Kiʻi Tohi Fakamatala ʻo e Konifelenisi ʻo ʻOkatopa 2013

“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38).

ʻI hoʻo toe fakamanatu ko ia ʻa e konifelenisi lahi ʻo ʻOkatopa 2013, ʻe lava ke ke fakaʻaongaʻi ʻa e ngaahi pēsí ni (mo e ngaahi Tohi Fakamatala Fakakonifelenisi ʻi he ngaahi pulusinga he kahaʻú) ke tokoni atu ki hoʻo akó mo fakaʻaongaʻi ʻa e ngaahi akonaki fakamuimuitaha ʻa e kau palōfita mo e kau ʻaposetolo moʻuí mo e kau taki kehe ʻo e Siasí.

Ke lau, mamata, pē fanongo ki he ngaahi lea ʻo e konifelenisi lahí, ʻalu ki he conference.lds.org.

ʻOku fakaʻaongaʻi fēfē ho fāmilí ʻa e meʻa ʻoku mou ako mei he konifelenisi lahí? ʻĪmeili mai kiate kimautolu ʻi he [e-mail].

Palōmesi Fakaepalōftá: Fehangahangai mo e Ngaahi ʻAhiʻahí

“ʻOku toe ʻafioʻi foki heʻetau Tamai Hēvaní, ʻa ia ʻokú Ne foaki lahi ke tau fiefia aí, ʻoku tau ako mo tupulaki pea mo mālohi ange ʻi heʻetau fehangahangai mo ikunaʻi ʻa e ngaahi ʻahiʻahi ʻa ia kuo pau ke tau lavaʻí. ʻOku tau ʻiloʻi ʻoku ʻi ai ha ngaahi taimi te tau foua ai ʻa e lotofoʻí, ha taimi te tau loto mamahi ai. Mo ha taimi ʻe ʻahiʻahiʻi ai kitautolu ʻo aʻu ki he ngataʻanga ʻo ʻetau kātakí. Ka, ʻoku hanga ʻe he ngaahi faingataʻa ko iá ʻo ʻai ke tau liliu ʻo lelei ange, ke toe fakaleleiʻi ʻetau moʻuí ʻi he founga ʻoku akoʻi ai kitautolu heʻetau Tamai Hēvaní, pea aʻusia ha tuʻunga kehe mei hotau tuʻunga ki muʻá—ʻo lelei ange mei he kuo hilí, mahino lahi ange mei he kuo hilí, ʻofa lahi ange mei he kuo hilí, mo fakamoʻoni mālohi ange ʻi ha toe taimi.

“ʻOku totonu ke hoko ko ʻetau taumuá ʻeni—ke vilitaki atu mo faʻa kātaki, ʻio, kae toe fakalaumālie ange ʻi heʻetau fononga ʻi he taimi fakafiefiá mo e taimi mamahí. Ka ne taʻe ʻoua e ngaahi faingataʻa ke ikunaʻí mo e ngaahi palopalema ke fakaleleiʻí, ne tau mei tuʻu maʻu ai pē, ʻo ʻikai ha kihiʻi fakalakalaka ki heʻetau taumuʻa ʻo e moʻui taʻengatá.”

Palesiteni Thomas S. Monson, “ʻE ʻIkai Te u Fakatukutukuʻi Koe, pe Liʻaki Koe,” Liahona, Nōvema 2013, 87.

• Ngaahi talí:1. fekaú; 2. ongoongoleleí, tākangá; 3. angahalá; 4. fefine, tangata.

Ngaahi Tali Maʻaú

ʻOku fakahoko ʻe he kau palōfitá mo e kau ʻaposetolóʻi he konifelenisi takitaha ha tali fakalaumālie ki he ngaahi fehuʻi ʻoku maʻu ʻe he kāingalotu ʻo e Siasí. Fakaʻaongaʻi hoʻo pulusinga ʻo Nōvema 2013 pe hū ki he conference.lds.org ke maʻu e tali ki he ngaahi fehuʻí ni:

• Ko e hā ha ngaahi tokāteline ʻoku tau ako ʻi he Ngaahi Tefito ʻo e Tuí? Vakai, L. Tom Perry, “Ko e Ngaahi Tokāteline mo e Tefitoʻi Moʻoni ʻoku Maʻu ʻi he Ngaahi Tefito ʻo e Tuí.”

• Te tau lava fēfē nai ʻo kau atu ki he ngāue fakafaifekaú ʻo kapau ʻoku tau manavasiʻi? Vakai, M. Russell Ballard, “Falala ki he ʻEikí.”

• ʻOku fakaʻaongaʻi ki he hā ʻa e vahehongofulú? Vakai, David A. Bednar, “Ko e Ngaahi Matapā ʻo e Langí.”

