E le o Toe avea ma Vaisu: O La’u Malaga i le Faatoilaloina o Ponokalafi
I le avea ai ma se tamaitai talavou, ou te le i manatu lava o ponokalafi o le a avea ma se mea o le a ou tauivi ai.
Ata na tusia e Jim Madsen
Ou te le’i manatu lava o le avea o ponokalafi ma vaisu e mafai ona avea ma se faafitauli a se teineitiiti. Sa faamaonia lo’u sese ina ua pe a ma le 16 o’u tausaga. Sa ou tau ai i se vitio o ponokalafi, ma talu ai sa na o a’u ma le fiailoa, sa ou matamataina loa. Ina ua uma lena taimi muamua, sa pei sa tatau lava ona ou matamata i se mea i aso uma. Sa oo ina avea ponokalafi ma a’u vaisu.
O le matamata i ponokalafi sa le lelei ai o’u lagona. Sa ou iloaina e sese, ae ou te le’i faia se mea e suia ai. Sa ou le fiafia, ma sa ou lagona le palapalā ma aafia i faaosoosoga eleelea a Satani. Ae na ou maua lava ni auala e matamata ai, tau lava ina ia mafai ona faamalieina ai lo’u manao. O le fai o ponokalafi ma a’u vaisu na taitaiina atu ai i le tele ma le anoanoai o le faia o mea sese. Sa ou pepelo i tagata uma: lo’u tuagane, lo’u tina, ma sili atu ona leaga o i latou uma, o le Alii ma au lava. Ou te faapea ifo ia te au lava, toe tasi lava se ata tifaga o le a ou le afaina ai, toe tasi se tala palapalā o le a le leaga lea.
Sa ou alu pea i le lotu, Mutuale, ma le seminare, ae e le’i i ai le uiga sa’o po o le Agaga ia te au. Sa ou tiga, o lea ou te le’i aoaoina ai se mea mai i lesona. Sa taofi le totogiina o a’u sefuluai, tatalo, ma le faitauina o tusitusiga paia. Sa ou lagona le tausalaina, ae sa le mafai lava ona ou tuua. Sa ou aumaia a’u lava i lalo i aso uma.
Mulimuli ane, sa faatapulaaina ai lo’u faaaogaina o ponokalafi. I le taimi muamua sa ou lagonaina le taofiofia i le leai o ni ponokarafi, ae na i’u ina ou iloa na suia mea mo le lelei. Sa ese a’u gaoioiga masani. Ou te lei matamata i ponokarafi i aso uma. Sa i ai lava ni uunaiga e matamata ai, ae sa ou lelei lava i le tetee atu i ai. Mulimuli ane, ina ua mavae le lua tausaga o le fai o ponokalafi ma vaisu, sa amata ona ou tatalo i taimi uma mo le malosi ma tuu atoa ai le matamataina. Ae sa ou lagonaina pea le palapalā i totonu. Na ou iloaina e tatau ona ou talanoa atu i le epikopo. Ae sa le mafai ona ou faia.
Mulimuli ane, ina ua uma ona [ou] faalogo i le toatele o tagata o talanoa e uiga i le uia o le salamo ma tofotofoga na latou manumalo ai, sa ou lagonaina e tatau lava ona ou vaaia lo’u epikopo. Sa ou iloaina foi sa ou misia se faamanuiaga sili i le Ekalesia: lo’u faamanuiaga faapeteriaka.
Sa ou faia se avanoa e feiloai ai ma lo’u epikopo.
Sa ou lagona le maasiasi e savali atu i totonu o le ofisa o lo’u epikopo i le po o lo’u faatalanoaga. Sa ou fefe o le a na ona ia tilotilo mai ia te a’u ma faapea mai, o la’u mataupu ua leai se faamoemoe, ma ua ou eliina lava e a’u se lua ua loloto tele mo le sola ese mai ai. Sa ou fefe ina ne’i le toe tutusa lona vaai mai ia te a’u. Ae a o faamatala atu i ai la’u tala atoa, sa ia ataata mai ma le agalelei ma faalologo maua’i. Sa alofa moni o ia ia te au. Ina ua uma ona ma talanoa ma lo’u epikopo ma galulue ai i nei mea uma, sa iu ina ia fai mai ia te au ua ou mama.
O tausaga o lo’u faia o ponokalafi ma vaisu o tausaga loulouā ia o lo’u olaga, ae sa matuai lelei ou lagona ina ua ou tuua le ofisa o lo’u epikopo ma lagona o le mama. Sa peiseai na aveese atu mai o’u tauau se avega sa ou tauaveina i tausaga. Sa ou fiafia na mafai ona ou maua lo’u faamanuiaga faapeteriaka ma ai ma le agavaa i le faamanatuga ma toe maua le Agaga. Sa ou lagona le pei o se tagata fou. Sa fai mai foi tagata ua ou ese lava ma ua ese lo’u susulu. Sa sili atu lo’u fiafia i taimi uma ma i ai se uiga e sili atu ona lelei i mea uma.
Ou te iloa, faatasi ai ma le fesoasoani a le Alii e mafai ai ona tatou suia ma faatoilalo ai vaisu. Ma e le tatau ona tatou popole e uiga i le talanoa atu i le epikopo, ona o le a ia fesoasoani ia i tatou pe a tatou salamo ina ia mafai ona tatou toe lagona le mama e ala i le Togiola a Iesu Keriso.