Kei Hoko ko ha Ui Mahino
ʻOku fakahā ʻe he kau palōfitá mo e kau ʻaposetoló “Ko e Fāmilí: Ko ha Fanongonongo ki Māmani” ʻoku toe mahuʻinga ange ʻi he ʻahó ni ʻo laka ange he fuofua taimi naʻe tuku mai aí.
ʻI ha māmani ʻoku tuʻu uesia lahi ai e nofomalí pea fakaangaʻi e ngaahi fāmili angamahení, ʻoku ʻi ai ha fakamatala mahino pau ʻokú ne ʻomi ha mahino mo ha fakahinohino. ʻOku pehē ʻe he kau palōfitá mo e kau ʻaposetoló “Ko e Fāmilí: Ko ha Fanongonongo ki Māmani” ʻoku toe kaunga lahi ange pe toe lahi ange ʻi he ʻahó ni ʻi he taimi naʻe tuku mai ai ʻi he 1995.1
Ko ha Fuka Fakaonopooni ʻo e Tauʻatāiná
ʻOku kei hoko ʻa e fanongonongo fekauʻaki mo e fāmilí ko “ha ui mālohi ke maluʻi mo fakamālohia ʻa e ngaahi fāmilí,” ʻo fakatatau mo ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá.2
ʻOku meimei tatau hotau māmaní mo e sosaieti ne hōloa ʻo e kakai Nīfaí ʻi he Tohi ʻa Molomoná, pea ʻoku poupouʻi ai ʻe ʻEletā Pālati ʻa e Kāingalotu ʻo e Ngaahi ʻAho Kimui Ní ke nau “ʻai [ʻa e fanongonongó] ko ha fuka he ʻikai taʻe-tatau mo e ʻfuka ʻo e tauʻatāina’ ʻa e ʻEikitau ko Molonaí, pea tau tukupā ke tau moʻui ʻaki hono ngaahi tefitoʻi moʻoní.”3
Mātuʻaki Mahuʻinga ki he Fiefiá
ʻOku tuʻuaki ʻe he māmaní ha ngaahi hala kehekehe ki he fiefiá. Ka ʻoku fakahā ʻe he kau palōfita ʻo onopōní ko e ngaahi faingamālie lelei taha ki he fiefiá ʻoku maʻu ia ʻi he mali fakasilesitialé.4
Kapau te tau moʻui ʻaki mo ngāueʻi ʻetau ʻilo ko ia ʻe lava ke taʻengata ʻa e ngaahi fāmilí, ʻoku talaʻofa ʻa ʻEletā Pālati, “te tau tohoaki ʻa māmani kiate kitautolu. ʻE ngaʻunu ki he Siasí ʻa e mātuʻa ko ia ʻoku nau mahuʻingaʻia ke fakamuʻomuʻa honau fāmilí. …
“ʻOku totonu ke hanga heʻetau fakakaukau ʻoku ʻelito ai e fāmilí ʻo ʻai ʻa e Kāingalotu ʻo e Ngaahi ʻAho Kimui Ní ke nau feinga ke hoko ko e ngaahi mātuʻa lelei taha ʻi he māmaní. ʻOku totonu ke ne ʻai ke tau fakaʻapaʻapaʻi lahi ʻetau fānaú, he ko hotau ngaahi tokoua fakalaumālie moʻoni kinautolu, pea ʻoku totonu ke ne ʻai ke tau foaki ha taimi pē ʻoku fie maʻu ke fakamālohia ai hotau fāmilí. ʻIo, ʻoku ʻikai ha meʻa ia ʻe fuʻu fie maʻu lahi ange ki he fiefiá—ʻa ʻetau fiefiá mo e fiefia ʻa ʻetau fānaú fakatouʻosi—ka ko e lahi ʻo ʻetau feʻofaʻaki mo fepoupouaki ʻi he fāmilí.”5
Ivi ʻoku Ope Atu ʻi Haʻaú
ʻOku faleʻi ʻe ʻEletā Pālati ʻa e ngaahi fāmili ʻi he potu kotoa pē ke ʻi ai haʻanau tatau ʻo e fanongonongó ke nau muimui ki hono ngaahi akonakí.
