Seia Tatou Toe Feiloai
O Le Malaga i le Aiga
E alala le tusitala i Iuta, ISA.
Pe a tatou le iloa le ala e liliu atu i ai, o Iesu Keriso ua faaalia ia i tatou le ala.
Na amata la’u malaga i le pasi e toe foi i le aiga mai le galuega e pei lava o isi [malaga i le pasi]. I totonu o le lima minute, ua faalagolago lo’u ulu i le faamalama, ma e lei umi o le tu soo ma le toe alu o le pasi na o’u moe ai. Sa ou tau faamasani lava i tiutetauave fou na oo mai i la’u faaipoipoga talu ai nei, a o o’u faigaluega ma ave a’u kosi o [vasega] tumau. O nisi aso e leai sa’u mea e mafai ae o le moe i le taimi atoa o le malaga a le pasi i le alu ma toe foi mai.
A o fai ma ou faagalegalemoe, sa ou faalogoina ni leo o taufonō atu faasinoga o le auala o le pasi. E lei umi ae ou iloaina, o le avepasi fou e tatau ona faatonutonu i afega uma, i auala taitasi, ma i nofoaga uma e tu ai le pasi i le auala e 50-maila (80 km).
O le iloa atonu o le a umi atu se taimi e alu ai nai lo o le itula ma le afa na masani ona taunuu ai i le fale, sa vave lava ona ou ita. Sa tumu lo’u mafaufau i mafaufauga le alofa e uiga i le faavalevalea o le avepasi. Sa faaauau pea ona faalavelave ia leo na taufonō atu i le faasinoga o le auala i a’u taumafaiga e moe.
Ae peitai, e lei umi, ae ou matauina ua uma le feei. Sa ou tilotilo a’e ma vaaia ai se tamaitai o faasinosinoina malie le avepasi mai lona nofoaga e lua laina i o’u luma atu. Sa ou matauina a o ia, tuuina atu malie ma le agalelei i le tamaloa le faasinoga ma, a o le’i nofo i le vaega e nofo ai, sa ia ta’u atu foi nai isi nofoaga e tu ai le pasi i lalo atu o le auala. Na leva ona ou taunuu i le fale, ae sa faalavelave ia te a’u ia a’u gaoioiga o le faitio e faatusa atu i le taitaiga agalelei a lenei tamaitai.
Na ou iloaina ai sa pei lava a’u o le avepasi—e le’i sili atu so’u iloa o lo’u auala i le olaga nai lo o le iloa e le avepasi o lona auala fou. O i maua uma sa i luga o se auala e le masani ai. Ou te mautinoa sa ia faafetai ona sa naunau se tasi o lē sa uia muamua lena auala, e ofoina atu ma le onosai ni faasinoga e uiga i mea o loo taatitia i luma atu.
E fai e Keriso lena lava mea e tasi mo i tatou. Pe a tatou te le iloa le ala e liliu i ai, o Lana faataitaiga e faailoa mai ai ia i tatou le ala. A i ai ni a tatou fesili, na te tuuina mai ma le alofa ni tali. Pe o le a faafia ona Ia, i le vaivai i le maea ai o se faigamalaga umi ma le mamao, saili e tali i manaoga o isi?
Talu mai lena aso, sa i ai ni nai a matou avepasi fou. E i ai taimi na latou manaomia ai ni faasinoga, ma e faafetai i le faataitaiga na faaali mai ia te a’u e se tamaitai agalelei ma lo tatou Faaola, na ou naunau e tuuina atu i ai.