Ko e Tātānaki ki he Ikuná
ʻOku nofo e tokotaha ʻoku ʻaʻana e talanoá ʻi Sao Paulo, Palāsila.
Tā fakatātaaʻi ʻe J. Beth Jepson
Naʻe fakatokangaʻi ʻe heʻeku faiako fīsikí hoku talēniti ʻi he fiká ʻi hoku taʻu 14, peá ne fakahū ai ke u kau he Feʻauhi Fika ʻa Palāsilá. Naʻe ʻi ai ha konga ʻe tolu. Ko e konga ʻuluakí mo e uá ʻe fakahoko ia ʻi he ʻaho Tokonaki. Naʻe lau au ki he tuʻunga fika tolú peá u fakatokangaʻi ʻe fakahoko ia ʻi ha ʻaho ʻe ua, ko e Tokonaki mo e Sāpate.
Naʻá ku talaange leva ki heʻeku faiakó mo e talēkita ʻo e Feʻauhí he ʻikai ke u fai ʻe au ha sivi ʻi he Sāpaté koeʻuhí he ko e ʻaho ia ʻo e ʻEikí. Naʻe kole mai ʻa e talēkitá ke u lea ki hoku kau taki faka-Siasí koeʻuhí ke fakaʻatā au ke u fai ʻa e siví he Sāpaté, he kapau he ʻikai ke u fai ia, ʻe fakataʻeʻaongaʻi au. Naʻá ku talaange te u fakasītuʻaʻi ʻa e meʻa kotoa pē kae ʻikai ko e ʻOtuá.
Naʻe ʻikai ke u mamahi, koeʻuhí he naʻá ku maʻu e falala ʻoku fakalāngilangiʻi ʻe he ʻOtuá kinautolu ʻoku nau fakalāngilangiʻi Iá. Naʻá ku manatuʻi ʻa e Mātiu 6:33: “Ka mou fuofua kumi ʻa e puleʻanga ʻo e ʻOtuá mo ʻene māʻoniʻoní, pea ʻe fakalahi ʻaki ʻa e ngaahi meʻá ni kotoa pē kiate kimoutolu.”
ʻOsi ha ngaahi uike mei ai pea mau fetuʻutaki ki he sekelitali ʻo e Feʻauhí, ʻo ne talamai he ʻikai ke u lava ʻo fai ʻa e siví ʻi ha toe ʻaho kehe pea ʻe fakataʻeʻaongaʻi au. Naʻá ne fokotuʻu mai ʻi he hili haʻamau talanoa fuoloa, ke u fai ange ha ʻīmeili ki ai ʻo fakamatalaʻi ange tuʻunga ʻoku ou ʻi aí. Naʻá ku lotu ki he Tamai Hēvaní ʻi he hili ʻeku ʻave ʻa e ʻīmeilí peá u talaange te u fai Hono finangaló.
Naʻá ku maʻu ha ʻīmeili mei he kouʻōtineitá ʻi he pō hono hokó, ʻo talamai ai te u fai ʻa e siví ʻi he ʻaho Mōnité ʻi he taimi ʻe faingamālie lelei taha ai kiate aú, pea aʻu ʻo ne talamai te ne fie fakahoko ʻa e siví ʻi hoku koló koeʻuhí ke ʻoua naʻá ku liʻaki e kalasi pongipongi ʻi he akó.
Naʻá ku lotu ʻi he hili ʻeku maʻu e ongoongo lelei ko ení, ke fakamālō ki he ʻEikí koeʻuhí he kuó Ne tokoniʻi au. Naʻe ō ʻeku ongomātuʻá ki he temipalé ke fakahaaʻi ʻena fakamāloó.
Ko e taimi naʻe tukuange mai ai e ola ʻo e siví, naʻá ku maʻu e mētali koula. ʻOku fakalāngilangiʻi ʻe he ʻEikí kinautolu ʻoku nau fakalāngilangiʻi Iá.