Na Matou O Mai mo a Matou Meaalofa

Walter Emilio Posada Rodriguez, Kolomupia

Ina ua avea au ma se tasi o la matou au peresitene o le itu, sa ou fesoasoani e faamaopoopo se gaoioiga lea na foai mai ai e le au paia o lo matou itu ni meataalo mo tamaiti matitiva e nonofo i le aai o Soacha, Kolomupia. Na matagofie le tali mai o le au paia atoa. E le o meaalofa uma sa fou, ae o le tele lava sa i ai i tulaga lelei.

Ina ua maea ona matou utaina ia meaalofa i luga o le pasi e ave ai i matou i le aai, sa sau se teineitiiti laitiiti ia te au ma se polo palasitika ua leva ona faaaogaina ma ua osiosi solo. Sa ou uuina le polo i loʼu lima, ma tau mafaufau po o ai se tagata na foaiina sea polo ua mafoefoe ma maosiosia. Ma ni manatu faatauvaa sa ou togiina ai i lalo o le nofoa.

Ina ua matou taunuu, na amata ona usuina e la matou autalavou ni pese Kerisimasi. O a latou pesepesega, faatasi ai ma a latou pulou o le Kerisimasi, na faatosina mai ai se vaega toatele o tamaiti. Ina ua amata ona matou tufaina atu ia meaalofa, na valaau atu tamaiti i isi tamaiti. E lei umi ae uma uma ona tuuina atu ia meaalofa.

Matou te saunia loa e o, ae ou vaaia se tamaitiiti pe a ma le valu tausaga le matua o tamomoe agai mai ia i matou, ma uu mai le lima o si ona uso laitiiti. Ina ua la taunuu mai, na fai mai le tama matua, “Na ma o mai mo a ma meaalofa.” O lona tulaga mama na ou le magagana ai ma ootia ai lo’u loto.

Sa ou faamatalaina atu ia te ia ua leai ni meaalofa. Sa ia tali mai, “E le afaina pe afai e le o i ai ii sau meaalofa, ae e tatau lava ona i ai iinei le meaalofa a si ou uso laitiiti.”

Ona ou mafaufau lea i le polo sa ou togiina i lalo o lo’u nofoa. Sa ou fai atu i tamaiti e toe tasi lava le meaalofa sa i ai ae o se meaalofa faatauvaa.

“E le afaina po o le a,” o lana tala lea. “O le meaalofa lena.”

Sa ou oso i luga o le pasi ma maua ai le polo. Ina ua ou tuuina atu i le tamaitiiti, sa matuai tumu i le fiafia. Sa osooso i le agaga faafetai, ma fai mai, “O se polo! O le meaalofa lena sa ou ole atu i le pepe o Keriso e aumai mo au.” Na faaauau pea ona siva faataamilo ma le fiafia ao la o ese atu ma lona uso matua ma le la meaalofa faapelepele.

Sa ou tu filemu ai iina ma tagi ao siomia a’u e se lagona mafanafana o le filemu ma le agaga faafetai. O le popole ma le tausiga lē manatu faapito o le uso matua na tuuina atu i lona uso laitiiti na pa’i mai ia te au, ma sa ou faamoemoe ma le le leoa ina ia ou maua le naunautaiga e faamanuia atu ai i isi e pei ona faamanuiaina e le tamaitiiti matua lona uso.

A o savavali ese atu ma le fiafia tamaiti, sa ou toe manatua le alofa o le Faaola mo i tatou. Sa lei galo ia te Ia se tamaitiiti i autafa o se mauga o le na aioi atu mo se polo faatauvaa mo le Kerisimasi.