ʻOtu Lea ki he ʻOtu Lea
Molonai 10:32
Ko e taumuʻa ʻo e Mutualé he taʻu ní ko ha fakaafe ia meia Molonai ke muimui he Fakamoʻuí.
32 ʻIo, haʻu kia Kalaisi, pea hoko ʻo haohaoa ʻiate ia, pea fakafisi ʻa kimoutolu mei he anga taʻe-māʻoniʻoni kotoa pē; pea kapau te mou fakafisi ʻa kimoutolu mei he anga taʻe-māʻoniʻoni kotoa pē, pea ʻofa ki he ʻOtuá ʻaki homou iví, ʻatamaí, mo e mālohí kotoa pē, pea ʻe toki feʻunga ʻa ʻene ʻaloʻofá kiate kimoutolu, koeʻuhi ke tupu ʻi heʻene ʻaloʻofá ʻa hoʻomou haohaoa ʻia Kalaisí; pea kapau ʻoku tupu ʻi he ʻaloʻofa ʻa e ʻOtuá ʻa hoʻomou haohaoa ʻia Kalaisí, ʻoku ʻikai te mou teitei lava ke fakaʻikaiʻi ʻa e māfimafi ʻo e ʻOtuá.
Haʻu kia Kalaisi
ʻOku ʻi he ngaahi folofolá ha ngaahi fakaafe lahi ke haʻu kia Kalaisi. Kumi ʻa e ngaahi sīpinga iiki ʻoku fokotuʻu atu ʻi laló. Ko e hā ʻoku akoʻi atu ʻe he ngaahi potufolofola ko ʻení fekauʻaki mo e tāpuaki ʻo e haʻu ki he Fakamoʻuí? Te ke lava ʻo maʻu ha ngaahi potufolofola lahi ange ʻoku ʻi ai e fakaafe ko ʻení?
Hoko ʻo Haohaoa ʻIate Ia
“[ʻOku ʻikai fie maʻu ke tau loto mamahi kapau ʻoku ngali faingataʻa mo ʻikai hano ngataʻanga ʻetau feinga fakamātoato ki he haohaoá. ʻOku kei tuʻu pe ʻa e haohaoá. ʻE toki lava pē ʻo maʻu kakato ʻo ka hili ʻa e Toetuʻú pea toki tuʻunga pē ʻi he ʻEikí. ʻOku tatali ia kiate kinautolu kotoa ʻoku ʻofa kiate ia mo tauhi ʻene ngaahi fekaú].”
ʻEletā Russell M. Nelson ʻo e Kōlomu ʻo e Kau ʻAposetolo ʻe Toko Hongofulu Mā Uá “Perfection Pending,” Ensign, Nov. 1995, 88.
ʻOfa ki he ʻOtuá
Te ke lava fēfē ʻo fakahaaʻi ki he Tamai Hēvaní ʻokú ke ʻofa Ai? Fakakaukau ki he ngaahi fokotuʻu ko ʻení peá ke tānaki mai haʻo ngaahi fakakaukau pē ʻaʻau. Tohi ʻi hoʻo tohinoá fekauʻaki mo e meʻa te ke faí.
-
Tauhi e ngaahi fekaú.
-
ʻOfa mo tokoni ki he niʻihi kehé.
-
Fakahoko e ngaahi fatongia faka-Siasí.
-
Lotu fakamātoato.
ʻOku Feʻunga ʻEne ʻAloʻofá kiate Koe
“ʻOku tukuakiʻi ʻe ha kau Kalisitiane ʻe niʻihi ʻa e Kāingalotu ʻo e Ngaahi ʻAho Kimui Ní … ʻoku nau taʻe tali ʻa e ʻaloʻofa ʻa e ʻOtuá ʻi heʻenau pehē te nau lava ʻo maʻu honau fakamoʻuí iate kinautolu pē. ʻOku tau tali ʻa e tukuakiʻi ko ʻení … , ‘He ʻoku mau ngāue faivelenga … ke fakalotoʻi ʻemau fānaú … ke nau tui kia Kalaisi, mo fakalelei ki he ʻOtuá; he ʻoku mau ʻilo ʻoku ʻi he ʻaloʻofá ʻa homau fakamoʻuí, ʻo ka hili ʻemau fai ʻa e meʻa kotoa pē’ (2 Nīfai 25:23). Pea ko e hā leva ʻa e ‘ʻemau fai ʻa e meʻa kotoa peé’? ʻOku kau moʻoni ai ʻa e fakatomalá (vakai, ʻAlamā 24:11) mo e papitaisó, tauhi ʻo e ngaahi fekaú, mo e kātaki ki he ngataʻangá.”
ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá, “Have You Been Saved?” Liahona, Siulai 1998, 68.
ʻAloʻofá
“ʻOku ʻuhinga ʻa e foʻi lea ʻaloʻofá (grace), ʻo hangē ko hono fakaʻaongaʻi ʻi he folofolá, ʻoku meimei fakatautautefito pē ia ki he tokoni fakalangi mo e ivi ʻoku tau maʻu tuʻunga ʻi he Fakalelei ʻa e ʻEiki ko Sīsū Kalaisí.”
Tuʻu Maʻu ʻi he Tuí: Ko ha Huluhulu ki he Ongoongoleleí (2004), 213.
Haohaoa ʻia Kalaisi
ʻOku ʻuhinga ʻa e haohaoá, ʻo hangē ko hono fakaʻaongaʻi he folofolá, ko e kakato, kātoa, mo e tupulaki kakato, māʻoniʻoni kakato. ʻOku toe lava foki ke ʻuhinga ʻa e haohaoá ki he taʻe ʻi ai ha angahala pe ha kovi. Ko Kalaisi toko taha pē naʻe haohaoa kakato. ʻE lava ʻa e kakai muimui moʻoni kia Kalaisí ʻo haohaoa ʻi heʻene ʻaloʻofá mo e Fakaleleí” (Ko e Fakahinohino ki he Ngaahi Folofolá, “Haohaoá,” scriptures.lds.org).
Mole ke mamaʻo
Mole ke mamaʻó—ʻIkai ha toe founga pe matuʻaki hala ʻatā.
Tā ʻe he The Design Farm