“ʻAi hoʻo lelei tahá mo fai hoʻo lelei taha te ke lavá. ʻE foaki atu ʻe he ʻOtuá kiate koe ha ivi ʻoku mahulu atu ʻi ho ivi ʻoʻoú, ʻi hoʻo feinga fakaʻaho ke fakahoko ʻa e fatongia toputapu taha ʻokú Ne foaki ki Heʻene fānaú. Fakafanongo ki he leʻo ʻo e Laumālié mo e faleʻi ʻa e kau palōfita moʻuí. Ke Mou Fiefia Naʻe ʻikai tuku kimoutolu ʻe he ʻOtuá ʻi māmani ke mou taʻe-malava, pea he ʻikai ke lau hoʻomou ngaahi feinga ko e mātuʻá ko ha taʻe-malava tukukehe kapau te mou foʻi.”6
ʻAmanaki Lelei ki he Moʻui Taʻengatá
ʻOku akoʻi ʻe he fanongonongo ʻo e fāmilí ʻe lava ʻa e ngaahi fāmilí ke tuʻuloa ʻo taʻengata. ʻOku akoʻi ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá “neongo ko e meʻa fakafoʻituitui pē ʻa e fakamoʻuí … ka ko e hākeakiʻí ko ha meʻa fakafāmili ia. … Ko e taimi ʻoku silaʻi ai ha fāmili ʻi he temipalé, ʻoku hoko ʻa e fāmili ko iá ʻo taʻengata ʻo hangē pē ko e puleʻanga ʻo e ʻOtuá.”7
ʻOku fakamatala ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí, ko hotau fāmilí ʻoku “ʻikai ngata pē ʻi heʻene mahuʻinga ki he sosaietí pea mo e Siasí ka ki heʻetau ʻamanaki foki ki he moʻui taʻengatá.”8
Ko ha Fakatokanga kimuʻa ʻi Hono Taimí
ʻOku fakatokanga ʻa Palesiteni ʻAealingi ko e nunuʻa ʻo hono siʻaki e ngaahi akonaki ʻi he fanongonongo ʻo e fāmilí “ʻe toe fakamamahi ange … ʻo ʻikai ngata pē ʻi hono taʻe maʻu ʻo e melinó ʻi he moʻui ní pe ko e ʻikai ke maʻu ʻa e fiefiá.”9
ʻOkú ne pehē ko e fanongonongó ʻoku fakakikite koeʻuhí he ʻokú ne fakatokanga fekauʻaki mo e ngaahi tefitoʻi meʻa ʻoku nau fakavaivaiʻi ʻa e ngaahi fāmilí ʻi he ngaahi taʻu kimui ní. ʻOkú ne toʻo fakahangatonu mai ʻa e fakatokanga fakaepalōfitá mo uki ke ngāué ʻa ia ʻoku fakaʻosi ʻaki e:
“ʻOku mau fakatokanga atu ko e niʻihi fakafoʻituitui ko ia ʻoku nau maumauʻi ʻa e ngaahi fuakava ʻo e angamaʻá, ʻa kinautolu ʻoku nau ngaohikoviʻi ʻa e malí pe fānaú, pe ʻoku ʻikai ke nau fakahoko honau ngaahi fatongia fakafāmilí, te nau tuʻu ʻi ha ʻaho ʻo fai ha fakamatala ʻi he ʻao ʻo e ʻOtuá. Ko e tahá, ʻoku mau toe fakatokanga atu, ʻe hanga ʻe he movetevete ʻo e fāmilí ʻo ʻomi ki he kakai fakatāutahá, tukui koló, mo e ngaahi puleʻangá ʻa e ngaahi fakamamahi naʻe kikiteʻi ʻe he kau palōfita ʻo e kuonga muʻá mo onopōní.”10
Ko ha Tohi Fakavahaʻapuleʻanga
Ko e taimi naʻe fakahā ai ʻe Palesiteni Kōtoni B. Hingikelī (1910–2008) ʻa e fanongonongo ʻo e fāmilí ʻi he fakataha lahi ʻa e Kau Fineʻofá ʻi he ʻaho 23 ʻo Sepitema 1995, naʻá ne pehē ko hono taumuʻá ke “fakatokanga mo tomuʻa fakatokanga”11 ki he māmaní mei heʻene hē mei hono ngaahi tuʻungá. Talu mei ai, kuo pulusi ʻa e tohí ni ʻi ha ngaahi lea fakafonua lahi, toutou fakamatalaʻi ʻi he konifelensi lahí, pea ʻoku fokotuʻu ia ʻi he ngaahi falelotú mo e ngaahi ʻapí ʻi he ngaahi puleʻangá. Ko ha fanongonongo fakaepalōfita ia ne ʻomi ʻe he Tamai Hēvaní ke ne fakahinohino ʻa ʻEne fānaú—ko ha fakahinohino kuo teʻeki ai fie maʻu lahi pehē ʻo hangē ko e ʻaho ní.
Tā fakatātaaʻi ʻo e ʻatá ʻe Craig Dimond mo Cody Bell © IRI