Ko Hotau Ngaahi ʻApí, Hotau Ngaahi Fāmilí
Ne ʻIkai Teitei Kailangakiʻi Au ʻe he ʻOtuá
Naʻá ku ongoʻi taʻe-ʻaonga ʻi heʻeku mamata ki he tō ʻema tamasiʻi lahi tahá ki he ngaahi tauhele ʻa Sētané, pea naʻá ku faʻa fakahaaʻi ʻeku manavasiʻí ʻaki haʻaku ʻita. Naʻe pau ke u liliu au kae ʻoua te u feinga ke liliu ʻeku tama tangatá.
Naʻá ku fakakaukau mo hoku husepānití ʻi he kei iiki ʻema fānau ʻe toko faá, kapau te ma tā pē ha ngaahi sīpinga lelei mo ohi hake kinautolu ʻi he ongoongoleleí ʻi he ʻofa lahi pea ʻi he taimi kotoa pē, he ʻikai ke nau teitei mavahe mei he hala ko iá.
Naʻe pau ke ma liʻaki e fakakaukau ko iá ʻi ha ʻaho ʻe taha ʻi he faʻahitaʻu māfaná. Naʻe ʻalu ʻema tamasiʻi lahi tahá, naʻe meimei taʻu 14, mo hono kaungāmeʻá ʻo kaukau he vai-kaukaú. Ko e taimi naʻá ku ʻalu atu ai mo e fānau iiki angé ki he vai-kaukaú, hangē kiate au naʻá ku fakatokangaʻi ia mo ha foʻi sikaleti ʻi hono nimá. Naʻá ku hohaʻa, peá u lea ki ai fekauʻaki mo e meʻá ni kimui ange. Talamai pē ʻe ia naʻe hala ʻeku maʻú. Meʻapango, he ko e kamataʻanga ia ʻo ʻene loí.
Ne fakaʻau pē taimí mo ʻene toe fakamamaʻo lahi ange meiate kimauá. Naʻe ʻikai toe faingofua ke talanoa mo ia pea naʻe faʻa ʻita noa pē. Naʻe toe tānaki mai e kava mālohí, faitoʻo kona tapú, lea taʻe-feʻungá, mo ha toe ngaahi loi lahi ange ki he foʻi sikaletí. Pea ko hono ʻulungaanga ki he fāmilí naʻe ʻikai makātakiʻi.
Naʻá ma feinga ʻi he kamataʻangá ke fakangatangata ʻene ngaahi ʻekitivitií ke maluʻi ia, ka naʻe toe lahi ange ai e fakafepakí. Ne ʻikai ha ola e fakatonutonú. Ko e taimi naʻá ku valokiʻi ai ia mo fakatukupaaʻi ke liliú, ne faʻa iku ʻema talanoá ʻo kē leʻo-lalahi ʻo ma toe vāmamaʻo ange ai.
Naʻe faingataʻa kiate au mo hoku husepānití ʻa ʻema manavasiʻi ki heʻema tamasiʻi lahí. Naʻá ma feinga ke maʻu ha fakahinohino ʻi he lotú, ka naʻá ku ongoʻi taʻeʻaonga ʻi heʻeku vakai ki he fili heʻeku tama tangata lahi tahá ha faʻahinga hala fakatuʻutāmaki peheé. ʻI heʻema lotú, ne ma ongoʻi naʻe fakahinohino kimaua ke ma tuku ke tauʻatāina lahi ange ʻema tamasiʻí kae ʻoua ʻe puleʻi ʻaki e ngaahi tuʻutuʻuni fefeká. Naʻe ngali mātuʻaki taʻe-ʻaonga mo taʻe-akoʻi ʻeni, ka naʻe ʻikai ha ola e ngaahi feinga kotoa ki muʻa ke taʻofi hono ʻulungāngá. Ko ia ne ma fili ai ke toki tauteaʻi pe taʻofi pē ia ʻi he taimi ʻoku uesia fakahangatonu ai ʻe heʻene ngaahi angafaí e moʻui homau fāmilí.
Neongo ʻema feinga ke muimui ki he faleʻi ʻa e ʻEikí, naʻá ma fakatokangaʻi ʻoku fakaʻau ke toe kovi ange. Naʻá ku feinga ke ikunaʻi ʻeku veiveiuá mo e lotofoʻí. Naʻá ku feinga mo hoku husepānití ke fai maʻu pē efiafi fakafāmili ʻi ʻapí mo e lotu fakafāmilí, ka naʻá ku mafasia ʻi he loto halaiá ʻi he taimi kotoa pē ne u manatuʻi ai kuó ma tōnounoú pea mo e taimi kotoa pē ne u fai hala ai ki heʻema tamasiʻí. Naʻe lahi ʻeku tangí, siʻi ke u mohe, pea taimi ʻe niʻihi naʻá ku fuʻu ongosia fakaesino ʻo mālō pē ʻeku lava ke fai ha meʻa.
Naʻe hangē kuo ʻikai ha toe moʻui fakafāmilí, ʻo hangē ko ia ʻi muʻá. Naʻe faʻa fakaʻosi maʻu pē e efiafi fakafāmili ʻi ʻapí ʻi he moveuveu mo e felāuaki. Naʻá ku mātuʻaki taʻe-makātakiʻi hoku fanga kiʻi ʻofaʻangá mo faʻa fakahaaʻi leʻo lahi ke nau ʻilo.
