ʻOku Fakatahaʻi ʻe he Hisitōlia Fakafāmilí ʻa e Ngaahi Fāmilí
Iaeli B., ʻĀsenitina
Naʻá ku maʻu ha taumuʻa he Fakalakalaka Fakatāutahá naʻá ne ueʻi au ke u kamata ʻi he tohi hohoko hoku fāmilí. Ko e taimi kotoa pē naʻá ku ʻalu ai ʻo maʻu meʻatokoni mo ʻeku ongo kuí, naʻá na fai mai ha ngaahi talanoa mei heʻena moʻuí pea fekauʻaki mo hoku ngaahi kāinga kehé. Naʻá ku kamata ʻalu leva ki he senitā hisitōlia fakafāmilí mo tānaki e ngaahi fakamatala fekauʻaki mo hoku fāmilí.
ʻOku ou manatuʻi e taimi naʻá ku maʻu ai e fakamatala fekauʻaki mo ʻeku kui fefine hono tolú. Naʻe folau mai ki ʻĀsenitina ʻi ha vaka, ʻoku lolotonga feitama. Naʻá ne telio siʻene kiʻi tamasiʻí ʻi tahi he lolotonga ʻo e folaú. Naʻe hoko pē ia ko ha talanoa kae tālunga ʻeku maʻu hono hingoá ʻi ha lekooti. Naʻá ku ofi ange ki heʻeku ongo kuí, peá u fakaʻau ʻo ʻilo ʻeku ngaahi kuí ʻo hangē pē naʻá ku nofo mo kinautolú. Naʻá ku maʻu ha fakamatala fekauʻaki mo ʻeku ngaahi kuí, vahevahe ʻa e ngaahi ongoongo fakafiefia ʻo e silaʻi ke taʻengatá, mo tokoni ke tāpuekina ha ngaahi toʻu tangata lahi.
Naʻe hokohoko atu ʻeku maʻu ha ngaahi koloa fūfū ʻo ʻeku hisitōliá, malo mo e FamilySearch. ʻOku ou saiʻia ʻi he meʻa naʻe meʻa ʻaki ʻe Palesiteni Tōmasi S. Monisoní: “[ʻOku ou fakamoʻoni ko e taimi ʻoku tau fai ai ʻa e meʻa kotoa ʻoku tau lavá ke fakahoko ʻa e ngāue ʻoku ʻi hotau ʻaó, ʻe fakaʻatā mai ʻe he ʻEikí kiate kitautolu ʻa e kī toputapu ʻoku fie maʻu ke fakaava ʻaki ʻa e koloa ʻoku tau fekumi lahi ki aí.]”1 ʻI heʻetau ngāué, te tau ʻilo ai ʻa e ngaahi kī ki heʻetau koloa taʻengatá, pea te tau lava ʻi ha ʻaho ke feʻiloaki hangatonu mo ʻetau ngaahi kuí.