Saunia mo le Afio Mai Faalua
Mai se faeasaite a le Ofisa o Aoga a le Ekalesia mo talavou matutua, “Terror, Triumph, and a Wedding Feast,” na tuuina atu i le aso 12 Setema, 2004. Mo le tusiga atoa i le gagana Peretania, asiasi i le speeches.byu.edu.
O tamalii ma tamaitai maoae i tausaga ua mavae atu na mafai lava ona faaauau pea, molimau atu, taumafai pea e fai le mea sili latou te mafaia, e le faapea ona sa latou iloa o le a latou manuia, ae ona sa latou iloa o le a outou manuia.
Christ in a Red Robe, saunia e Minerva Teichert © IRI, faaaloaloga a le Falemataaga o Talafaasolopito a le Ekalesia.
Ua tatou ulufale mai i lenei vaitaimi o le olaga faaletino i le tisipenisione aupito sili ona maoae o le talalelei ua tuuina mai i tagata, ma e tatau ona tatou faia le mea sili.
Ou te fiafia i se fuaiupu mai se saunoaga a le Perofeta o Iosefa Samita o loo faapea mai ai o perofeta na muamua atu, ositaulaga, ma tupu “ua latou tulimatai atu ma le naunautaiga i aso o loo tatou ola ai; ma le musuia i le fiafia ma le naunautaiga faalelagi ua latou pepese ai ma tusia ai ma valoia ai lo tatou taimi lenei.”1 Ia matau lenei foi folafolaga talitutusa mai ia Peresitene Uilifoti Uitilafi: “O loo matau mai i tatou e le silafaga a le Atua ma perofeta paia uma. O le tisipenisione sili lenei sa tautalagia ina ua faatoa faavae le lalolagi.”2
E i ai sou talitonuga e uiga i na tisipenisione na muamua atu faapea ma taitai, aiga, ma tagata o e na soifua i lena vaitaimi. Sa ou mafaufau soo lava ia i latou ma tulaga matautia na feagai ma i latou. Sa latou feagai ma taimi e matuai faigata ma, mo le tele o vaega, sa le manuia i a latou tisipenisione. E moni, o le mafuaaga autu lava o le Toefuataiga o le talalelei i nei aso e gata ai, ona sa lei faasaoina mai le talalelei i na vaitaimi anamua ma o le mea lea ua toe faatulagaina ai i le vaitausaga faaiu ma le manumalo.
O Se Tisipenisione O Le A Lē Iuvale
I se faapuupuuga, o le liliuese ma le faatafunaga o se tasi o ituaiga po o se isi foi sa avea ma taunuuga tupito lea o tisipenisione aoao uma lava sa tatou oo i ai talu mai le amataga. Ae o lo’u talitonuga lenei. O lo’u talitonuga e faapea o na tamalii ma tamaitai maoae, o taitai i na tausaga ua mavae atu, na mafai lava ona faaauau pea, e molimau atu, taumafai pea e fai le mea sili latou te mafaia, e le faapea ona sa latou iloa o le a latou manuia, ae ona sa latou iloa o le a outou manuia. Ou te talitonu sa latou lototetele ma faamoemoe e le mo o latou lava tulaga ae mo outou—o se faapotopotoga matagofie o tagata talavou ua faapotopoto mai e ala i le faitau selau o afe ma afe i le lalolagi atoa i se taumafaiga naunautai ina ia vaai ua faamanuiaina ma manumalo le talalelei.
Sa fai mai Moronae i se tasi taimi, i le talanoa mai ia i tatou o e o le a mauaina ana faamaumauga i aso e gata ai:
Faauta, ua faaali mai e le Alii ia te au mea tetele ma ofoofogia e faatatau i mea ua lata ona oo mai, i lena aso o le a oo mai ai nei mea ia te outou.
“Faauta, ou te tautala atu ia te outou e peiseai o outou faatasi mai i le tasi nei, peitai ua outou le o i ai. Ae faauta, ua faaali mai outou ia te au e Iesu Keriso, ma ua ou iloa a outou mea o fai” (Mamona 8:34–35).
