Savali a Faiaoga Asiasi
O Le Misiona Paia a Iesu Keriso: O Le Atalii e Toatasi na Fanaua
Ia suesue ma le agaga tatalo i lenei mataupu ma saili ia iloa le mea e faasoa atu. E faapefea e le malamalama i le soifuaga ma le misiona a le Faaola ona faateleina ai lou faatuatua ia te Ia ma faamanuia ai isi e te leoleoina e ala i faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O lo tatou Faaola, o Iesu Keriso, ua ta’ua o le Alo e Toatasi na Fanaua aua ua na o Ia lava le tagata i le lalolagi na fanaua e se tina faaletino ma se Tama e ola pea. Sa maua e Ia mana faalelagi mai le Atua, Lona Tama. Mai Lona tina, o Maria, na Ia maua ai le tino faaletino ma oo ai ia te Ia le fiaai, fia inu, vaivai, tiga, ma le oti.1
Talu ai ona o Iesu Keriso o le Toatasi Na Fanaua e le Tama, ua Ia mafai ai ona maliu ma toe tu mai. Na aoao mai tusitusiga paia, “e ala i le togiola a Keriso,” tatou te “maua o se toetu” (Iakopo 4:11). Ua tatou iloa foi o tagata uma e “mafai…ona faatu mai o ia i le ola pea mo le ola e faavavau” pe afai tatou te “talitonu” (MF&F 29:43).
Pe a tatou malamalama atoatoa e uiga i le avea o Iesu ma Alo e Toatasi na Fanaua e le Tama, o le a faateleina lo tatou faatuatua ia Keriso. Na saunoa mai Elder D. Todd Christofferson o le Korama a Aposetolo e Toasefululua, “O le Faatuatua ia Iesu Keriso o le talitonuga maumaututu ma le faamautinoaga lea o (1) Lona tulaga o le Alo e Toatasi na Fanaua a le Atua, (2) Lana Togiola e le iu, ma le (3) Lona Toetu moni.”2 Ua molimau mai le perofeta o aso Nei: “O [Iesu Keriso] o… Alo pele e Toatasi i la le tino, le Togiola o le lalolagi.”3
Mai Tusitusiga Paia
Mai lo Tatou Talafaasolopito
I le Feagaiga Fou tatou te faitau ai e uiga i tamaitai, i latou e i ai igoa ma nisi e leai ni igoa, o e na faaalia le faatuatua ia Keriso, aoaoina ma ola i Ana aoaoga, ma molimau e uiga i Lana galuega, vavega, ma le mamalu sili. O nei tamaitai na avea ma ni soo lelei ma ni molimau taua i le galuega o le faaolataga.
Mo se faataitaiga, o Mareta na molimau malosi e uiga i le paia o le Faaola ina ua ia faapea atu ia te Ia, “Ou te talitonu o oe o le Keriso, o le Alo o le Atua, le a o le a afio mai i le lalolagi” (Ioane 11:27).
O nisi o uluai molimau e uiga i le paia o le Faaola o Lona tina, o Maria, ma lona tausoga o Elisapeta. O le taimi lava na uma ai ona asiasi le agelu o Kaperielu ia Maria, sa asiasi loa [Maria] ia Elisapeta. O le taimi lava na faalogo ai Elisapeta i le faamālō a Maria, sa “faatumuina [o ia] i le Agaga Paia” (Luka 1:41), ma molimau atu o le a avea Maria ma tina o le Alo o le Atua.