Salamo

O le Togiola a le Faaola o Iesu Keriso ua mafai ai ona salamo, ma e ao i tagata uma ona salamo.

O nisi taimi tatou te fefefe ai pe afai o le tuga tele o le natura o se agasala e manaomia ai le ta’uta’u atu i se epikopo po o le peresitene o le paranesi, o le faamalamalama mai lea a Elder Bradley D. Foster o le Fitugafulu i se tusiga o loo i itulau e 54–55 o le lomiga o le masina lenei. Ae ui i lea, “o i latou o e sa malaga i le auala o le salamo o le a ta’u atu ia te outou e le gata e mafai ona faia le malaga ae afai sa e i ai iina ma toe tepa i tua, o le mea lenei o le a e vaaia:

E mafai ona e faia lenei mea. Ma pe a e faia, o le a lelei mea uma. …

“O le taimi lava e te amata ai, o le a e lagona le matuu atu [o se avega]. …

“O lou epikopo o le a fesoasoani ia te oe i lenei mea. O le a e alofa ia te ia ma o le a le galo o ia.”

Fautuaga mo le Aoaoina o le Autalavou

Faitau faatasi ma lou [alo] talavou le vaega e uiga i le salamo i le Mo le Malosi o le Autalavou. Ia talanoaina faamanuiaga e mafai ona tatou maua e ala i le Togiola ma le ala ua mafai ai e le salamo lenei mea.

E mafai foi ona e faasoa atu lau molimau e uiga i le salamo ma le Togiola ma o laua uiga i lou olaga. Atonu foi e te manao e fai atu i au talavou e faasoa mai a latou molimau o le salamo ia te oe. Ma pe a talafeagai ai, e mafai ona e valaaulia ni fanau talavou ina ia fesoasoani i uso ma tuafafine laiti i le gaoioiga o loo faamatala atu i lalo.

Fautuaga mo le Aoao Atu o Tamaiti

Ina ia faaalia le uiga o le tumau i le ala ua poloaiina ai i tatou e le Alii e mulimuli ai, mafaufau e faaaoga se taavale meataalo (po o se vaalele, vaa, po o se taavaletoso) i se lesona faatino. Faaaoga se faafanua ma fai atu i le tamaitiiti e faame’i atu le taavale mai se tasi tulaga i luga o le faafanua i le isi. Fesili atu, “O le a se mea e tatau ona fai pe afai e amata ona se ese le taavale mai le ala?”

Afai e manino a se ese le taavale, e tatau ona toe aumai i le ala sa’o, fesili atu pe faapefea ona pei lenei mea o le salamo. Faamalamalama atu e faapea, o nisi taimi a o tatou femalagaai ai i le olaga, e tatau ona suia lo tatou taiala ina ia mautinoa o tatou agai atu i le ala sao. O nisi taimi e mafai e i tatou lava ona faia lenei mea. Ae o nisi taimi tatou te manaomia le fesoasoani. Fai atu i tamaiti e tau mai ni taimi na latou fesoasoani ai ia i latou lava, ni taimi na fesoasoani ai nisi ia i latou, ma auala e mafai ona fesoasoani ai le Tama Faalelagi ma Iesu Keriso ia i latou. Ao e aoao atu lenei autu, ia manatua o tamaiti e i lalo o le valu tausaga e le faamasinoina ma e le manaomia ona salamo, ae e taua tele mo i latou le aoao e uiga i le mataupu faavae o le salamo.

Ia talanoaina a latou tali faatasi ma i latou ma talanoa e uiga i le auala e avea ai le salamo o se meaalofa mai le Tama Faalelagi ma Iesu Keriso lea e mafai ai ona tatou toe foi atu ia i Laua.