Po o le a lava, ou te manatu e toetoe lava o perofeta uma ma uluai aposetolo sa i ai a latou taimi faafaaaliga e uiga i o tatou taimi—o se vaaiga lea na tuuina atu ia i latou le lototetele i o latou lava vaitau na itiiti ai le faamanuiaina. O na uso anamua na iloa se vaega ofoofogia e uiga ia i tatou. Na vaaia e Perofeta e pei o Mose, Nifae, ma le uso o Iareto ia aso e gata ai i se faaaliga matuai auiliili. O nisi o mea na latou vaai i ai sa le manaia, ae e mautinoa lava o na autupulaga anamua sa lototetele i le iloaina o le a iu lava ina tasi le tisipenisione lea o le a le toilalo lava.
O o tatou aso, ae le o i latou, ia na tuuina atu ai ia i latou ni “fiafiaga ma le naunautaiga faalelagi” ma mafua ai ona latou pepese ma vavalo atu i le manumalo. O o tatou aso, i le ta’ua faatasi uma, lea na tagai mai i ai perofeta mai le amataga o taimi, ma na uso na muamua atu o loo i ai pea iina e faamalosiau mai ia i tatou! I se auala moni lava, o lo latou avanoa e mafaufau ai i lo latou manuia atoatoa e faalagolago lea i lo tatou faamaoni ma lo tatou manumalo. Ou te fiafia i le manatu o le alu i le taua i aso e gata ai e avea ma sui o Alema ma Apinati ma le mea sa la aioi atu ai, ma fai ma sui o Peteru ma Paulo ma osigataulaga sa laua faia. Afai e le faafiafiaina oe i lena ituaiga o tofiga i le tala faatino o talafaasolopito, e le mafai ona e maua le fiafia!
Sauniaina o le Ekalesia a Keriso mo Lona Afio Mai
Sei ou faaopoopoina se isi elemene i lenei vaaiga o le tisipenisione ou te manatu e otometi lava ona mulimuli mai. Talu ai o lo tatou vaitaimi o se vaitaimi mulimuli ma e silisili i tisipenisione uma, aua o mea uma o le a iu lava ina faaumaina ma faataunuuina i lo tatou vaitaimi, o le mea lea, o loo i ai se mea se tasi e faapitoa lava, e matua patino lava le pau o le tiutetauave lea i luga o i tatou i le Ekalesia i le taimi nei lea e lei tutusa le pau i tauau o tagata o le Ekalesia i soo se taimi ua mavae atu. E le pei o le Ekalesia i aso o Aperaamo po o Mose, Isaia po o Esekielu, po o aso o Iakopo ma Ioane i le Feagaiga Fou, ua ia i tatou se tiutetauave e saunia ai le Ekalesia a le Tamai Mamoe a le Atua mo le taliaina o le Tamai Mamoe a le Atua—i le tino, i le mamalu manumalo, i Lana matafaioi i le meleniuma o le Alii o alii ma Tupu o tupu. E leai lava se isi tisipenisione muamua na i ai lena tiute.
I le gagana o tusitusiga paia, ua atofaina i tatou i le talafaasolopito atoa e tatau ona tatou saunia le tamaitai faaipoipo mo le oo mai o le Faatoafaiava ma ia agavaa ai mo se valaaulia i le taumafataga o le faaipoipoga (tagai i le Mataio 25:1–12; 22:2–14; MF&F 88:92, 96). I le talanoa faalauaitele atu—e tusa lava po o o tatou olaga po o olaga o a tatou fanau po o fanau a fanau po o soo se taimi lava—ua i ai tatou le tiutetauave i le avea ma se Ekalesia ma ni tagata taitoatasi o le Ekalesia ina ia agavaa e afio mai Keriso ia i tatou, ina ia agavaa e Na te faafeiloia i tatou, ma Ia taliaina ma opoina i tatou. O olaga tatou te tuuina atu ia te Ia i lena itula paia e tatau ona agavaa mo Ia!
