Aferika
Konetineta o le Faamoemoe Susulu
O le faatuatua ma le usiusitai o le au Paia o Aso e Gata Ai i Aferika ma Matakasa ua faia ai se faataitaiga mo tagata o le Ekalesia i soo se mea.
E faigofie ona alofa atu i tagata o Aferika,”1 na saunoa ai Elder Jeffrey R. Holland o le Korama a Aposetolo e Toasefululua i Freetown, Sierra Leone, i se tofiga na aofia ai ni asiasiga i Laipiria ma Ghana.
Na saunoa o ia o le faatuatua ma le usiusitai o le Au Paia o Aso e Gata Ai i Aferika, lea na maua mai ona o lo latou alolofa i le talalelei, na faia ai se faataitaiga mo tagata uma o le Ekalesia.
E faagaeetia loto, o le saunoaga lea a Elder Holland, “le vaaia o le taua tele o le talalelei ia i latou, le vaaia o mea ua latou faia i ai, auala ua latou faatauaina ai, i le vaaia o lo latou faamaoni i le sefuluai ma i auaunaga, i le o i le malumalu—ou te mafaufau i le malumalu o le vaaiga faapaleina lea—ma le vaaia o le tausiaina o a latou fanau i le Ekalesia ma le auina atu o o latou atalii ma afafine i le misiona. O se faamaoniga matagofie o lo latou faamaoni.”2
I Ou Luma
Na ta’ua e Elder Holland, e ese mai ia Aferika i Saute (lea na faatulagaina ai se siteki i le 1970), e itiiti ifo ma le 30 tausaga talu ona i ai le Ekalesia i Aferika. Ona o lena mea, o le Ekalesia iinei na “faavaeina a o e vaai atu i ai, faavaeina i se taimi sili ona puupuu,” ma o “Aferika o se tasi o na nofoaga faapitoa lea e mafai ona e tagai ai i le mamalu o le Alii, le ofoofogia ma le vavega o le Toefuataiga, o fofola moni mai i ou luma.”3
Na saunoa o ia o le a ia manatua pea le i ai i Accra, Ghana, faatasi ai ma Peresitene Gordon B. Hinckley (1910–2008), ina ua ia fofogaina o le a fausia ai iina se malumalu. “Sa tutū [tagata] ma alalaga, fetagisi ma sisiva, sa opo e le tasi le isi ma fetagisi. Ma i se itu, o loo faaauau pea lena agaga. O lo’u alofa lena mo tagata Aferika—o lo latou olioli e le faatapulaaina i le talalelei. O le toatele na itiiti ni a latou meatotino faalelalolagi, ae ina ua latou maua le talalelei, sa latou taliaina atoatoa ma mulimuli ai. … O loo latou faia pea. O loo latou faia e oo mai lava i le asō.”4
Faataunuuina o Valoaga
O isi perofeta ma aposetolo o e na faataunuuina ni tofiga i Aferika na saunoa e uiga i le konetineta o se nofoaga lea ua faataunuuina moni ai valoaga a le Alii.
“O tagata Aferika o ni tagata agalelei ma onosai,” o le saunoaga lea a Elder Richard G. Scott o le Korama a Aposetolo e Toasefululua, ina ua mavae se asiasiga faatasi ma tagata o le Ekalesia i Mozambique ma Nigeria. “E le tele sa latou tupe maua po o ni punaoa e mafai ai ona latou faia ni mea i tupe, latou te faia e ala i a latou taumafaiga naunautai. O le a latou savavali i le tele ma tele o maila ina ia faataunuuina se mea ua uunaia i latou e le Agaga Paia e fai e faalauteleina ai le galuega.”5
Sa ta’ua e Elder Scott i le 1999, ina ua ia faapaiaina Mozambique mo le talaiga o le talalelei, sa na o le 40 le au paia iina, ma sa avea le atunuu ma se vaega o le Misiona a Johannesburg Aferika i Saute. I le taimi o lana asiasiga lona lua, ia Ianuari 2011, o le Ekalesia i Mozambique na faatoateleina i le silia ma le 5,000 tagata o le ekalesia ma salalau atu i itu e lua ma paranesi e 19 na feiloai i le atunuu atoa. O Mozambique foi o le laumua lea o le Misiona a Maputo Mozambique, lea e aofia ai le atunuu o Angola.6
Fou ae o loo Tuputupu Pea
“Tatou te fou iinei,”7 o le saunoaga lea a Elder Russell M. Nelson, o le Korama a Aposetolo e Toasefululua, a o asiasi atu i Matakasa, Malawi, ma Kenya. “O loo tatou vaavaai i le galue o le Alii i luga o lenei konetineta tele o Aferika e faamanuia tagata … i le upu moni, le malamalama o le talalelei, [e aofia ai] sauniga o le faaolataga ma le faaeaga.”8 Na ia ta’ua, sa sili ona faagaeetia o ia i le malosi o le tulaga faaleautaitai o le Ekalesia i le lotoifale i Aferika: “E le mafai ona faamatala lo matou matuai faafetai mo nei taitai [i le lotoifale], o e ua tuuina atu o latou taimi ma taleni i le galuega a le Alii e faamanuia ai olaga o nei tagata.”9
