Ou Te Iloa o le a Toe Afio Mai Iesu Keriso

E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.

E mafai ona e vaai faalemafaufau i le opoina o oe e Iesu i Ona aao ma tuu atu ia te oe se faamanuiaga? O le mea lena na Ia faia mo tamaiti sa Nifae i le Tusi a Mamona ina ua mavae Lona toetu mai.

Ma sa oo ina poloai mai o ia ia avatu a latou fanau laiti.

“O lea na latou aumai ai a latou fanau laiti ma ua faanonofo i latou i lalo i luga o le eleele faataamilo ia te ia, ma sa tu Iesu i le totonugalemu .

“… Sa ia ave a latou fanau laiti, taitoatasi, ma faamanuia i latou, ma tatalo atu i le Tama mo i latou.

Ua tatou iloa o le a toe afio mai Iesu ma soifua i le lalolagi faatasi ma i tatou. O le a avea o Ia ma o tatou Tupu ma Pule. O le a avea o se taimi o le filemu ma le fiafia mo i latou o e ua saunia e faafetaiai o Ia.

E alofa Iesu ia te oe e pei o Ia alofa i tamaiti sa Nifae. E mafai ona e saunia e vaai ia te Ia pe a toe afio mai e ala i le agalelei i isi, e ala i le usiusitai, e ala i le faia o au tatalo, ma e ala i le filifilia o le mea sa’o. Ma o le a e saunia ai pe a toe afio mai o Ia!