E Tatau Ona Tatou Agavaa mo Lona Taliaina o i Tatou
Ua faatumulia au i le maofa, faatasi ai ma se lagona lofituina o le tiute e saunia ai lo’u olaga (ma i le tulaga ou te mafaia, e fesoasoani e saunia ia olaga o tagata o le Ekalesia) mo lena aso ua leva ona valoia, mo lena ui atu o le pule, mo le taimi o le a tatou tuuina atu ai le Ekalesia ia te Ia o lā ana le Ekalesia.
Pe a afio mai Keriso, e ao i tagata o Lana Ekalesia ona foliga ma amio e pei o foliga ma amio e tatau ona i ai tagata o Lana Ekalesia pe afai tatou te mananao e Na te taliaina i tatou. E tatau ona tatou faia Lana galuega, ma e tatau ona tatou ola i Ana aoaoga. Ia tatau ona vave ma faigofie ona Ia silafiaina i tatou o ni Ona soo moni lava. E pei ona fautuaina ai i tatou e Peresitene J. Reuben Clark Jr. (1871–1961), o lē na avea muamua ma Fesoasoani Muamua i le Au Peresitene Sili, na faapea mai: e le tatau ona faafaigata le iloaina o lo tatou faatuatua.3
Ioe, afai tatou te faapea atu i lena itula maoae mulimuli, o i tatou o ni tagata faatuatua, ona tatau lea ona tatou faaali atu. Ua silafia e le Leoleo Mamoe Ana mamoe, ma e tatau ona iloa i tatou i lena aso tele o Ona soo i faatinoga faapea foi i le upu.
Au uo talavou pele, o aso nei e gata ai, ma e tatau ona avea i taua ma Au Paia sili o Aso e Gata Ai tatou te mafaia. Tuu se faamamafa i le upu au paia, faamolemole.
O a fea o le a uma ai lenei mea? A fea o le a faaali aoao mai ai Keriso, i le manumalo, ma amata ai le Meleniuma? Ou te le iloa. O le mea ou te iloa, o le taimi muamua lava na amata ai lena mea o le a tupu o le 193 tausaga ua mavae. Ou te iloa, o se taunuuga o lena Uluai Faaaliga ma le mea na mulimuli mai ai, ua tatou ola ai i se taimi o faamanuiaga tulaga ese—o faamanuiaga na tuuina mai ia i tatou mo le faamoemoega o le ola faamaoni ma le mama aua afai o le a iu lava ina taunuu mai ma le manumalo le Faatoafaiava, o le a mafai ona Ia valaauliaina ma le talafeagai i tatou i le taumafataga o le faaipoipoga.
O’u uso talavou pele e ma tuafafine, ou te tuuina atu ia te outou ou alofaaga ma la’u molimau e le gata ina soifua le Atua; e alofa o Ia ia i tatou. E alofa o Ia ia te oe. O mea uma Na te faia e mo lo tatou lelei ma lo tatou saogalemu. O loo i ai mea leaga ma le faanoanoa i le lalolagi, ae e leai se mea leaga pe lamatia o ia te Ia. O Ia o lo tatou Tama—se tamā atoatoa—ma o le a Ia faamalumaluina i tatou mai le afa.
Ioe, e na o le pau le popolega ou te manao tatou te mafaufau i ai o se mea e patino lava: E mafai faapefea ona tatou ola atili atoatoa, faamaoni atili, ina ia mafai ona liligi mai i luga o i tatou taitoatasi ma luga o olaga o i latou o tatou pai atu i ai ia faamanuiaga uma o lenei tisipenisione maoae?
“Aua le matatau, le lafu itiiti e. … Vaai [atu ia Keriso] i mafaufauga uma; aua le masalosalo, aua le fefefe.” “Tou te lei malamalama lava i le tetele o faamanuiaga o i ai i le Tama … ua saunia mo outou” (MF&F 6:34, 36; 78:17).
Ou te tuuaina atu ia te outou au faamanuiaga, o lo’u alofa, ma se molimau faaaposetolo i le moni o nei mea, o le a le toilalo la tatou tisipenisione ma o i latou o e ola i aoaoga a Keriso ma faia Lana galuega o le a agavaa ai mo se valaaulia i le taumafataga o le faaipoipoga pe a oo mai le Faatoafaiava.