Mālō e lelei, Kiʻi Lami
Kōlini Solomone, ʻOniteliō, Kānata
Naʻá ku tokoni mo hoku husepānití ki heʻema tama fefiné mo ʻene ongo tama tangatá ʻi he malaʻe vakapuná, ʻi heʻenau teuteu ke puna ʻo foki ki honau ʻapí. Naʻá ma tokoni ki heʻema taʻahiné ʻi hono fetōhoaki ʻo e ngaahi katoletá, kumi e paasipōtí, mo tokangaʻi ha kiʻi taha taʻu tolu longomoʻui. Naʻe mohe pē homa kiʻi mokopuna tangata taʻu taha ko Tomí ʻi hono salioté kae fakafokifā pē ku ʻā. Naʻá ne hohaʻa mo feinga ke sio ki he longoaʻá, ngaahi maama ngingilá, mo e meʻa fakahohaʻa kotoa pē.
Naʻá ku sio ki hono matá peá u ʻiloʻi e meʻa ʻe hokó, naʻá ku kaila leva ki heʻeku taʻahiné. Naʻe tulolo vave hifo leva, puke ʻe kiʻi mata ʻo Tomí ʻaki hono nimá, sio hangatonu ki hono kiʻi matá, pea talaange ʻi he leʻo ʻofa, “Mālō e lelei, kiʻi lami.”
ʻI he taimi pē ko iá, naʻe hōloa ʻene mata fulufulú, mata ʻitá, mo e fakafefeka hono umá, ʻi he molū hifo ʻo fiemālie hono sinó. Naʻe kiʻi malimali ki muʻa pea toe kuikui hifo hono laumatá ʻo toe mohe. Naʻe fetongi ʻene ilifiá ʻaki ha fakafiemālie mo ha nonga naʻe hangē naʻá ne ʻōʻōfaki iá. Ko ha kiʻi fakafōtunga siʻisiʻi kae mālohi ʻo e falala naʻe maʻu ʻe Tomi ki heʻene faʻeé. Naʻe fakafiemālieʻi ia ʻe hono nima angamahení, leʻó, mo ʻene ʻi aí.
Kuo tau ʻosi ongoʻi kotoa e ilifiá, taʻepaú, mo e puputuʻú, ʻo hangē ko Tomí. ʻOku fakanonga ke ʻiloʻi ʻoku ui mai ʻa Sīsū Kalaisi, ko e Tauhi Sipi Leleí, kiate kitautolu. ʻOkú Ne ʻafioʻi ʻEne tākangá, pea te tau lava ʻo fakafalala kakato ki Ai. ʻOkú Ne folofola ʻi he ʻofa ʻo pehē, “ʻOku ou tuku ʻa e melinó kiate kimoutolu. …ʻOua naʻa mamahi homou lotó, pea ʻoua naʻa manavahē ia” (Sione 14:27).
ʻOku ou ʻilo te tau lava ʻi he lolotonga ʻo e taimi taʻepaú ke maʻu ha fakafiemālie mo ha fakamahino ʻi heʻetau tafoki ki he Tauhi Sipi Leleí ʻi he tui mo e falala. Ko e taimi ʻoku tāpuakiʻi ʻaki ai au ʻa e fiemālié he lotolotonga ʻo e moveuveú, ʻoku ou manako ke manatu ki he mōmēniti ko ia ʻi he malaʻe vakapuná mo ʻeku taʻahiné mo hoku mokopuna tangatá. ʻOku ou maʻu ha nonga ʻi he toʻo atu ʻeku ngaahi kavenga mafasiá, ʻo hangē ko Tomí. ʻOku ou ongoʻi he lolotonga ʻo e ngaahi taimi peheé, ha “Mālō e lelei, kiʻi lami,” mei hoku Tauhi Sipí.