo ʻoatu fakalelei hono pōpoakí ki he loto mamahi ʻo ha fefine kei talavou ke fakafiemālieʻi hono loto mamahí. ʻIkai ngata aí , naʻe ngāueʻaki ʻe he ʻEikí e aʻusia ongo ko ʻení ke ʻomi ai ki hoku lotó ha mahino lahi ange ki ha tefitoʻi moʻoni mafatukituki ʻo e ongoongoleleí.