• ʻE uesia fēfē ʻe he angahalá mo e angatuʻú ʻa ʻetau tauʻatāiná pea iku ai ki he pōpulá? Vakai, Quentin L. Cook, “Ko e Tangilaulau ʻa Selemaiá: Tokanga Telia e Nofo Pōpulá.”

ʻAlu ʻo Fai Ia

Ne akoʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku tau maʻu e ngaahi tāpuaki māʻongoʻonga taha ʻo e konifelenisí ʻi he taimi ʻoku tau:

1. “Fakataha mai ke fanongo ki he ngaahi folofola ʻa e ʻEikí.”

2. “Foki ki hotau ʻapí ʻo moʻui ʻaki kinautolu.”

Mei he “Konifelenisi Lahí: Ko e Fakamālohia ʻo e Tuí mo e Fakamoʻoní,” Liahona, Nōvema 2013, 7.

Lea Fakaepalōftita kau ki he Houʻeiki Fafiné mo e Lakanga Fakataulaʻeikí

Ne fehuʻi ʻe ʻEletā Neil L. Andersen ʻo e Kōlomu ʻoe Kau ʻAposetolo ʻe Toko Hongofulu Mā Uá: “Ko e hā ʻoku fakahoko ai pē ʻe he kakai tangatá e ngaahi ouau ʻo e lakanga fakataulaʻeikí? …

“Hangē ko ʻetau ʻilo pau ʻoku ‘tatau pē’ e ʻofa ʻa e ʻOtuá ki Hono ngaahi fohá mo Hono ngaahi ʻofefiné, ʻoku tau ʻilo foki naʻe ʻikai te Ne fakatupu ke tatau tofu pē e tangatá mo e fefiné. ʻOku tau ʻilo ko e tuʻunga tangatá mo e fefiné ko ha ʻulungaanga ʻoku mahuʻinga ki hotau ikuʻanga mo e taumuʻa fakamatelié mo taʻengatá. ʻOku ʻi ai ha ngaahi fatongia toputapu ne foaki ki he tangatá mo e fefiné.

“ʻOku tau ʻilo ne fokotuʻu ʻe he ʻEikí mei he kamataʻangá e founga ki hono ngāue ʻaki Hono lakanga fakataulaʻeikí.”

ʻI he maʻuʻanga fakamatala fika 12 ʻo e leá ni, ne fakamatala ai ʻa ʻEletā ʻEnitaseni ki ha kau palōfita ne nau fai ha tali ki he fehuʻí ni. Naʻe pehē ʻe Palesiteni Kōtoni B. Hingikelī (1910–2008), “Ko e ʻEikí … naʻá Ne tuʻutuʻuni ʻoku totonu ke maʻu e lakanga fakataulaʻeikí ʻe he houʻeiki tangata ʻi Hono Siasí.” Ne pehē ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kuo teʻeki fakahā mai ʻe he ʻEikí ʻa e ʻuhinga kuó Ne fokotuʻutuʻu ai e Siasí ʻo hangē ko ia kuó Ne faí.”

Mei he “Mālohi ʻi he Lakanga Fakataulaʻeikí,” Liahona, Nōvema 2013, 92.

Fakafonu ʻa e Konga ʻAtaá

1. “Ko e kakai tauhi fuakavá ko e ___________________ kinautolu!” (Linda K. Burton, “Ko e Mālohi, Fiefia, mo e ʻOfa ʻi hono tauhi ʻo e Fuakavá,” Liahona, Nov. 2013, 113).

2. “ʻOku tokolahi ha kakai ʻoku ʻikai ke nau ʻilo ʻoku tataki kinautolu ʻe he ʻEikí ki ha ngaahi feituʻu te nau lava ke fanongo ai ki he ___________________ mo kau ki Heʻene _______________” (Gérald Caussé, “ʻOku ʻIkai ko ha Kau Muli Kimoutolu,” Liahona, Nōvema 2013, 50).

3. “ʻOku mālohi ange ʻa e māʻoniʻoní ʻi he _____________________” (Boyd K. Packer, “Ko e Kī ki he Maluʻi Fakalaumālié,” Liahona, Nōvema 2013, 27).

4. “ʻI hono fakanenefu ko ia e faikehekehe ʻo e kakai fefiné mei he kakai tangatá, ʻoku mole atu leva ai ʻa e ngaahi meʻafoaki makehe mo fisifisimuʻa ʻa ia ʻe lava ʻe he kakai ________________ mo e _______________ ʻo ngāueʻi fakataha ke maʻu e kakató” (D. Todd Christofferson, “Ko e Mālohi Fakaivia ʻo e Kakai Fefiné,” Liahona, Nōvema 2013, 31).

Toʻohemá: faitaaʻi ʻe Ashton G. Smith; Toʻomataʻú, takai fakatoʻomataʻu mei ʻolungá: faitāaaʻi ʻe August Miller; tā fakatātaaʻi ʻo e taá ʻe Carlos Israel Gutiérrez Robles; faitaaʻi ʻe Emily Leishman Beus