E Mafai Ona Ou Faia Lenei Mea!

Roy Atkin, Kalefonia, ISA

O se afiafi o le vaitau o le Kerisimasi, ma sa taatia mai i luga o le palapala se kiona mafiafia. Mo le tele o masina na ma onosaia ai ma la’u soa le tau malulu o Siamani, tu’itu’i i faitotoa, ma tuuina atu ni kopi o le Tusi a Mamona. Na oo lava i lena taimi, i le 15 tausaga talu ona maea le Taua Lona 11 a le Lalolagi, o le toatele lava o tagata Siamani e faaeteete i tagata Amerika.

Ae o lena po o le a papatiso ai Ingeborg Bienmuller. Ae peitai, i le malaga umi i le pasi e agai atu i le nofoaga a le Fuavaalele Tau a le Iunaite Setete, sa filemu o ia. Sa ou iloaina le tuputupu ae o lona lagona o le tiga.

A o matou latalata atu i le fale faatalipasi, na faliu mai Ingeborg ia i maua ma fai mai, “E te lua iloa le faigata o lenei mea ia te au? Na fasiotia lo’u toalua i le taua e le autau Soofaatasi, ae o le toatele o isi tagata o lou aiga na feoti i tu’igapomu.”

Sa ia pai atu i lona vae. “Sa ou lavea i se uamea mai se pomu. O le a lē toe lelei lava lo’u vae. Ou te le iloa pe mafai ona ou alu i totonu iina.”

Na matou nonofo e aunoa ma se pisa ao goto ifo i totonu ana upu ma tu loa ma le pasi. Na nofo faamalo Ingeborg. Na tatavale lo’u fatu. Sa ou tatalo ina ia aua nei ona alu ese i le fefe.

Ona ia tu lea i luga mai lona nofoa ma tautino mai, “Ua tuuina mai e le Tama Faalelagi ia te au se molimau e uiga i le moni o le Toefuataiga. Ou te iloa e moni le Tusi a Mamona. E mafai ona ou faia lenei mea! Elder Atkin, faamolemole fesoasoani mai ia te au e savali.”

Na matou faia se savaliga umi e oo i le faitotoa, na faigata ona manava ia Ingeborg ao matou pasia leoleo. Sa matou sui i o matou ofu papae ma maua le vai i le nofoaga autu. Na avea le vai ma se nofoaga paia, ma sa i ai le filemu i o matou luga. O popolega na i foliga o Ingeborg na suia i le olioli a o ia laa atu i totonu o le vai ma papatisoina o se tagata o le Ekalesia.

“O le po lea na tuuina mai ai e faifeautalai se Tusi a Mamona ia te au, sa ou matuai fiafia lava,” sa ia fai mai ai a o matou tietie atu i le fale. “Sa ou ala ma faitauina seia oo ina ou tau i le Mosaea 18, lea na valaaulia ai e Alema le nuu ina ia papatisoina: ‘Faauta, o vai nei o Mamona … ma o lenei, ona ua outou mananao e o mai i le lafu a le Atua, ma ta’ua o ona tagata, … se a se mea tou te tetee ai i le papatisoina?’” (Mosaea 18:8, 10).

Sa ia faaauau pea ma le lemu, “Sa ou moe i le faitauina o na upu, ma sa ou faia se miti. Sa ou tu i autafa o se vaega manaia o le vai, e pei o le Vai o Mamona. I le isi itu o le vai na tutu ai ia tagata e laei papae—o lo’u aiga! O lo’u toalua, lea na fasiotia i le taua, sa ataata ma faailo mai ia te au ina ia papatisoina.”

O le po lena na avea ai Sister Bienmuller ma se tasi o le Paranesi a Würzburg ma se tasi o le toatele i Siamani o e na iu lava ina manumalo i o latou popolega ma auai i le Ekalesia.