O Elder Nelson e “matuai talitonu” i le lumanai o le Ekalesia ma tagata i Aferika ma Matakasa ona o lo latou faatuatua e malosi atu nai loo o latou luitau. “O outou moni lava o fanau a le Atua, fanau o le feagaiga o Isaraelu, ua saunia e feiloai i le Alii o Iesu Keriso ma le Atua, lo tatou Tama Faavavau, ma nonofo faatasi i lo La’ua afioaga faatasi ma o [outou] aiga,”10 na ia saunoa ai i se fonotaga i Matakasa. Na ta’ua foi e Elder Nelson, “o tagata nei e maoae tulaga gafatia. Latou te faatuatua. E ia i latou se alofa i le Alii, ma latou maua mea uma e manaomia ina ia matuai malolosi ai se nuu.”11
I le taimi o se faatalanoaga i Nairobi, Kenya, na saunoa ai Elder Nelson, “Ua i ai a tatou falelotu o le Au Paia o Aso e Gata Ai. Ua i ai se tatou siteki iinei [i] Nairobi. Na fai ananei se tatou konafesi faalesiteki. O se fiafiaga le feiloai ai ma tagata. E silia ma le afe tagata na faapotopoto ai, [ma sa ese lo latou] migao [ma sa i ai se] aufaipese matagofie, [se] au peresitene maoae o le siteki, [ma se] peteriaka i luga o le tulaga. E faapefea ona faailoa atu lo’u olioli pe a ou vaai i se alualu i luma faapenei?”12
E Ui Lava i Faigata
Na saunoa Elder Holland, o loo manuia le Ekalesia i Aferika e ui lava i luitau. O se faataitaiga, na ia saunoa mai ai, “E ui ina sa i ai se taua malosi faalelotoifale i Côte d’Ivoire [Ivory Coast], ae sa o mai pea … le Au Paia o Aso e Gata Ai i le malumalu. O se saafiafiga maoae ia i latou. Ou te tu ma ofo.”13
I le saunoa ai e uiga ia Sierra Leone ma Laipiria, na saunoa ai Elder Holland, “Ona o o latou olaga vevesi ma faatamaia e taua faalealofa i se taimi e le’i mamao atu, o se tasi lea o mafuaaga ua vave ai le tuputupu ae o le talalelei. Na latou vaai i le olaga e le tatau ona i ai, ma o le taimi nei faatasi ai ma faifeautalai ma tagata o le ekalesia ua molimau atu, ua latou vaaia ai le mea e mafai ona i ai. O le lagi ua mafai ai ona liliu [o latou tofotofoga] i faamanuiaga, ma ua latou sii ese a’e ai i latou lava mai le fenumia’i faaupufai ma fetauaiga faalemalo.”14
E le gata i lea, na ta’ua e Elder Holland o loo faaauau pea le tuputupu ae o le Ekalesia i Zimbabwe e ui lava i taimi faigata i tausaga talu ai nei: “Ua tupu talaulau le Ekalesia. Ua i ai le tuputupu ae, ua i ai o tatou siteki, ua i ai a tatou misiona. O le mea lena o loo tupu i Aferika atoa.”15
Talaiina Atu o le Talalelei
O se tasi o mea autu ua manuia ai le Ekalesia i Aferika, na saunoa ai Elder Holland, o le “tatou te le o aafia i faafitauli tetele faaupufai pe faaagafesootai. Tatou te talai atu le talalelei. Tatou te popole e uiga i le faamasinoga tonu, ma o loo tatou popole i avanoa faaagafesootai ma le fai mea tutusa. Ae tatou te manatu [o loo maua i le talalelei ia tali], o lea e na o le tatou talai atu lava o le talalelei. Ma ua moni lena mea i isi nofoaga ma e moni foi i Aferika, e maua e tagata lena malamalamaaga, faamanuiaga, ma le malamalama i o latou olaga, ma e faafuasei lava ona amata sui ia mea ma faamanuiaina ai o latou olaga.”16
O Le Folafolaga a le Alii
Na sii mai e Elder Holland le fetalaiga a le Faaola, o lē na fetalai mai, “E faapea ona muamua o e na mulimuli, e mulimuli foi e na muamua” (Mataio 20:16).
“I nisi o itu,” na ia saunoa ai, “na tuai le oo mai o le talalelei i Aferika, ae o le mea sili e mafai ona tatou faia i le taimi faatulagaina a le Alii—ma o le taimi faatulagaina a le Alii, ou te vave faamautuina atu. E lata mai nei lava ona amata maua e tagata Aferika ni misiona ma faifeautalai, o faamanuiaga o le perisitua, ma isi mea faapena. O se konetineta tele, ma e tele lava se tatou galuega e fai. Ae ou te talitonu o le tuputupu ae o loo tatou vaaia nei i Aferika, o se vaega o le faataunuuga o le folafolaga a le Alii. Ua tulai ae le Au Paia o Aso e Gata Ai i Aferika ma le faatuatua. Ua amata ona latou galulue. Ua latou faafetaiaia luitau o le mauaina o le talalelei ma faia ia aliali i o latou olaga.”17