Tutu i Nofoaga Paia

O le tausaga lenei sa valaaulia ai e Mekasini a le Ekalesia le autalavou mai le salafa atoa o le lalolagi e auina mai ni ata o loo faaalia ai auala na latou tutu ai i nofoaga paia. Matamata i nisi o ata na auina mai ma vaai i mea na fai e le autalavou e ola ai i le autu o le Mutuale o le 2013.

1 Soo se taimi ou te aafia ai i gaoioiga lelei, ae maise lava faatasi ma lo’u aiga, ua ou tu i nofoaga paia.

LaRae R., 16 tausaga, British Columbia, Kanata

2 Ou te tu i nofoaga paia pe a ou faatauaina mea e i ai se taua e faavavau nai lo o mea o le lalolagi.

Kirck M., 18 tausaga, Negros Occidental, Filipaina

3 Ia te au, o le tu i se nofoaga paia o lona uiga o le faia o auaunaga. O le auala e sili ona ou fiafia i ai e fai ai auaunaga o totonu o le malumalu. E mafai ona ou lagonaina se agaga malosi pe a ou te faia le galuega a le Alii i le maota o le Alii.

Kiana B., 15 tausaga, Iuta, ISA

4 O loo o’u tu atu i autafa o le faatanoa o le vai papatisoga lea sa ou papatiso ai. Ou te mafaufau i lenei faatanoa o se nofoaga paia, lea e osifeagaiga ai tagata ma le Atua ma faafouina ai.

Joe Smith E., 17 tausaga, Akwa Ibom, Nigeria

5 Soo se taimi lava ou te alu i mauga ma vavae ese mai le lalolagi, ua ou iloa e mafai ona avea ma nofoaga paia ma le toafilemu.

Emma P., 17 tausaga, Oregon, ISA

6 Ou te fiafia lava i fafo, ma o soo se taimi lava ou te i ai i se nofoaga e pei o lenei (Delicate Arch i Moapi, Iuta), ou te lagona le fesootai tele atu i lo’u Tama Faalelagi. O le mafai ona vaai i mea ofoofogia ua foafoaina e le Tama Faalelagi mo i tatou e fesoasoani ou te lagona ai le Agaga.

Ioane T., 18 tausaga, Iuta, ISA

7 O lo’u fale o se nofoaga mamalu, paia, aua ou te lagona ai le fiafia tele ma le toafilemu iina. Ma a ou faitauina le Tusi a Mamona, ou te lagona se toafimalie filemu e ala mai i le Agaga Paia.

Melisa D., 13 tausaga, Kosovo

8 O se ata lenei mai le Amataga Fou. O au, o le falelotu o se nofoaga paia lea ou te aoao ai i tulaga faatauaina o Tamaitai Talavou ma mataupu faavae o le talalelei. I le lotu, ou te faamalosia ai foi a’u faauoga ma tamaitai talavou e tutusa o matou faatuatuaga.

Luize S., 12 tausaga, Rio Grande do Sul, Pasila

9 Ou te tu i se nofoaga paia pe a ou fesoasoani atu i tagata ma fiafia faatasi ai ma ni uo lelei.

James R., 17 tausaga, Karolaina i Matu, ISA

10 Ou te tu i se nofoaga paia pe a ou faatasi ma uo o e ola i le talalelei. Latou te fesoasoani mai ia te au ia tumau lo’u fesootai atu i lo tatou Tama Faalelagi ma ia faateleina le lotogatasi ma le Agaga Paia.

Jonathan N., 17 tausaga, Buenos Aires, Atenitina

11 Ou te tu i nofoaga paia pe a ou taina le piano i le sauniga faamanatuga. O fati ma upu o viiga e faamalosia ai lo’u faatuatua ma la’u molimau.

Chelsea A., 13 tausaga, Banten, Initonisia

12 Ou te tu i nofoaga paia pe a ou taitaia pese i le sauniga faamanatuga aua ou te ootia i pesega matagofie a le faapotopotoga.

Geovani W., 15 tausaga, Banten, Initonisia

13 Ou te tu i nofoaga paia pe a ou aoaoina la’u korama i Aso Sa. Ou te fiafia e faasoa atu le talalelei.

Ramón M., 16 tausaga, Kalefonia, ISA

Isi Nofoaga Paia

O ala lenei na faapefea ona faauma ai e isi talavou le fuaiupu “Ou te tu i nofoaga paia pe a …”

• “Ou te faasoa atu le talalelei i au uo.” John B., 17 tausaga, Ceará, Pasila

• “Matou te tutu ma faifeautalai, ona o le galulue faatasi ma i latou ou te maua ai le tele o aafiaga i le faasoa atu o le talalelei, ma e le o toe umi ae avea a’u ma se faifeautalai faamisiona.” Joseph H., 18 tausaga, Jakarta, Initonesia

• “O loo o’u i luga o le malae pasiketipolo, ma ou te loto fesoasoani i la’u au ma faaali atu le taalo tausaafia i le au taalo, e oo lava i le isi au.”Emily C., 12 tausaga, Iuta, ISA

• “Matou te faafiafia i le aufaipese a le matou aoga maualuga ma faasoa atu a matou taleni.” Tanner M., 17 tausaga; Kaylynn S., 15 tausaga; Lexie J., 17 tausaga; Spencer M., 17 tausaga; Idaho, ISA

• “Ou te alu i le tolauapiga a Tamaitai Talavou. Sa ou maua le avanoa e feiloai ai i isi tamaitai talavou e tutusa [o matou] tulaga faatonuina ma tulaga faatauaina, ma ia feiloai i taitai o e aoao i matou i mataupu faavae ina ia mafai ona matou aoao e fai le mea sao.” Norma V., 17 tausaga, Guayas, Ekuatoa

• “Sa ou auai i le seminare. E fesoasoani ia te au e faatumauina ai le Agaga i lo’u aso atoa!” Savannah F., 17 tausaga, Arisona, ISA

• “Ou te faailoa atu i la’u au mea ou te talitonu i ai ma puipuia i aoga lape a la’u aoga.” Makenna F., 15 tausaga, Kalefonia, ISA

• “Ou te tufaina le faamanatuga ma manatua le Togiola a Iesu Keriso.” Axel S., 14 tausaga, Jakarta, Initonesia

• “Ou te tausia a’u lava ia mama ma filifili le mea tonu, aua ou te iloa afai ou te tausisia pea, e i ai se aso e mafai ai ona ou faaipoipo i le malumalu. “ Whitney H., 15 tausaga, Iuta, ISA

• “Ou te tausia au feagaiga ma le Atua.” Mark M., 17 tausaga, Oregon, ISA

Ia mafaufau laia i mea ua e aoaoina mai le autu o le Mutuale o le tausaga lenei. O a ni nisi o ou nofoaga paia? E faapefea ona mafai ona e faaauau pea ona tu i nofoaga paia? Mafaufau e faamaumauina ou mafaufauga i lau api o talaaga.

Ata pue o le Malumalu o Curitiba Pasila e Wellington Luiz Siqueira