O Le Vavega Aupito Sili

Ellen Knell, Iuta, ISA

I se aso susulu o Setema na lavea ai le ma uii i teine, o Erika, i se faalavelave tuga tau taavale. Sa aveina atu o ia [i le helikopa] i le falemai, ma ina ua mavae le tele o itula o taotoga faanatinati, na ma maua ai le tala matautia: ua maliu le ma tama teine lalelei, tiotio e 17 tausaga le matua.

I nai masina na sosoo ai sa tiga mo i ma’ua. Na ma onosaia lona aso fanau ma le Aso Faafetai ma saunia i matou lava mo la matou Kerisimasi muamua e aunoa ma ia. Na lapataia i matou e tagata e faapea, o aso malolo o le a faigata, peitai e leai se tele o ni lapataiga na mafai ona saunia i matou.

E ese mai le lagona lofituina o le faanoanoa ma le faavauvau, sa ou fuā i isi aiga o e sa faatasi ma faamanatuina fiafia [aso malolo]. Sa ou mafaufau ma le le fiafia, “Aisea ua tupu ai ia i matou? Aisea na matou le maua ai se vavega e pei o vavega ia o loo talanoa i ai isi?”

I le lotolotoi o lo’u faanoanoa, sa ou manatuaina se taimi na faia ai e la matou uarota se gaoioiga e ta’ua “O Le Kerisimasi i Peteleema.” Na laei mai tagata o le uarota e peiseai sa latou i ai i le taimi na soifua mai ai Iesu. O Erika, sa fa ona tausaga i lena taimi, na ofuina se ofu tuai totoso, e paepae ma se sikafu na taai i lona ulu.O le faatumutumuga o le afiafi o se faatinoga o le fanau mai o Iesu i se fale faafoliga o manu sa teuteuina i fusi vaovao mago ma se faatanoa vao. O se ulugalii talavou ma le la pepe faatoa fanau mai na avea ma Maria, Iosefa, ma le pepe o Iesu.

A o matou faapotopoto e siomia le vaaiga faafaatusa o le fanau mai o Iesu, sa ou matauina ua leai Erika mai ou autafa. Sa ou popole seia oo ina ou vaaia sina vaega o lona ofu paepae i autafa o le vaaiga faafaatusa o le fanau mai o Iesu. Ona sui lea o lo’u popole mai le fefe mo lona saogalemu i le fefe nei ona faalavelave i le vaaiga. Sa toeitiiti lava ou valaau atu ia te ia, ae sa ou tu ma matauina ao ia agai mai i le faatanoa vao.

Na tootuli filemu ifo Erika i talaane o Maria ma tilotilo atu i luga ia te ia e peiseai o ia fia mauaina sana faatagaga. Ona aapa atu lea o Erika ma milimili ma le alofa le pepe o loo moe. Sa le na o au na matauina. Na vave ona filemu isi ma matamata atu a o ia tootuli latalata atu i le pepe. Sa faatumulia le vaega i se lagona alofa ina ua latou iloaina o lenei pepe o le tamaitiiti o Keriso ia Erika.

I lo’u faavauvau, na aumaia e lenei manatuaga o le Kerisimasi ia lagona o le toafilemu ma le mafanafana ao ou tomanatu i le tuuto o la’u tama teine. Sa matuai tumu lou mafaufau i fesili e uiga i le olaga ma le oti—ni fesili e lei foliga mai na taua tele a o lei maliu Erika. A o ou mafaufau loloto i le Toetu ma le Faasatauroga, sa ou malamalama ia Maria. Sa ia alofa i lana Tama faatoa fanau mai, ma sa ia onosaia mulimuli ane ia tiga matuitui ma le ita ao ia molimauina Lona mafatia ma le maliu. Sa lei faasaoina Keriso i le satauro, ma na lei faasaoina Maria i lona faavauvau.

I le Kerisimasi, tatou te faamanatuina ai le amataga o le soifuaga o le Faaola i le lalolagi, ae mo au, o Lona soifua mai o le a fesootai lava e le aunoa i Lona puapuagatia, maliu, ma le Toetu—o le Togiola. Talu ai o le Faaola na motusiaina ia noataga o le oti, ou te iloa o le oti o Erika o le a le tumau ai. O le vavega lena ia faafetai ai—o le vavega aupito maoae lea o taimi uma.