Naʻá ku fakatokangaʻi mo hoku husepānití ʻoku ʻikai tonu ke ma tuku ke tōkelekele homa fāmilí he meʻá ni. Naʻá ma pehē leva ke ma hoko atu ʻi he muimui ki he faleʻi ʻa e ʻEikí mo e kau palōfitá, pea ko ia ne ma feinga leva ke fakahoko ha ngaahi efiafi fakafāmili ʻi ʻapi fakatuʻupakē, mo fakafaingofua mo e fānau naʻe loto ki aí. Ka naʻe teʻeki pē ke u lava ʻo tali hono maʻu ʻema tamasiʻi lahi tahá ʻi he ngaahi tauhele ʻa Sētané. Naʻá ma tuku ʻema kavengá ki he ʻEikí mo falala kiate Ia, ʻi he lotu, ʻaukai, mo e ʻamanaki—he ʻoku ngali ko e kotoa pē ia ʻoku toe kiate kimauá.
Naʻe toe kovi ange ngaahi palopalemá. ʻI ha taimi mātuʻaki faingataʻa ʻe taha, naʻá ku kole ai ki hoku husepānití ke ne tāpuakiʻi au. Naʻá ku ʻamanaki ki ha ngaahi lea fakafiemālie mo fakalotolahi. Ka, naʻe ʻafioʻi ʻe he ʻEikí ʻeku ngaahi fiemaʻu moʻoní. Naʻe naʻinaʻi kiate au fekauʻaki mo ʻeku kē leʻo lahi mo ʻeku tama tangatá. Naʻe ʻai ʻe he ʻEikí ke u fakatokangaʻi kuo teʻeki ai ke kaila tuʻo taha kiate au—ka naʻá ku kaila maʻu pē ki heʻeku fānaú.
Naʻe faleʻi makehe au ʻi he tāpuaki ko iá, ʻoku fie maʻu ke u talanoa mo ʻeku tama tangatá fekauʻaki mo ʻeku ngaahi hohaʻa kiate iá kae ʻoua ʻe valokiʻi. Naʻá ku fakatokangaʻi ko ʻeku ʻitá mo ʻeku fakaangá ko e fakafōtunga ia ʻo ʻeku manavasiʻi ki aí. Naʻá ku tukuakiʻi maʻu pē ia, peá ne maluʻi leva ʻe ia ia ʻi ha founga pē naʻá ne lavá. Naʻá ku fakakaukauʻi leva ha ngaahi founga ke liliu ai ʻeku tōʻongá.
Naʻá ku hoko he taimi ko ʻení ko ha faiako ʻinisititiuti. Naʻá ku fakatokangaʻi naʻe ʻikai faingataʻa ke u talanoa fiemālie pē mo fakaʻatuʻi mo e toʻu tupu ʻo e Siasí he naʻe ʻikai fie maʻu ke u fefaʻuhi mo e ngaahi ongo fakaeloto ʻa ha faʻē.
Naʻá ku feinga ke ʻoua naʻá ku toe sio ki heʻeku tama tangatá ʻaki e mata ʻo ha faʻē loto hohaʻa ka ko ha taha mei tuʻa. Naʻe tokoni ʻa e foungá ni, fakataha mo ha lotu mo e ʻaukai lahi, ke u mapuleʻi ʻeku ngaahi ongó mo sio ki heʻeku tama tangatá—he kuo mei taʻu 18 ʻeni—ʻaki ha mata foʻou. Naʻá ku toe lava leva ke fakatokangaʻi ʻene ngaahi leleí. Naʻá ku lava ʻo fakahaaʻi fakamātoato hoku lotó mo ʻeku ngaahi hohaʻá ki ai kae ʻikai hohaʻa.
Naʻe hoko ʻeni ko ha liliuʻanga ʻi homa vaá. Naʻá ku aleaʻi mo ʻeku tama tangatá ha ngaahi meʻa lahi, peá u lava ʻo ʻai ke ne fua e ngaahi nunuʻa ʻo ʻene ngaahi angafaí ʻiate ia pē. Ko e meʻa pē naʻá ku fai mo hoku husepānití ko hono faleʻi mo akoʻi ia ʻi ha ngaahi founga te ne lava ai ʻo fakaleleiʻi ʻene ngaahi palopalemá ʻiate ia pē.
Naʻe fāifai, peá ne tali māmālie ʻema ʻofá mo ʻema poupoú. Ko ʻema fengāueʻaki mo iá, ʻi he ʻosi ʻeni ha taʻu faingataʻa ʻe nima, ʻe lau he taimí ni ʻoku fai ia ʻi he fakaʻapaʻapa. Ko ʻene moʻuí, ʻi ha ngaahi tafaʻaki lahi, ʻoku kei taʻe-maau, ka ʻoku ʻi he hala ke fakatonutonu ai. ʻOkú ne fakatokangaʻi māmālie ʻa e meʻa ʻoku mahuʻinga moʻoni ʻi he moʻuí mo e meʻa ʻokú ne ʻomi ʻa e fiemālie ʻoku tolongá.
Kuo tokoni ʻemau ngāue fakatatau mo e faleʻi ʻa e ʻEikí ke toe maʻu ʻe homau fāmilí ha moʻui fiefia ange. Kuó u ako mo hoku husepānití ke fakatonutonu ʻema moʻui ʻa mauá pea mo homa fāmilí kae ʻoua ʻe feinga ke puleʻi e moʻui ʻema tamasiʻí.
ʻOku ou ʻilo ʻeni e ʻuhinga ʻo e fakafalala ʻeku fānaú ki he ʻEikí. ʻOkú Ne ʻafioʻi lelei ange kinautolu ʻiate au. Kuó u ako ke ʻoua te u ongoʻi haʻisia ki he ngaahi fili kotoa ʻa ʻeku fānaú. Naʻá ku ʻilo mo hoku husepānití ko e tokoni lelei taha te ma lava ʻo fai ki heʻema tamasiʻí ko e tafoki ki he ʻEikí pea falala ki Hono finangaló mo ʻEne faleʻí.
Tā fakatātaʻi ʻe Ben Sowards