Kau Palōfita ʻo e Fuakava Motuʻá

ʻĀtama

“ʻOku tokosiʻi pē ha kakai ʻi ʻitāniti kotoa ne kaunga tonu ki ai e palani ʻo e fakamoʻuí … ʻo laka hake ʻi he tangata ko ʻĀtamá.”¹

ʻOku ʻiloa au ʻe he tokolahi taha ʻo e kakaí ko e fuofua tangata ke moʻui he māmaní, ka ʻoku ʻikai ʻilo ʻe ha tokolahi naʻe ʻi ai hoku fatongia mahuʻinga kimuʻa peá u toki haʻu ki he māmaní. Naʻá ku taki ʻa e kau tau ʻa e ʻOtuá ʻi he moʻui kimuʻa ʻi he māmaní ʻo tauʻi e kau tau ʻa Sētané ʻi he Tau ʻi he Langí,² pea naʻá ku tokoni kia Sīsū Kalaisi ʻi hono faʻu ʻo e māmaní.³ Naʻe ʻiloa au ko Maikeli he taimi ko iá, ʻa ia ko hono ʻuhingá ko e taha “ʻoku hangē ko e ʻOtuá.”⁴

Naʻe fili au ʻe he ʻOtuá ke u hoko ko e fuofua tangata he māmaní mo tuku au ʻi he Ngoue ko ʻĪtení, ko ha palataisi naʻe ʻi ai ʻa e faʻahinga ʻakau mo e fanga monumanu kehekehe. Naʻá Ne hō kiate au ʻa e “mānava ʻo e moʻuí”⁵ mo foaki kiate au ha hingoa foʻou: ʻĀtama.⁶

Naʻe folofola mai ʻa e ʻOtuá ki hoku uaifi ko ʻIví, pea mo au ke ʻoua te ma kai ʻa e fua ʻo e ʻakau ʻo e ʻilo ʻo e leleí mo e koví.⁷ Kapau naʻe ʻikai ke ma kai e fuá, naʻá ma mei nofo ai pē ʻi he ngoué mo moʻui ʻo taʻengata, ka naʻe ʻikai ke ma mei lava ʻo “fakalakalaka [ʻi heʻema] fehangahangai mo e ngaahi meʻa ʻi he moʻui fakamatelié”⁸ pe maʻu ha fānau.⁹ Ko e filí naʻe ʻamaua ia ke fai.

Naʻe pau ke ma mavahe mei he ngoué mo e ʻao ʻo e ʻOtuá koeʻuhí ko ʻema fili ke kai ʻa e fua ʻo e ʻakaú. ʻOku ʻiloa ʻeni ko e Hingá. Naʻá ma hoko ai ʻo matelie, foua fakatouʻosi ʻa e lelei mo e kovi ʻo e moʻuí, mo ʻomi ha fānau ki māmani.¹⁰

Naʻe ʻafioʻi ʻe he ʻOtuá ʻe hoko ʻa e Hingá—naʻá Ne fekau mai ai ʻa Sīsū Kalaisi ke fai e fakalelei maʻa ʻetau ngaahi angahalá mo ikunaʻi ʻa e maté ka tau lava mo ʻetau fānaú ʻo foki kiate Ia.¹¹

Naʻá ma ako mo ʻIvi ʻa e ongoongolelei ʻo Sīsū Kalaisí—kau ai ʻa e tui kia Sīsū Kalaisí, fakatomalá, papitaisó, maʻu ʻa e meʻafoaki ʻo e Laumālie Māʻoniʻoní, mo e kātaki ki he ngataʻangá—pea naʻá ma akoʻi ia ki heʻema fānaú.¹²

Naʻe ʻā hoku matá koeʻuhí ko ʻeku ngaahi aʻusiá, peá u maʻu e fiefiá ʻi he moʻuí ni.¹³ Manatuʻi te ke lava mo koe ke ongoʻi e ʻofa ʻa e ʻOtuá mo foki kiate Ia kapau te ke muimui ʻia Sīsū Kalaisi,¹⁴ hangē ko ia ne u ako ke faí.

Maʻuʻanga Fakamatalá

1. Robert L. Millet, “The Man Adam,” Ensign, Jan. 1994, 8.

2. Vakai, Fakahā 12:7–8.

3. Vakai, Robert L. Millet, “The Man Adam,” 10.

4. Ko e Fakahinohino ki he Ngaahi Folofolá, “Maikeli,” scriptures.lds.org.

5. Sēnesi 2:7.

6. Vakai, Mōsese 1:34.

7. Vakai, Sēnesi 2:16–17; Mōsese 3:16–17.

8. Malangaʻaki ʻEku Ongoongoleleí: Ko ha Fakahinohino ki he Ngāue Fakafaifekaú (2004), 56.

9. Vakai, 2 Nīfai 2:22–23.

10. Vakai, Mōsese 4:22–31; 5:10–11; ʻAlamā 12:21–27.

11. Vakai, Sione 3:16–17; 1 Kolinitō 15:22; 2 Nīfai 9:21; ʻAlamā 42:2–15.

12. Vakai, Mōsese 5:1–12, 58–59; 6:51–67.

13. Vakai, Mōsese 5:10.

14. Vakai, Mōsaia 27:25–26.

15. Vakai, Tokāteline mo e Ngaahi Fuakava 27:11.

16. Vakai, Sēnesi 5:5.

17. Vakai, Tokāteline mo e Ngaahi Fuakava 116:1; Taniela 7:9–14.

18. Vakai, Tokāteline mo e Ngaahi Fuakava 29:26.

19. Vakai, Tokāteline mo e Ngaahi Fuakava 88:114–16.

Puha Moʻoniʻi Meʻá: ʻĀtama

• Ngaahi Hingoá: ʻĀtama, Tamai ko ʻĀtamá, ʻI Muʻa ʻi he Ngaahi ʻAhó, Maikeli¹⁵

• Taʻu ʻi he taimi maté: 930¹⁶

• Ngaahi fatongia ʻi he maama fakalaumālié: Taki e kau tau ʻa e ʻOtuá ʻo tauʻi ʻa Sētane; tokoni kia Sīsū Kalaisi ʻi hono faʻu ʻa e māmaní

• Ngaahi fatongia he moʻui fakamatelié: Pēteliake, husepāniti, mo e tamai; tokoni ʻi hono fakahoko ʻo e Hingá; moʻui ʻaki ʻa e ongoongolelei ʻo Sīsū Kalaisí

• Ngaahi fatongia ʻi he maama tataliʻanga ʻo e ngaahi laumālié: ʻE ʻaʻahi mai ki hono kakaí ʻi ʻĀtama-ʻonitai-Āmani¹⁷; tokoni ʻi he Toetuʻú¹⁸; taki ʻa e tauʻi fakaʻosi ʻo Sētané¹⁹

Mei toʻohemá: tāvalivali ʻa Dan Baxter; ʻĀtama mo ʻIvi ʻi he Ngoué, tā ʻe Lowell Bruce Bennett; Ko e Mavahe mei he Ngoue ko ʻĪtení, tā ʻe Joseph Brickey; ʻI he Tataú, tā ʻe Joseph Brickey; Ko e Akoʻi ʻe ʻĀtama mo ʻIvi ʻEna Fānaú, tā ʻe Del Parson; Ko e Fakanofo ʻe ʻĀtama ʻa Setí, tā ʻe Del Parson; ʻĀtama-ʻonitai-Āmani, tā ʻe Del Parson; Ko e Ikunaʻi ʻe he ʻĀngelo Pule ko Maikelí ʻa Sētané, tā ʻe Guido Reni/Bridgeman Art Library/Getty Images; ʻata mei muí mei he iStockphoto/Thinkstock